نابیدگی Dehydration
نابیدگی ایک ایسی کیفیت ہے جس میں جسم کے مختلف حصوں سے مائعات کی غیر معمولی مقدار خارج ہو جاتی ہے ۔ مائعات کا اخراج آنتوں ، پیشاب کی نالی یا جلد سے ہوا کرتا ہے شدید گرم موسم اور اسہال اس کے اہم سبب ہوتے ہیں ۔
علامات:
1 ۔ مریض کی جلد کی جب چٹکی لی جاتی ہے تو جلد کسی خیمہ کی طرح اٹھی رہتی ہے ( یعنی فوری اپنی اصلی حالت میں نہیں آتی ) ۔
2 ۔ زبان خشک اور کھنچی ہوئی ہوتی ہے ۔
3۔ مریض جب کھڑا ہونے لگتا ہے تو اسے چکر آنے لگتی ہے ۔
4۔ دل تیز تیز دھڑکتا ہے ۔
5۔ صدمہ کی کیفیت طاری ہوجاتی ہے ۔
اسباب :
نابیدگی کی شکایت کی مختلف وجوہات ہوسکتی ہیں ۔ یہ عموماً آنتوں سے پیشاب کی نالی سے یا جلد سے معمول سے زیادہ مائعات کے اخراج سے واقع ہوتی ہے ۔ یہ کیفیات بڑی مقدار میں یا بار بار قے ، اسہال ، بہت زیادہ پسینہ نکل جانے ڈائیلاسس کروانے ۔ لمبے عرصے گردوں کا مرض لاحق رہنے پیشاب آور دواؤں کا زیادہ استعمال کرنے ، ذیابطیس اور دیگر امراض کے سبب ہوا کرتی ہے ۔
علاج عام اقدامات :
1۔ضائع شدہ مائعات کی مقدار کی بھر پائی کے لئے مائعات اور نمکیات کا استعمال کروانا ۔
2 ۔ پیشاب آور دواؤں کا استعمال ترک کر دینا ۔
3۔ آنتوں کے انفیکشن سے نا بیدگی اور مائعات کے ضائع ہونے کی کیفیت کو درست کرنے کے لئے خصوصی مائعات پلائے جاتے ہیں ۔
ان مائعات کا زیادہ سے زیادہ پیٹ میں انجذاب کے ذریعہ جسم میں مائعات کے توازن کو ٹھیک کیا جا سکتا ہے ۔ اس قسم کے خصوصی مائعات میں حسب ذیل شامل ہیں ۔
a.عالمی صحت کا سفارش کردہ پلایا جانے والا مائع ORS) Oral Rehydration Solution
Rehydralyte.b
Pedialyte.c
Kaolectro.d
Electrolyte .e
4 ۔ عالمی ادارۂ صحت (W.H.O) کے سفارش کردہ معیاری نابیدگی کم کرنے والے مائع (ORS) کو حسب ذیل اشیاء کو ملا کر تیار کیا جاتا ہے ۔
1 ایک لیٹر صاف پانی
2 نصف چائے کا چمچہ کھانے کا نمک
3 نصف چائے کا چمچہ کھانے کا سوڈا
4 پاؤ چائے کا چمچہ نمک کا متبادل ( پوٹاشیم کلورائیڈ)
5 دو بڑے چمچے شکر
نوٹ : اس مائع کو صرف نابیدگی کی شکایت دور کرنے لئے استعمال کیا جانا چاہیئے ۔
اس میں چونکہ نمک کی خاصی بڑی مقدار موجود ہوتی ہے لہذا اس مائع کو محض کسی مائع کے ذریعہ کے طور پراستعمال میں نہیں لانا چاہئے ۔
بشکریہ روزنامہ : اعتماد
