حسان خان
لائبریرین
کھیل، ہاں اے نوعِ انساں، ان سیہ راتوں سے کھیل
آج اگر تو ظلمتوں میں پا بہ جولاں ہے تو کیا
مسکرانے کے لیے بے چین ہے صبحِ وطن
اور چندے ظلمتِ شامِ غریباں ہے تو کیا
چل چکی ہے پیشوائی کو نسیمِ باغِ مصر
آج یوسف مبتلائے چاہِ کنعاں ہے تو کیا
اب کھلا ہی چاہتا ہے پرچمِ بادِ مراد
آج ہستی کا سفینہ وقفِ طوفاں ہے تو کیا
اٹھنے والی ہے نگارِ صبحِ درماں کی نقاب
آخرِ شب زحمتِ درد فراواں ہے تو کیا
ختم ہو جائے گا کل یہ ناروا پست و بلند
آج ناہموار سطحِ بزمِ امکاں ہے تو کیا
کھل رہی ہے خندۂ گیتی کی زلفِ خم بہ خم
اِس کُرے پر آج دامِ چشمِ گریاں ہے تو کیا
آ گئیں دل سے تبسم کی شعاعیں تا بہ لب
اشکِ خوں آلود اگر عنوانِ مژگاں ہے تو کیا
کل اِسی موجِ نفس پر رقص فرمائے گا لحن
آج آہوں سے اگر یہ تار لرزاں ہے تو کیا
مٹھیوں میں بھر کے افشاں چل چکا ہے انقلاب
ابرِ غم، زلفِ جہاں پر بال جنباں ہے تو کیا
بلبلِ دانش، پر افشاں ہے چہکنے کے لیے
آج مرغِ وہم، ذہنوں میں غزلخواں ہے تو کیا
راہ میں ہے کارواں تشکیک اور تحقیق کا
آج اگر نادانئ تسلیم و ایقاں ہے تو کیا
ختم ہونے پر ہے تبلیغِ روایات و رسوم
آج اگر تفسیرِ حکمت، جرم و عصیاں ہے تو کیا
نصب ہونے ہی پہ ہے میزانِ دیدار و دلیل
حکمراں اِس وقت اگر بالغیب ایماں ہے تو کیا
کل عجائب خانہ ہوگا اور یہ پیرِ مُردہ سر
آج اگر منبر پہ شیخِ 'پاک داماں' ہے تو کیا
منزلیں طے کر چکا ہے آفتابِ فکرِ نو
آج اگر روحِ قدامت ظلمت افشاں ہے تو کیا
کل یہی 'بندہ' الوہیت سے ہوگا شادکام
آج اگر بہتانِ عبدیت پہ نازاں ہے تو کیا
ناز کی محراب میں جلنے پہ ہے شمعِ نیاز
بر سرِ جنگ آج اگر لیلائے دوراں ہے تو کیا
کل جواہر سے گراں ہوگی لہو کی بوند بوند
آج اپنا خون پانی سے بھی ارزاں ہے تو کیا
جانور کا جانور بھی کل نہ ہوگا مدعی
آج اگر انساں کا انساں، دشمنِ جاں ہے تو کیا
کھل رہا ہے وحدتِ اقوامِ عالم کا علم
آج انساں، منکرِ توحیدِ انساں ہے تو کیا
سایہ افگن ہے ہیُولیٰ، برقِ ایواں سوز کا
آج صرفِ باغِ سلطاں، خونِ دہقاں ہے تو کیا
آسماں کو روندنے والی ہے بالآخر زمیں
آسماں آج اس زمیں پر آتش افشاں ہے تو کیا
بن رہا ہے صرصر و سیلاب خونِ ہاشمی
آج ابوسفیان کے گھر میں چراغاں ہے تو کیا
آ رہی ہے آگ، لنکا کی طرف بڑھتی ہوئی
آج راون کا محل، سیتا کا زنداں ہے تو کیا
آ چکا ہے رونقِ فردا کا جنبش میں جلوس
آدمی کا خانۂ امروز ویراں ہے تو کیا
دستِ غم خواری میں ہوگی کل زمامِ آب و ناں
آج اگر نامہربانی میرِ ساماں ہے تو کیا
ہو رہا ہے طبع فرمانِ حیاتِ جاوداں
موت اگر اب تک رگِ جاں پر خراماں ہے تو کیا
سینۂ خیاطِ عالم میں ہے طرحِ رختِ نو
آج اگر سلمائے ہستی چاک داماں ہے تو کیا
جوش کے افکار کو مانے گی مستقبل کی روح
آج اگر رسوا یہ مردِ نامسلماں ہے تو کیا
(جوش ملیح آبادی)
