حبیب جالب نظم- شہرِ ظلمات کو ثبات نہیں: حبیب جالب

[محمد امین]

برگِ آوارہ سے لی گئی۔۔


شہرِ ظلمات کو ثبات نہیں

اے نظامِ کہن کے فرزندو!
اے شبِ تار کے جگر بندو!

یہ شبِ تار جاوداں تو نہیں،
یہ شبِ تار جانے والی ہے،
تا بکے تیرگی کے افسانے،
صبحِ نو مسکرانے والی ہے،

اے شبِ تار کے جگر گوشو!
اے سحر دشمنو، ستم کوشو!

صبح کا آفتاب چمکے گا،
ٹوٹ جائے گا جہل کا جادو،
پھیل جائے گی ان دیاروں میں،
علم و دانش کی روشنی ہر سو،

اے شبِ تار کے نگہبانو!
شمعِ عہدِ‌زیاں کے پروانو!
شہرِ ظلمات کے ثناء خوانو!
شہرِ ظلمات کو ثبات نہیں،
اور کچھ دیر صبح پر ہنس لو،
اور کچھ دیر۔۔۔۔۔۔ کوئی بات نہیں!!

 

[شاہ حسین]

بہت خوب انتخاب ہے ۔
شکریہ محمد امین صاحب ۔

 

[محمد امین]

نوازش بھائی

 

[محمد وارث]

کیا خوبصورت نظم ہے، بہت شکریہ امین پوسٹ کرنے کیلیے!

 

[محمد امین]

حوصلہ افزائی کے لیے تمام احباب کا مشکورہوں۔۔!

 

[کاشفی]

بہت خوب جناب۔۔اعلی انتخاب جناب۔۔