نظم ۔۔۔ پاگل پن ۔۔۔ ظہور نظر

[نوید صادق]

پاگل پن

میرا دایاں ہاتھ، بائیں ہاتھ کو
کاٹنے میں رات دن مصروف ہے
صحن سے دہلیز تک
خون کے دھبوں کی شطرنجی بچھی ہے، جس پہ موت
سینکڑوں چہرے بکھیرے ، زندگی کو مات دینے کے نشے میں مست ہے

روزنِ دیوار سے
آ رہی ہے میرے بدکردار ہمسائے کے ہنسنے کی صدا
آسماں پر دائرہ در دائرہ
چیختی چیلوں کا غول
منتظر ہے میرے بائیں ہاتھ کا
اور بایاں ہاتھ کٹ گرنے کو ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(ظہور نظر)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(اپریل 1971ء)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[کاشفی]

حقیقت پر مبنی۔۔۔۔۔۔۔۔۔ شکریہ بیحد شاملِ محفل کرنے کے لیئے۔۔۔۔

ویسے اگر غور کریں تو جس کو شاعر دایاں ہاتھ کہہ رہے ہیں وہ بایاں ہے ۔۔اور جس کو بایاں کہہ رہے ہیں۔۔۔وہ دایاں تھا۔۔۔۔ اور بدکردار ہمسائے تو ہیں ہی۔۔۔لیکن ہمسائے کے ہمسائیں دایاں اور بایاں بھی دونوں بدکردار ہیں کوئی کسی سے کم نہیں‌۔۔۔۔۔

ویسے شاعری بہت ہی زبردست ہے۔۔۔۔

 

[محمد وارث]

اور اس نظم کی تخلیق کے آٹھ ماہ بعد وہ ہاتھ کٹ ہی گیا آخر، افسوس۔

شکریہ نوید صاحب شیئر کرنے کیلیے!

 

[نایاب]

السلام علیکم
محترم نوید صادق بھائی ۔
بہت شکریہ
ظہورنظر جی " پاگل " ہی تھے کہ " گل کو پا چکے تھے "۔
دھائی دے رہے تھے لیکن کون سنتا ہے " دیوانوں " کی
" سب اچھا ہے " کی آواز گونج رہی تھی " فرزانوں " کی
نایاب

 

[شاہ حسین]

شکریہ جناب نوید صادق صاحب ۔
بہت خوب نظم ہے ۔

 

[ایم اے راجا]

بہت کوب، شکریہ نوید صاحب شیئر کرنے کے لیئے

 

[کاشفی]

یہ بھی پڑھیں دوستو۔۔۔

ماں تڑپتی رہی
مونگ دَلتے رہے اُس کے سینے پہ
اس کے ہی فرزند سب
پھر بھی خاموش سہتی رہی یہ زمیں
ایک ماں
اپنے بیٹوں کے سارے ستم۔۔!
نفرتوں کے قبیلوں کے پرچم تلے، تیغ و تلوار سے
اس کے اپنے ہی بیٹے بہاتے رہے
خون ایک دوسرے کا۔۔۔مگر یہ زمیں
اشک پیتی رہی، ضبط کرتی رہی
اپنے سینے میں‌ غم کا سمندر چھپاتی رہی
اور پھر ایک دن
پھوٹ کر روئی وہ اس طرح
اُس کے اشکوں کی طغیانیوں میں مکاں، شہر، سڑکیں
زمیں زاد فرزند غرقاب ہونے لگے۔۔۔۔!!!
میں‌بھی پروین ہوں ایک سنامی مگر
مجھ کو رونے کا کوئی سلیقہ نہیں
اپنے ہی شہر جاں کو بہا لے گئی۔۔۔۔!!!!

پروین ۔ وینی پیگ