فخرنوید
محفلین
اسلام آباد…وفاقی وزیر مذہبی امور حامد سعید کاظمی اسلام آباد میں ایک قاتلانہ حملے میں شدید زخمی ہوگئے ، حملہ آوروں کی فائرنگ سے وفاقی وزیر کا ڈرائیور جاں بحق اور محافظ شدید زخمی ہوگیا۔وفاقی وزیر مذہبی امور حامد سعید کاظمی آج دوپہر میلوڈی مارکیٹ ، جی سکس میں واقع اپنے دفتر سے سرکاری گاڑی میں روانہ ہوئے ہی تھے کہ ، سڑک پر قریب موجود ایک موٹر سائیکل پر سوار دو مسلح افراد نے ان پر اندھا دھند فائرنگ کردی ، ، ایک حملہ آور نے خود کار رائفل جبکہ دوسرے نے پستول سے فائرنگ کی اور بعد میں اسلحہ وہیں پھینک کر موٹر سائیکل پر فرار ہوگئے ۔ حملہ آوروں کی فائرنگ سے حامد سعید کاظمی کی ٹانگ میں گولیاں لگیں جبکہ ان کا ڈرائیور یونس متعدد گولیاں لگنے سے موقع پر دم توڑ گیا اور محافظ اشرف کو بھی تین گولیاں لگیں ، ، زخمی وفاقی وزیر اور ان کے محافظ کو فوری طور پر قریب ہی واقع پولی کلینک اسپتال پہنچایا گیا ،، اسپتال کے آپریشن تھیٹر میں حامد کاظمی کے گھٹنے میں لگنے والی گولیاں نکالنے کیلئے آپریشن کیا گیا ، ڈاکٹروں کے مطابق ان کی حالت خطرے سے باہر ہے ۔ وفاقی وزیر کے آفس اور ان پر حملے کے مقام سے تقریبا پچاس سے ساٹھ گز کے فاصلے پر تھانہ آب پارہ واقع ہے ،جبکہ اس علاقے میں سکیورٹی ناکہ بھی مستقل طور پر قائم رہتا ہے ۔ واقعہ کی اطلاع ملتے ہیں وفاقی وزرا ، پولیس اور انتظامیہ کے اعلی حکام فوری اسپتال پہنچے جہاں انہوں حامد سعید کاظمی کو دی جانے والی طبی امداد کی نگرانی کی جبکہ پولیس اور انٹیلی جنس اداروں کے حکام اور ماہرین جائے وقوعہ سے شواہد اکھٹے کرتے رہے ۔صدر آصف علی زرداری اور وزیر اعظم یوسف رضا گیلانی نے حامد سعید کاظمی پر حملے کی شدید مذمت کی ہے ۔
