جوش ولادتِ رسول

[حسان خان]

(یہ نظم حیدرآباد (دکن) کی ایک محفلِ میلاد کے لیے نہایت عجلت میں عین وقت پر کہی گئی تھی)​

​

اے مسلمانو! مبارک ہو نویدِ فتحِ باب​

لو وہ نازل ہو رہی ہے چرخ سے ام الکتاب​

وہ اٹھے تاریکیوں کے بامِ گردوں سے حجاب​

وہ عرب کے مطلعِ روشن سے ابھرا آفتاب​

گم ضیائے صبح میں شب کا اندھیرا ہو گیا​

وہ کلی چٹکی، کرن پھوٹی، سویرا ہو گیا​

​

زلف کا پیغام پھر بادِ صبا دینے لگی​

پھر زبانِ گل صدائے مرحبا دینے لگی​

شہپرِ جبریل کی جنبش ہوا دینے لگی​

صبح لہرا کر چلی، شب راستا دینے لگی​

مہر کا زریں سفینہ آسماں کھینے لگا​

چرخ پر دریائے نور انگڑائیاں لینے لگا​

​

خسروئے خاور نے پہنچا دیں شعائیں دور دور​

دل کھلے، شاخیں ہلیں، شبنم اڑی، چھایا سرور​

آسماں روشن ہوا، کانپی زمیں پر موجِ نور​

پو پھٹی، دریا بہے، سنکی ہوا، چہکے طیور​

نورِ حق فاران کی چوٹی کو جھلکانے لگا​

دلبری سے پرچمِ اسلام لہرانے لگا​

​

گرد بیٹھی کفر کی، اٹھی رسالت کی نگاہ​

گر گئے طاقوں سے بت، خم ہو گئی پشتِ گناہ​

چرخ سے آنے لگی پیہم صدائے لا الہ​

ناز سے کج ہو گئی آدم کے ماتھے پر کلاہ​

آتے ہی ساقی کے، ساغر آ گیا، خم آ گیا​

رحمتِ یزداں کے ہونٹوں پر تبسم آ گیا​

​

آ گیا، جس کا نہیں ہے کوئی ثانی، وہ رسول​

روحِ فطرت پر ہے جس کی حکمرانی وہ رسول​

جس کا ہر تیور ہے حکمِ آسمانی، وہ رسول​

موت کو جس نے بنایا زندگانی وہ رسول​

محفلِ سفاکی و وحشت کو برہم کر دیا​

جس نے خون آشام تلواروں کو مرہم کر دیا​

​

فقر کو جس کے تھی حاصل کج کلاہی، وہ رسول​

گلہ بانوں کو عطا کی جس نے شاہی، وہ رسول​

زندگی بھر جو رہا بن کر سپاہی، وہ رسول​

جس کی ہر اک سانس قانونِ الٰہی، وہ رسول​

جس نے قلبِ تیرگی سے نور پیدا کر دیا​

جس کی جاں بخشی نے مردوں کو مسیحا کر دیا​

​

واہ کیا کہنا ترا اے آخری پیغامبر​

حشر تک طالع رہے گی تیرے جلوؤں کی سحر​

تو نے ثابت کر دیا، اے ہادیِ نوعِ بشر​

مرد یوں مہریں لگاتے ہیں جبینِ وقت پر​

کروٹیں دنیا کی تیرا قصر ڈھا سکتی نہیں​

آندھیاں تیرے چراغوں کو بجھا سکتی نہیں​

​

تیری پنہاں قوتوں سے آج بھی دنیا ہے دنگ​

کس طرح تو نے مٹایا امتیازِ نسل و رنگ​

ڈال دی تو نے بنائے ارتباطِ جام و سنگ​

بن گیا دنیا میں 'تخئیلِ اخوت' ذوقِ جنگ​

تیرگی کو روکشِ مہرِ درخشاں کر دیا​

تو نے جس کانٹے کو چمکایا گلستاں کر دیا​

​

یہ مسرت کا محل ہے، اے عزیزِ کامگار!​

تلخیِ گفتار، اس موقع پہ ہوگی ناگوار​

قہر ہے بزمِ طرف میں نالۂ جانِ فگار​

لیکن اس کو کیا کروں دل پر نہیں ہے اختیار​

آگ سی روشن ہے اک قلب و جگر کے سامنے​

لے کہے دیتا ہوں جو کچھ ہے نظر کے سامنے​

​

اس ترے انبوہ میں اے مسلمِ اندوہگیں!​

دیر سے موجود ہیں خود رحمۃ اللعالمیں​

زیرِ لب فرما رہے ہیں وائے بر جانِ حزیں​

کوئی بھی اتنوں میں میرا چاہنے والا نہیں​

ذکرِ دیں ہونٹوں پہ ہے، دنیا کی گھاتیں دل میں ہیں​

صبحیں چہروں پر ہیں طالع، اور راتیں دل میں ہے​

​

اے مرے معبود! انہیں محسوس ہو سکتا یہ کاش​

شدتِ درماندگی سے، کتنے دل ہیں پاش پاش​

آہ کتنوں کو ہے اک روٹی کے ٹکڑے کی تلاش​

کتنے معصوموں کے چہروں پر ہے اشکوں سے خراش​

شمع کی حاجت نہیں ہے محفلوں کے واسطے​

کچھ چراغوں کی ضرورت ہے دلوں کے واسطے​

​

کاش، میرے امتی قرآں کا دفتر دیکھتے​

سیرتِ مقداد و سلمان و ابوذر دیکھتے​

قصۂ حسنین سنتے، ضربِ حیدر دیکھتے​

کس طرح مرتے نہیں، یہ بات مر کر دیکھتے​

کاش ان کی عقل میں آتا یہ آسانی کے ساتھ​

نعمتِ کونین کا رشتہ ہے قربانی کے ساتھ​

​

علم سے ناآشنا محکوم، حاکم سرد و خام​

روز و شب آویزشیں ہیں، درمیانِ خاص و عام​

ضابطہ جینے کا ہے، ان میں، نہ مرنے کا نظام​

حیف تیری چپقلش پر اے گروہِ بے امام​

جادہ ہے پرپیچ، منزل کا نشاں، کوئی نہیں​

کارواں ہے، اور میرِ کارواں کوئی نہیں​

​

(جوش ملیح آبادی)​

 

[سید زبیر]

سبحان اللہ ۔ ۔ بہت خوب
کاش، میرے امتی قرآں کا دفتر دیکھتے
سیرتِ مقداد و سلمان و ابوذر دیکھتے
قصۂ حسنین سنتے، ضربِ حیدر دیکھتے
کس طرح مرتے نہیں، یہ بات مر کر دیکھتے
جزاک اللہ

 

[نایاب]

سبحان اللہ
کیا ہی خوبصورت نصیحت آموز انتخاب ہے