قرۃالعین اعوان
لائبریرین
وہ جو رموزِ عشق ہیں کون سمجھ سکا کہ یوں
ناخنِ عقل سے کبھی عقدہ نہیں کھلا کہ یوں
مانا کہ مصلحت تھی کچھ تم نے اگر کہا کہ یوں
وقت کرے گا فیصلہ یوں تھا درست یا کہ یوں
اپنی خطا ہے بس یہی ہم نے منافقت نہ کی
جو بھی ہمارے دل میں تھا کہہ دیا برملا کہ یوں
تو نے لوح فکر سے ماضی کھرچ دیا تمام
میں بھی تجھے بھلا سکوں کوئی عمل بتا کہ یوں
میں نے کہا کہ بن ترے کیسے کٹے گی زندگی
جلتے ہوئے چراغ کو اس نے بجھا دیا کہ یوں
پرسشِ حال دل پہ جب ہم نہ جواب دے سکے
چہرہ زبان بن گیا سب نے سمجھ لیا کہ یوں
تم پہ کیا جو اعتماد اپنا یہی قصور تھا
اس سے زیادہ اور اب تم سے کہیں تو کیا کہ یوں
شرحِ نشاطِ وصل پہ دونوں کا کھل گیا بھرم
میں نے اسے کہا کہ یوں اس نے مجھے کہا کہ یوں
پہلے نہ ہم سمجھ سکے لوگ بنے تھے دوست کیوں
وقت وہ جب گزر گیا پھر یہ پتا چلا کہ یوں
جاننا چاہتے تھے ہم' لوگوں کی وجہِ بے حسی
خود ہی جواب مل گیا دیکھا کہ آئینہ کہ یوں
زعمِ خدائی تھا جنہیں ان کو کیا تھا غرقِ آب
آج کے ظالموں کا بھی حشر ہمیں دکھا کہ یوں
