وہ ہنسنے کو تو ہنس رہا ہوئے گا ۔ چوہدری محمد علی مضطرؔ

[فاتح]

وہ ہنسنے کو تو ہنس رہا ہوئے گا
مگر حال اس کا برا ہوئے گا

مرا اس سے جو فاصلہ ہوئے گا
مجھے بھی نہ اس کا پتا ہوئے گا

وہ لمحہ جو امسال رک کر ملا
خدا جانے کب کا چلا ہوئے گا

جسے میرے ایماں کا بھی علم ہے
وہ جھوٹا نہیں تو خدا ہوئے گا

جمائی ہے سرخی جو اخبار نے
سنا اس کو، تیرا بھلا ہوئے گا

وہ آئے گا اخبار اوڑھے ہوئے
عجب کاغذی سلسلہ ہوئے گا

بھری بزم میں مسکرانے لگا
بڑا ہی کوئی من چلا ہوئے گا

وہ چپ ہو گیا عمر بھر کے لیے
اسے کچھ تو میں نے کہا ہوئے گا

خبر جس میں چھاپی گئی تھی مری
وہ اخبار اب بک گیا ہوئے گا

اٹھا لیجیے آپ بھی سنگِ صوت
جلوس اب قریب آ گیا ہوئے گا

ابھی سے ہے مضطرؔ تمھارا یہ حال
وہ جانے لگے گا تو کیا ہوئے گا

(چوہدری محمد علی مضطرؔ )
​

 

[کاشفی]

عمدہ جناب!

 

[محسن حجازی]

جسے میرے ایماں کا بھی علم ہے
وہ جھوٹا نہیں تو خدا ہوئے گا

کیا کہنے فاتح بھائی آج کل آپ بہت بارودی مواد پڑھ رہے ہیں تباہ کن۔ سبحان اللہ۔ یہ کتاب کہاں سے ہاتھ لگی اور ہے کونسی؟