پسندیدہ غزل

[سارہ خان]

جو آنسو دل میں گرتے ہیں وہ آنکھوں میں نہیں رہتے
بہت سے حرف ایسے ہیں جو لفظوں میں نہیں رہتے


کتابوں میں لکھے جاتے ہیں دُنیا بھر کے افسانے
مگر جن میں حقیقت ہو کتابوں میں نہیں رہتے


بہار آئے تو ہر اک پُھول پر اک ساتھ آتی ہے
ہوا جن کا مقدّر ہو وہ شاخوں میں نہیں رہتے


مہک اور تتلیوں کا نام بھو نرے سے جُدا کیوں ہے
کہ یہ بھی تو خزاں آنے پہ پُھو لوں میں نہیں رہتے

(امجد اسلام امجد)

 

[عمر سیف]

دشمنوں سے دوستی، غیروں سے یاری چاہیے
خاک کے پُتلے بنے تو خاکساری چاہیے

جن کو حُسن و عشق کے دعوٰے ہیں ان کے واسطے
دل ہمارا چاہیے اور صورت تمھاری چاہیے

چار حرفِ آرزو ہیں، سُن لے ساری رات میں
اور قصےکے لیے تو عُمر ساری چاہیے

اے فلک مٹ کر ہی کچھ رہ جائیں ہم انجام کار
اس مرقع میں کوئی صورت ہماری چاہیے

مل گیا ہم کو وفا و عشقِ اُلفت کا صلہ
بندہ پرور آپ کی بس یادگاری چاہیے

دِل پہ گر قابو نہیں اے داغ تو ہے جانے خدا
عاشقوں کے واسطے تو بےاختیاری چاہیے​

[align=left:7c2b916bbd]"داغ دہلوی "[/align:7c2b916bbd]

 

[حجاب]

اداس راتیں ہیں خواب سارے اُجڑ چکے ہیں
ہے آنکھ ویراں کہ سب نظارے اُجڑ چکے ہیں

مری زمیں پہ گُلوں کے چہرے جھلس گئے ہیں
مرے فلک کے وہ چاند تارے اُجڑ چکے ہیں

جو میرے آنسو شمار کرتے جو پیار کرتے
وفا کے پیکر سبھی سہارے اُجڑ چکے ہیں

اب آنکھ دریا میں کوئی طوفان نہیں اُٹھے گا
مری نگاہوں کے سب کنارے اُجڑ چکے ہیں

تمہاری شوخی گئے دنوں کا حساب مانگے
تمہیں خبر ہے کہ غم کے مارے اُجڑ چکے ہیں

جو بھید سینوں میں تھے کبھی بے اماں ہوئے ہیں
جو راز ہونٹوں پہ تھے ہمارے اُجڑ چکے ہیں

یہ وقت بھی کھا گیا ہے کتنی محبتوں کو
قمر جواں تھے جو یار سارے اُجڑ چکے ہیں۔
سیّد ارشاد قمر
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪​

 

[عیشل]

اچھی غزل ہے حجاب

 

[حجاب]

شکریہ عیشل ۔


ترے کنول ، مرے گلاب سب دھوئیں میں کھو گئے
محبتوں کے تھے جو باب، سب دھوئیں میں کھو گئے

ہوائے ہجر نے بجھا دیئے ترے چراغ سب
مرے نجوم و ماہتاب سب دھوئیں میں کھو گئے

مری دعائیں ، التجائیں سب ہوا میں اُڑ گئیں
ترے حروف باریاب سب دھوئیں میں کھو گئے

تہوں سے دل کی شعلہء فراق اس طرح اُٹھا
کہ اس کے بعد اپنے خواب سب دھوئیں میں کھو گئے

جلا رہے تھے کاغذی گھروں میں موم بتّیاں
ہوا نے کھائے پیچ و تاب سب دھوئیں میں کھو گئے

ہوئیں جو نذرِ آتشِ جنوں تمام راحتیں
مرا قلم تری کتاب سب دھوئیں‌ میں کھو گئے

وہ گھر تو خواب گاہ کے چراغ نے جلا دیا
کہاں کی نیند ، کیسے خواب سب دھوئیں میں کھو گئے۔
(اعتبار ساجد )
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪

 

[نوید صادق]

رات کیا کیا مجھے ملال نہ تھا
خواب کا تو کہیں خیال نہ تھا

آج کیا جانے کیا ہوا ہم کو
کل تک ایسا تو جی کا حال نہ تھا

سن کے بولا تمام قصہ قیس
عشق کا اُس کو بھی کمال نہ تھا

ٹک نہ ٹھیرا وہ میرے پاس آ کر
کچھ تماشا تھا یہ وصال نہ تھا

بولے سب دیکھ میری جاں کاوی
یہ تو فرہاد کا بھی حال نہ تھا

شاعر: قلندر بخش جرات

 

[فرحت کیانی]

[align=justify:d10d9f114b]آنسوؤں کے قطرے قطرے میں بکھر کر دیکھنا
درد کی موجوں کے ساحل پہ اتر کر دیکھنا

دیکھنا آنکھوں کی وحشت رات کے پچھلے پہر
ہجر کی صدیوں کے صحرا سے گزر کر دیکھنا

شام کا تنہا اکیلے چاند ستاروں سے ملاپ
اور ہماری آنکھ کا شب بھر ٹھہر کر دیکھنا

فرق ہے اک دیکھنے میں، تم تھے ساحل پر کھڑے
اور ہمارا ڈوبتے لمحے ابھر کر دیکھنا!!!

تُو بھی تو سرہانے کھڑا دیکھے گا چُپ گھنٹوں ہمیں
سو ، ہمارا شوق ہے اِک بار مر کر دیکھنا!!!!

۔۔۔۔۔نامعلوم[/align:d10d9f114b]

فرحت سسٹر آپ کا انتخاب ہر دفعہ لا جواب ہوتا ہے ۔۔۔

بہت شکریہ سارہ
خوش رہیے ڈھیر سارا

 

[فرحت کیانی]

[align=justify:d4bfa07442]مجھے دریا نہیں لکھنا، مجھے صحرا نہیں لکھنا
تسلسل سے سفر میں ہوں، مجھے ٹھہرا نہیں لکھنا

پرانے رابطوں کی راکھ ابھی تک دل میں باقی ہے
میری جلتی ہتھیلی پر نیا وعدہ نہیں لکھنا

اَنا سے جیت کر اس کو اگر جو میں نے کھویا ہے
میرا نوحہ نہیں لکھنا، میرا نغمہ نہیں لکھنا

بساطِ زندگی کی آخری سرحد پہ کھڑا ہوں
مجھے فاتح نہیں لکھنا، مجھے مہرہ نہیں لکھنا

تمھاری آنکھ میں گر میں کبھی چُپ چاپ جل جاؤں
تم اپنی آنکھوں میں لیکن میرا صدمہ نہیں لکھنا[/align:d4bfa07442]

 

[عمر سیف]

بہت خوب فرحت۔

ہر اک جانب اداسی ہے
ابھی سوچیں تو کیا سوچیں؟

ہر اک سو، ہو کا عالم ہے
ابھی بولیں تو کیا بولیں؟

ہر اک انسان پتھر ہے
ابھی دھڑکیں تو کیا دھڑکیں؟

فضا پر نیند طاری ہے
ابھی جاگیں تو کیا جاگیں؟

ہر اک مقتل کی شہِ رگ میں
لہو کی لہر جاری ہے

ابھی دیکھیں تو کیا دیکھیں؟
ہر اک انسان کا سایہ

ابھی مٹی پہ بھاری ہے
ابھی لکھیں تو کیا لکھیں؟
​

[align=left:089b67914d]محسن نقوی[/align:089b67914d]

 

[عیشل]

آجا کہ انتظار ِ نظر ہیں کبھی سے ہم
مایوس ہو نہ جائیں کہیں زندگی سے ہم

اے عکسِ زلفِ یار ہمیں تو پناہ دے
گھبرا کے آگئے ہیں بڑی روشنی سے ہم

برسوں رہی ہے جن سے رہ و رسمِ دوستی
انکی نظر میں آج ہوئے اجنبی سے ہم

اس رونق ِ بہار کی محفل میں بیٹھ کر
کھاتے رہے فریب بڑی سادگی سے ہم

(ساغر صدیقی)

 

[محمد وارث]

ہر قدم مرحلہء دار و صلیب آج بھی ہے
جو کبھی تھا، وہی انساں کا نصیب آج بھی ہے

جگمگاتے ہیں افق پر تو ستارے لیکن
راستہ منزلِ ہستی کا مہیب آج بھی ہے

سرِ مقتل جنہیں جانا تھا وہ جا بھی پہنچے
سرِ منزل کوئی محتاط خطیب آج بھی ہے

یہ تری یاد ہے یا میری اذیت کوشی
ایک نشتر سا رگِ جاں کے قریب آج بھی ہے

کون جانے یہ ترا شاعرِ آشفتہ مزاج
کتنے مغرور خداؤں کا رقیب آج بھی ہے

ساحر لدھیانوی

 

[حجاب]

تجھ سے ابتداء ہے ، تو ہی ایک دن انتہا ہوگا
صدائے ساز ہوگی اور نہ سازِ بے صدا ہوگا

ہمیں معلوم ہے ہم سے سنو محشر میں کیا ہوگا
سب اُس کو دیکھتے ہوں ، وہ ہم کو دیکھتا ہوگا

سرِ محشر ہم ایسے عاصیوں کا اور کیا ہوگا
درِ جنت نہ وا ہوگا ، درِ رحمت نہ وا ہوگا

جہنم ہو کہ جنت جو بھی ہوگا فیصلہ ہوگا
یہ کیا کم ہے ہمارا اور اُس کا سامنا ہوگا

یہ مانا بھیج دے گا ہم کو محشر سے جہنم میں
مگر جو دل پہ گزرے گی وہ دل ہی جانتا ہوگا

جگر کا ہاتھ ہوگا حشر میں اور دامنِ حضرت
شکایت ہو کہ شکوہ ہو جو بھی ہوگا برملا ہوگا۔
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪

 

[سارہ خان]

اچھی غزل ہے ۔۔ بہت خوب ۔۔

 

[عمر سیف]

بہت خوب حجاب۔

 

[محمد وارث]

سَہل یوں راہِ زندگی کی ہے
ہر قدم ہم نے عاشقی کی ہے

ہم نے دل میں سجا لیے گلشن
جب بہاروں نے بے رخی کی ہے

زہر سے دھولیے ہیں ہونٹ اپنے
لطفِ ساقی نے جب کمی کی ہے

تیرے کوچے میں بادشاہی کی
جب سے نکلے گداگری کی ہے

بس وہی سرخ رُو ہوا جس نے
بحرِ خوں میں شناوری کی ہے

جو گزرتے تھے داغ پر صدمے
اب وہی کیفیت سبھی کی ہے

(فیض)

 

[نوید صادق]

موسم کی طرح رنگ بدلتا بھی بہت ہے
ہم زاد مرا قلب کا سادہ بھی بہت ہے

نفرت بھی محبت کی طرح کرتا ہے مجھ سے
وہ پیار بھی کرتا ہے رُلاتا بھی بہت ہے

وہ شخص بچھڑتا ہے تو برسوں نہیں ملتا
ملتا ہے تو پھر ٹوٹ کے ملتا بھی بہت ہے

خوشحال ہے مزدور بہت عہد رواں کا
ماتھے پہ مگر اس کے پسینہ بھی بہت ہے

برسا ہے سر دشت طلب ابر بھی کھل کر
سناٹا مری روح میں گونجا بھی بہت ہے

تم یوں ہی شریک غم ہستی نہیں ٹھہرے
سچ بات تو یہ ہے تمہیں چاہا بھی بہت ہے

اُٹھتی ہی نہیں آنکھ حیا سے کبھی اُوپر
دوپٹہ مگر سر سے ڈھلکتا بھی بہت ہے

ہر دُکھ کو تبسم میں اُڑا دیتا ہے احمد
بچوں کی طرح پھوٹ کے روتا بھی بہت ہے

شاعر: سید آلِ احمد

 

[عیشل]

دنیا کرے سوال تو ہم کیا جواب دیں
تم کون ہو خیال؟تو ہم کیا جواب دیں
پوچھے کوئی کہ دل کو کہاں چھوڑ آئے ہو
کس سے بھلا رشتہ ءجاں جوڑ آئے ہو
مشکل ہو عرض ِ حال تو ہم کیا جواب دیں
پوچھے کوئی کہ درد ِ وفا کون دے گیا
کہنے سے ہو ملال تو ہم کیا جواب دیں

 

[qaral]

آپ کی پسندیدہ غزل

اس دھاگے میں اپنی پسندیدہ غزل شئیر کریں اور اگر کوئی واقعہ جس نے آپ کے زندگی میں اس غزل کو خاص بنادیاہواگر آپ چاہیں تو شیئر کو سکتے ہیں

 

[qaral]

انشا جی اٹھو اب کوچ کرو اس شہر میں جی کا لگانا کیا

وحشی کوسکوں سے کیا مطلب جوگی کا نگر میں ٹھکانا کیا

پھر ہجر کی لمبی رات یہاں سنجوگ کی تو بس اک گھڑی

جو دل میں ہے لب پر آنے دو شرمانا کیا گھبرانا کیا

اس دل کے دریدہ دامن میں دیکھو تو سہی سوچو تو سہی

جس جھولی میں سو چھید ہوئے اس جھولی کا پھیلانا کیا

شب گزری چاند بھی ڈوب گیا زنجیر پڑی دروازے پر

کیوں دیر گئے گھر آئے ہو سجنی سے کرو گے بہانہ کیا

رہتے ہو جو ہم سے دور بہت مجبور ہو تم مجبور بہت

ہم سمجھوں کا سمجھانا کیا ہم بہلوں کا بہلانا کیا

جب شہر کے لوگ نہ رستہ دیں کیوں بن میں نہ جا بسرام کریں

دیوانوں کی سی نہ بات کرے تو اور کرے دیوانہ کیا

 

[qaral]

سلسلے توڑ گیا وہ سبھی جاتے جاتے

ورنہ اتنے تو مراسم تھے کے آتے جاتے

شکوہ ظلمت شب سے تو کہیں بہتر تھا

اپنے حصے کی کوئے شمع جلاتے جاتے

کتنا آساں تھا ترے ہجر میں مرنا جاناں

پھر بھی اک عمر لگی جاں سے جاتے جاتے

جشن مقتل ہی نہ برپا ہوا ورنہ ہم بھی

پابجولاں ہی سہی ناچتے گاتے جاتے

اس کی وہ جانے کہ اسے پاسں وفا تھا کہ نہ تھا

تم فراز اپنی طرف سے تو نبھاتے جاتے