لیاقت علی عاصم پھرے دشت دشت شاید در و بام کی اُداسی ۔۔۔۔ لیاقت علی عاصم

[محمداحمد]

غزل

پھرے دشت دشت شاید در و بام کی اُداسی
مرے بعد کیا کرے گی مرے نام کی اُداسی

مرے ہم سفر تھے کیا کیا، میں کسی کو اب کہوں کیا
کوئی دھوپ دوپہر کی، کوئی شام کی اُداسی

کہیں اور کا ستارہ مری آنکھ پر اُتارا
مجھے آسماں نے دی ہے بڑے کام کی اُداسی

مجھے یاد آرہی ہے وہ سفر کی خوش گواری
مرا دل دکھا رہی ہے یہ قیام کی اُداسی

وہ غزال رنگ آنکھیں جو پلٹ گئیں تو دیکھا
ہوئی اک نظر میں اوجھل کئی گام کی اُداسی

یہ شفق شراب منظر مری آنکھ کا تخیل
مری بیکسی کی کاوش سرِ شام کی اُداسی

وہی میکدہ ہے عاصم وہی انتظارِ ساقی
وہی گوشہ ء تمنا وہی جام کی اُداسی

لیاقت علی عاصم کی "نشیبِ شہر" سے انتخاب ​

 

[محمد وارث]

شکریہ احمد صاحب شیئر کرنے کیلیئے، بہت خوبصورت غزل ہے، لا جواب!

 

[ملائکہ]

واقعی بہت اچھی غزل ہے،واہ

 

[محمداحمد]

بہت نوازش! وارث صاحب اور ملائکہ صاحبہ

 

[ایم اے راجا]

واہ واہ، دروبام کی اداسی، لاجواب انتخاب، بہت شکریہ احمد بھائی۔

 

[مغزل]

بہت خوب احمد ۔۔ماشااللہ
یہ سعادت مندی تمھیں ایک دن بہت آگے لیکر جائے گی۔
سلامت رہو دوست،۔

 

[محمداحمد]

واہ واہ، دروبام کی اداسی، لاجواب انتخاب، بہت شکریہ احمد بھائی۔

بڑی نوازش راجا بھیا!