پہلی کوشش، اصلاح کی منتظر

[شاہ رخ امام]

کھڑا ہوں آج اپنے پورے قد سے
میں اب ڈرتا نہیں اقبال و رد سے

مگر اک غم جو کھائے جارہا ہے
میں تنہا ہوگیا تیری رسد سے

تیرا چہرہ کتابی پھول آنکھیں
جلا مہتاب بھی تیرے حسد سے

ہوئے ہیں عشق میں برباد دونوں
لڑائی ٹھن گئی روح کی جسد سے

میری پہلی غزل تیرے حوالے
بھلے کیڑے نکالو شد و مد سے​

 

[کاشف اسرار احمد]

ٹیگ کر دیں جیسے الف عین سر

 

[محمد وارث]

خوب غزل ہے۔

"روح" کی ح گرانا مناسب نہیں ہے۔

 

[آوازِ دوست]

سبحان اللہ !!!! جناب بہت خوب اور آخری مصرعہ سے تو گویا ایک میزائل شیلڈ کھڑی کر دی آپ نے

 

[محمد تابش صدیقی]

خوب. اچھی کاوش ہے.
تیسرے شعر کے پہلے مصرع میں "تیرا"کو "ترا" کر دیں.
اسی طرح آخری شعر کے پہلے مصرع میں بھی " میری" کو "مری" کر دیں.

 

[شاہ رخ امام]

محمد وارث آوازِ دوست محمد تابش صدیقی
آپ صاحبان نظرنے میری پہلی کوشش کو سراہا اور اصلاح فرمائی میں آپ تمام احباب کا تہہ دل سے مشکور ہوں۔

خوب غزل ہے۔

"روح" کی ح گرانا مناسب نہیں ہے۔

جناب میں آپ کی بات کا مطلب نہیں سمجھ سکا ۔ اگر آپ تھوڑی تفصیل بیان کردیں تو مجھ کم فہم کیلئے آسانی ہوجائے گی۔

 

[محمد وارث]

محمد وارث آوازِ دوست محمد تابش صدیقی
آپ صاحبان نظرنے میری پہلی کوشش کو سراہا اور اصلاح فرمائی میں آپ تمام احباب کا تہہ دل سے مشکور ہوں۔
جناب میں آپ کی بات کا مطلب نہیں سمجھ سکا ۔ اگر آپ تھوڑی تفصیل بیان کردیں تو مجھ کم فہم کیلئے آسانی ہوجائے گی۔

لڑائی ٹھن گئی روح کی جسد سے
اس مصرعے میں روح بوزنِ فاع، جو کے اس لفظ کا صحیح وزن ہے، استعمال کرنے سے مصرعہ بے وزن ہو جاتا ہے لیکن اگر روح کی ح گرا دیں اور اسے رُو بوزنِ فع پڑھیں تو مصرع درست رہتا ہے، یعنی مصرع تو موزوں رہتا ہے لیکن ح گرانے کے بعد جو کہ اس لفظ کے لیے درست نہیں ہے۔

 

[Mehmal]

ماشااللہ بھائی اچھی کوشش ہے

 

[شاہ رخ امام]

ماشااللہ بھائی اچھی کوشش ہے

شکریہ بہن

 

[شاہ رخ امام]

لڑائی ٹھن گئی روح کی جسد سے
اس مصرعے میں روح بوزنِ فاع، جو کے اس لفظ کا صحیح وزن ہے، استعمال کرنے سے مصرعہ بے وزن ہو جاتا ہے لیکن اگر روح کی ح گرا دیں اور اسے رُو بوزنِ فع پڑھیں تو مصرع درست رہتا ہے، یعنی مصرع تو موزوں رہتا ہے لیکن ح گرانے کے بعد جو کہ اس لفظ کے لیے درست نہیں ہے۔

محمد وارث بھائی پھر اس مشکل کا حل کیا ہے؟ کوئی متبادل لفظ ارشاد فرمائیں۔

 

[محمد وارث]

محمد وارث بھائی پھر اس مشکل کا حل کیا ہے؟ کوئی متبادل لفظ ارشاد فرمائیں۔

روح کے مترادف تو آپ کو خود ڈھونڈنے ہونگے، ایک جاں ہے وغیرہ وغیرہ۔

 

[محمد تابش صدیقی]

محمد وارث بھائی پھر اس مشکل کا حل کیا ہے؟ کوئی متبادل لفظ ارشاد فرمائیں۔

اگر مصرع یوں ہو جائے تو؟
لڑائی روح کی ٹھن گئی جسد سے

 

[محمد ریحان قریشی]

اگر مصرع یوں ہو جائے تو؟
لڑائی روح کی ٹھن گئی جسد سے

گئی کے دو حرفی باندھے جانے کی سند درکار ہوگی۔

 

[منصور محبوب چوہدری]

خوب ہے غزل ۔ شاید ایسے بہتر ہو

ہوا میں عشق میں برباد ایسا
کہ اب تو روح لڑتی ہے جسد سے

 

[الف عین]

روح پر تو بات ہو ہی رہی ہے۔ لیکن مجھے مطلع کا ’اقبال و رد‘ پسند نہیں آیا۔ محاورہ تو رد و قبول ہوتا ہے۔ جو دونوں فعل کی شکل میں ہیں۔ لیکن اقبال اس سے مشتق اسم کی شکل میں۔ رد تو دونوں شکلوں میں رد ہی ہوتا ہے۔