مہ جبین
محفلین
پہلے زبانِ شوق سے حمدِ خدا کروں
پھر ابتدائے مدحتِ خیر الورا کروں
یارب مِرے سخن کو وہ حسنِ کمال دے
فرضِ ثنا نماز کی صورت ادا کروں
ہر گفتگو کا محور و مرکز حضور ہیں
آئے اُنہیں کا ذکر ، کوئی تذکرہ کروں
چوموں قدم قدم پہ زمینِ حجاز کو
روشن قدم قدم پہ چراغِ وفا کروں
یارائے خامشی ہے نہ توفیقِ گفتگو
عرضِ نیاز عشق کی تدبیر کیا کروں
ہوجاؤں پہلے خاکِ رہِ منزلِ حجاز
پھر عاجزی سے منّتِ موجِ ہوا کروں
طیبہ کی راہ میں ہمہ تن گوش ہوں ایاز
اِذنِ سفر ملے تو سفر ابتدا کروں
ایاز صدیقی
