چاہ ۔۔ ( عاجز ملک حبیب )

[غدیر زھرا]

چاہ

چاہ درویش دی پی لے یارا پی درویش دے پارو
چاہ درویش دی مِلدی ناہیں قیمت نال بازارو

جیہڑی چاہ درویش پکاون وِچ بازار نہ مِلدی
وِچ دِل دے اوہ چاہ پکاون آتش صاحبِ دِل دی

پَتّی عِشق اَزل دی پاون مِٹھا حُب نبی دا
دُدھ فِطرت دا چاہ وِچ پاون بالن نطر ولی دا

ایہہ چاہ یُوسف کُھوہ وِچ پِیتی وِکیا بَن کے بردا
فِر چاہ قید مِصر وِچ پِیتی مِلیا تخت مِصر دا

مُوسٰی نے چاہ طُور تے پِیتی ہوش گیا اُڈ سارا
اِبراھیم نُوں چاہ توں مِلیا آتش وِچ نظارا

اِسماعیل نے ہیٹھ چُھری دے رَج رَج چاہ نُوں پِیتا
یُونس پیٹ مچھی وِچ جا کے یار نوں راضی کِیتا

ایہہ چاہ جدوں بِلال نے پِیتی ایسا رنگ چَڑھایا
بانگ نہ پَڑھی بِلال جدوں تک سورج نظر نہ آیا

چاہ عِشق دی قرنی کولوں بَتری دند کَڈھائے
کئی چاہ پِیندے سُولی چَڑھ گئے مُڑ وی باز نہ آئے

چاہ عِشق دی صابر کولوں اِتنا صبر کرایا
تَن وِچ کِیڑے پے گئے تاں بھی چاہ وِچ فرق نہ آیا

چاہ عِشق دی بُلھے شاہ نُوں کنجری بَنڑ نَچایا
تَھیہ تَھیہ کر کے نَچیا تاں اُس یار منایا

چاہ عِشق دی مُرشد پِوائی جام نظر دے نالوں
سب چاہواں دا ذائقہ بُھلیا مست ہویا میں حالوں

پَر جیہڑی چاہ حُسین علی دے وِچ کربل دے پِیتی
پِیندے رہ گئے پِیندے رہسن ایہو جیہی کِسے نئیں پِیتی

حبیب چاہ عِشق دی سانوں مست بے خود بنایا
جِند کُملائی یار اَساڈی درداں انت مَچایا

 

[نایاب]

بہت خوب کلام
بہت دعائیں بہنا میری

 

[شمشاد]

لاجواب کلام اے جی

کدی اے جئی چاہ اساں نوں وی نصیب ہووے۔

 

[غدیر زھرا]

بہت خوب کلام
بہت دعائیں بہنا میری

تشکر بھیا

 

[تلمیذ]

بہت اعلی۔ چأ تے چاہ دا ورتاوا شعراں وچ ڈاہڈے سوہنے چج نال کیتا اے، ملک حبیب ہوراں۔

شراکت لئی شکریہ!

 

[غدیر زھرا]

بہت اعلی۔ چأ تے چاہ دا ورتاوا شعراں وچ ڈاہڈے سوہنے چج نال کیتا اے، ملک حبیب ہوراں۔

شراکت لئی شکریہ!