چل اے دل- رئیس امروہی

[فرحت کیانی]

چل اے دل
چل اے دل!سوئے شہرِ جانانہ چل
بصد شب رَوی ہائے مستانہ چل

یہی ہے تمنائے خواب و خمار
سوئے ارضِ افسون و افسانہ چل
یہی ہے تقاضائے شعر و شباب
سوئے شہرِ مہتاب و مے خانہ چل
بہ تعمیلِ منشورِ مے خانہ اُٹھ
بہ تجدیدِ پیمان و پیمانہ چل
مبارز طلب ہیں حوادث تو کیا؟
رجز پڑھ کے تُو رزم خواہانہ چل
مصائب ہیں ہنگامہ آرا تو ہوں
عَلَم کھول کر فتح مندانہ چل
جو مقصودِ خاطر ہے تنہا روی
تو آزاد و تنہا و یگانہ چل

جو تنہا روی کا سلیقہ نہ ہو
تو انجان راہوں میں تنہا نہ چل

اُٹھا دلق و کشکول و کاسہ اُٹھا
قلندر صفت چَل فقیرانہ چل
دف و چنگ و طاؤس و طنبور و نَے
بہ قانونِ شہرود و شاہانہ چل
شُتر بانِ لیلیٰ کو زحمت نہ دے
رہِ شوق میں بے حجابانہ چل
ابھی منزلیں منزلوں تک نہیں
ابھی دُور ہے شہرِ جانانہ چل
ابھی حُسن کی خیمہ گاہیں کہاں؟
ابھی اور ویرانہ ویرانہ چل
ابھی شہرِ جاناں کی راہیں کہاں
ابھی اور بیگانہ بیگانہ چل
جَبل در جَبل دَشت در دَشت ابھی
جواں مردِ کہسار! مردانہ چل
وہ بنتِ قبیلہ نہ ہو منتظر
ذرا تیز اے عزمِ مستانہ چل
وہ سلمائے صحرا نہ ہو مضطرب
رَہِ دوست میں عذر خواہانہ چل
حریفوں کی چالوں سے غافل نہ ہو
کٹھن وادیوں میں حریفانہ چل

غزالوں کی آبادیاں ہیں قریب
غزل خوانیاں کر غزالانہ چل

بہت اجنبیت ہے اس شہر میں
چل اے دل! سوئے شہرِ جانانہ چل


کلام: رئیس امروہی
بحوالہ نیرنگِ خیال۔ گولڈن جوبلی نمبر 2۔ 1980ء

 

[فرخ منظور]

واہ! کیا خوبصورت نظم ہے۔ شکریہ فرحت صاحبہ!

 

[زھرا علوی]

بہت اجنبیت ہے اس شہر میں
چل اے دل! سوئے شہرِ جانانہ چل

واہ !! خوبصورت ۔۔

 

[محمد وارث]

واہ واہ واہ۔ لاجواب، انتہائی خوبصورت، انتہائی رواں۔ زورِ کلام دیدنی ہے۔

بہت شکریہ فرحت شیئر کرنے کیلیے۔

 

[فاتح]

خوبصورت انتخاب ہے۔ بہت شکریہ!