کتنے بے درد ہیں صَرصَر کو صبا کہتے ہیں - نوابزادہ نصراللہ

[فرخ منظور]

کتنے بے درد ہیں صَرصَر کو صبا کہتے ہیں
کیسے ظالم ہیں کہ ظلمت کو ضیا کہتے ہیں

جبر کو میرے گناہوں کی سزا کہتے ہیں
میری مجبوری کو تسلیم و رضا کہتے ہیں

غم نہیں گر لبِ اظہار پر پابندی ہے
خامشی کو بھی تو اِک طرزِ نوا کہتے ہیں

کُشتگانِ ستم و جور کو بھی دیکھ تو لیں
اہلِ دانش جو جفاؤں کو وفا کہتے ہیں

کل بھی حق بات جو کہنی تھی سرِ دار کہی
آج بھی پیشِ بتاں نامِ خدا کہتے ہیں

یوں تو محفل سے تری اُٹھ گئے سب دل والے
ایک دیوانہ تھا وہ بھی نہ رہا کہتے ہیں

یہ مسیحائی بھی کیا خوب مسیحائی ہے
چارہ گر موت کو تکمیلِ شِفا کہتے ہیں

بزمِ زنداں میں ہوا شورِ سلاسل برپا
دہر والے اسے پائل کی صدا کہتے ہیں

آندھیاں میرے نشیمن کو اڑانے اٹھیں
میرے گھر آئے گا طوفانِ بلا کہتے ہیں

اُن کے ہاتھوں پہ اگر خون کے چھینٹے دیکھیں
مصلحت کیش اسے رنگِ حنا کہتے ہیں

میری فریاد کو اِس عہد ہوس میں ناصر
ایک مجذوب کی بے وقت صدا کہتے ہیں

----نواب زادہ نصراللہ خاں ناصر

 

[نبیل]

کیا یہ سیاستدان نوابزادہ نصراللہ کا کلام ہے؟ اگر ہاں تو کیا ان کا اس کے علاوہ بھی کلام موجود ہے؟
بہت خوبصورت غزل ہے۔ شکریہ فرخ۔

 

[فرحت کیانی]

کتنے بے درد ہیں صَرصَر کو صبا کہتے ہیں
مجھے یاد ہے جب نوابزادہ نصراللہ خان فوت ہوئے تو ایک اخبار نے ان کا یہی مصرعہ بطورِ سرخی لگایا تھا۔

بہت شکریہ سخنور

 

[ملائکہ]

اچھا کلام ہےشکریہ

پر شکوہ و شکایت یہاں بھی موجود ہے۔

 

[محمد وارث]

واہ واہ واہ، کیا لاجواب غزل ہے، شکریہ فرخ صاحب

 

[فرخ منظور]

کیا یہ سیاستدان نوابزادہ نصراللہ کا کلام ہے؟ اگر ہاں تو کیا ان کا اس کے علاوہ بھی کلام موجود ہے؟
بہت خوبصورت غزل ہے۔ شکریہ فرخ۔

جی نبیل یہ سیاستدان نواب زادہ نصراللہ خان کی ہی غزل ہے - مجھے نہیں معلوم کہ ان کا مزید کلام ہے یا نہیں اگر تخلص ناصر کرتے تھے تو یقیناً مزید کلام بھی ہوگا - یہ غزل مجھے والد صاحب کی ڈائری میں سے ملی ہے اور میں خود اسکی تلاش میں تھا - لیکن میں اس غزل کو حبیب جالب کی سمجھتا رہا - نواب زادہ خود بھی بہت اعلیٰ ادبی ذوق کے مالک تھے - مجھے ایک بار ہی ان کا خطاب سننے کا اتفاق ہوا ہے اور وہ خطاب اشعار سے بھرپور تھا -بہت شکریہ پسندیدگی کے لیے!‌

 

[فرخ منظور]

بہت شکریہ فرحت کیانی، ملائکہ اور وارث صاحب!

 

[ابوشامل]

کیسے ظالم ہیں کہ ظلمت کو ضیا کہتے ہیں

بہت خوب سخنور، شیئر کرنے کا شکریہ، مندرجہ بالا مصرعہ بہت ذو معنی ہے ذرا غور کیجیے

 

[گرو جی]

بہت عمدہ کلام ہے شکریہ

 

[جیہ]

واہ اتنا خوبصورت کلام۔ بہت خوب

یقیں کریں کہ مجھے ہرگز توقع نہ تھی نوابزادہ صاحب اتنا اچھا لکھتے ہوں گے

شیئر کرنے کے لیے بہت بہت شکریہ

 

[ڈاکٹر عباس]

بہت خوب سخنور صاحب۔

 

[محمداحمد]

سخنور صاحب،

بہت عمدہ ذوق پایا ہے ماشاءاللہ آپ نے، اور بہت خوبصورت کلام منتخب کرتےہیں یہ غزل بھی اس بات کا ثبوت ہے۔۔ خوش رہیے۔

 

[زھرا علوی]

زبردست ۔۔۔۔۔۔۔۔
بہت پیاری غزل ہے۔۔۔۔

 

[فرحت کیانی]

جی نبیل یہ سیاستدان نواب زادہ نصراللہ خان کی ہی غزل ہے - مجھے نہیں معلوم کہ ان کا مزید کلام ہے یا نہیں اگر تخلص ناصر کرتے تھے تو یقیناً مزید کلام بھی ہوگا - یہ غزل مجھے والد صاحب کی ڈائری میں سے ملی ہے اور میں خود اسکی تلاش میں تھا - لیکن میں اس غزل کو حبیب جالب کی سمجھتا رہا - نواب زادہ خود بھی بہت اعلیٰ ادبی ذوق کے مالک تھے - مجھے ایک بار ہی ان کا خطاب سننے کا اتفاق ہوا ہے اور وہ خطاب اشعار سے بھرپور تھا -بہت شکریہ پسندیدگی کے لیے!‌

سخنور! جالب کا بھی ایسا کلام ہے ناں شاید؟؟؟
ظلمت کو ضیاء، صرصر کو صبا
بندے کو خدا کیا لکھنا

 

[فرخ منظور]

بہت شکریہ ڈاکٹر عباس، زہرا علوی، محمد احمد صاحبان

 

[فرخ منظور]

بہت شکریہ گرو جی، ابو شامل اور جویریہ صاحبہ!

 

[سیما علی]

بہت بہترین سیاست دان اور اعلیٰ شاعر اب سے بڑھ کر بڑے انسان