کراچی

[F@rzana]

کراچی کا خرمن جلایا گیا ہے
کراچی کو مقتل بنایا گیا ہے

وطن کے لٹیروں کا میلہ لگا کر
کراچی کو ننگا نچایا گیا ہے

بہو بیٹیوں کی پھٹی چادروں سے
کراچی کا پرچم بنایا گیا ہے

لٹیروں کی دعوت کا سامان کر کے
کراچی کا ہر گھر لٹایا گیا ہے

کراچی کے اندر کراچی کے باہر
سبق نفرتوں کا پڑھایا گیا ہے

کراچی میں طوفان آیا نہیں ہے
کراچی میں طوفان لایا گیا ہے

بھڑکنے کو ہے آگ ان محفلوں میں
جہاں سے یہ فتنہ اٹھایا گیا ہے

لہو صورتوں سے برہنہ بدن سے
کراچی کا گلشن سجایا گیا ہے
ناظر فاروقی​

 

[F@rzana]

کتاب “ورق ورق گلاب“

گھر کے اندر کوئی محفوظ نہ باہر محفوظ
کوئی دسترا ہی محفوظ نہ چادر محفوظ

حکم ہے ظل الہی کا جھکائے رکھئے
گر اٹھایا تو رہے گا نہ کوئی سر محفوظ

آگ لگوائیں گے جب آگ لگانے والے
کیسے بستی میں رہے گا کوئی چھپر محفوظ

ڈاکوؤں سے جو بچے گا تو یہ خود لوٹیں گے
کیونکہ قانون کے ہاتھوں میں ہیں لیڈر محفوظ

چند جو اونچے مکان ہوتے ہیں سب شہروں میں
آگ لگتی ہے تو رہ جاتے ہیں اکثر محفوظ

در پہ دستک کی جگہ آکے لگائیں ٹھوکر
یہ وطیرہ ہو تو رہتی نہیں چادر محفوظ

آبرو اپنی بچانے کو بہن چھپ جائے
بھائیو ڈھونڈ کے بتلاؤ کوئی گھر محفوظ

وقت آیا ہے کہ اب شیخ بتائیں ناظر
کیوں نہیں ہے کوئی مسجد کوئی ممبر محفوظ​

 

[شمشاد]

 

[F@rzana]

ورق ورق گلاب

آہ شہر کراچی عروس البلاد
کربلائے وطن مرحبا زندہ باد
تونے سارے وطن میں اجالا کیا
تونے مزدور کا بول بالا کیا
کارخانوں میں چاندی پگھلتی رہی
جھگیوں میں مگر بھوک پلتی رہی
حکمرانوں کے محلات بنتے رہے
تیرے بچے غلاضت میں پلتے رہے
جب بھی تیار کوئی پلازہ ہوا
زخم ایک اور سینے میں تازہ ہوا
فیز سیون بنا فیز فائیو بنا
کتنا بڑھیا کلفٹن درائیو بنا
پھر بھی جھگی کی دیوار گرتی رہی
قوم پانی کی خاطر ترستی رہی
ختم جس دن سے دور غلامی ہوا
اک مہاجر ہوا اک مقامی ہوا
رہنما ووٹ لینے کو آتے رہے
جھوٹے وعدوں سے الو بناتے رہے
اور جب بھی شہیدوں کا میلہ لگا
تب کراچی اکیلا اکیلا لگا
حکمراں ظلم پہ ظلم ڈھاتے رہے
ہم شہیدوں کے لاشے اٹھاتے رہے
قرض قائد کا ایسے اتارا گیا
سب سے پہلے لیاقت کو مارا گیا
بس اسی دن سے سازش پہ سازش ہوئی
ملک و ملت پہ بیحد نوازش ہوئی
جو بھی گردی اٹھی وہ جھکادی گئی
مرتضی پر بھی گولی چلادی گئی
اس سیاست نے وہ دن بھی دکھلادیا
ایک بازو ہی دشن سے کٹوادیا
حیف رائج ہے اب تک سیاست وہی
اور پھیلی ہے ہر سو غلاظت وہی
آج خیبر سے لے کر کراچی تک
سارے نادار تکتے ہیں سونے فلک
ہائے سونا اگلتی ہوئی یہ زمیں
جس کی بیٹی کے ہاتھوں میں چوڑی نہیں
وہ کراچی کے فٹ پاتھ پر دھوپ میں
ہاتھ پھیلائے بیٹھی ہو ئی مہہ جبیں
پوچھتی ہے وہ روٹی وہ کپڑا کہاں
آج تک میرا فٹ پاتھ پر ہے مکاں
سب یہ گندی سیاست کا فیضان ہے
لیڈروں میں نہ دین اور ایمان ہے
جب الیکشن ہوا رہنما آگئے
ایک آمر گیا دس خدا آگئے​

 

[سارہ خان]

 

[F@rzana]

ورق ورق گلاب

ادھر آؤ بچو ادھر آؤ جانی
کراچی کی تم کو سنائیں کہانی
یہی شہر تھا وہ جو سوتا نہیں تھا
اندھیرا محلوں میں ہوتا نہیں تھا
وہ تھیلے پہ بکتی ہوئی مونگ پھلیاں
بڑی دیر تک جاگتی تھی یہ گلیاں
بسوں کی صدا سونے دیتی نہیں تھی
یہ سمجھو یہاں رات ہوتی نہیں تھی
یہاں رہنے والوں میں تھا بھائی چارہ
جو دشمن کو ہرگز نہیں تھا گوارہ
ہوئی پھر ہمارے خلاف ایک سازش
تھمی ہی نہیں تب سے لاشوں کی بارش
اجڑتا رہا پھر ہمارا کراچی
گھروں میں یہاں موت جا جا کے ناچی
گلی میں سنو شور ہے گولیوں کا
یہ شیون بھی ماتم ہے ہمجولیوں کا
مری جان سوجا کہ ہے گھپ اندھیرا
بچیں گے تو دیکھیں گے کل پھر سویرا
قضا کیوں نہ آئی کہ مرجاتی نانی
سنانے سے پہلے ہی ایسی کہانی​

 

[F@rzana]

ورق ورق گلاب

اے کراچی کھاگئی تجھ کو بتا کس کی نظر
روز اخباروں میں چھپتی ہے فقط تیری خبر

کیوں دلہنوں کو تری ہوتا نہیں سہرا نصیب
قتل ہوجاتا ہے کیوں بارات میں دولہا غریب

شاہراہوں پر جہاں بکتے تھے کل گجروں کے پھول
کیا غضب ہے آج اڑتی ہے وہاں قبروں کی دھول

پھول گئے گجرے تحفہ جاتے تھے سگائی کی جگہ
اب جنازہ بھیج دیتے ہیں مٹھائی کی جگہ

گولیاں جو دشمنوں کے واسطے لائی گئیں
اپنے بچوں اپنی ماں بہنوں پہ چلوائی گئیں

سامنے دشمن کھڑا ہے اپنا سینہ تان کر
اور ہماری گولیوں کا رخ ہماری جان پر

کتنا خوشحالی میں یکتا اپنا پاکستان ہے
شہر قائد میں بسا ایک شہر قبرستان ہے

گھر کے اندر کب تلک بیٹھے رہیں سہمے ہوئے
لوگ اب نکلا کریں گھر سے کفن پہنے ہوئے​

 

[علمدار]

 

[F@rzana]

ورق ورق گلاب

کہتے ہیں یہ شہر مثالی ہے
ہر سمت یہاں ہریالی ہے
سڑکوں پہ بڑی خوشحالی ہے
بس تھوڑا خالی خالی ہے
یہ سن کے بہت شرمائے ہم
کچھ جھجھکے کچھ گھبرائے ہم
پھر سوچا ان کا دوش نہیں
یہ عینک سبز لگائے ہیں
اسلام آباد سے آئے ہیں
شاہ فیصل روڈ سے گزرے ہیں
محلات میں جاکر ٹہرے ہیں
آرام ابھی فرمائیں گے
پھر رات کو دعوت کھائیں گے
کل جلسے میں بھی جائیں گے
حکام سے ہاتھ ملائیں گے
کچھ تصویریں بنوائیں گے
تقریریں بھی فرمائیں گے
سب اچھا ہے بتلائیں گے
اخباروں کو جھٹلائیں گے
کچھ بھی نہ دکھائی دے ان کو
یہ عینک سبز لگائے ہیں
اسلام آباد سے آئے ہیں
جب شہر میں گولی چلتی ہے
کہتے ہیں پٹاخے چھوٹے ہیں
اس طرح سے دھوکے دے دے کر
کتنے ہی محلے لوٹے ہیں
فریاد اگر کچھ لوگ کریں
کہتے ہیں کہ یہ سب جھوٹے ہیں
وہ خون میں لت پت اک بچہ
کب ان کو دکھائی دیتا ہے
سڑکوں پہ ہے مقتل کا منظر
سب شہر دہائی دیتا ہے
یہ کل کی بنی گیلی قبریں
اس شہر کے پیارے لوگوں کی
وہ کچی وہ گندی بستی
سب ظلم کے مارے لوگوں کی
یہ شہر نہیں اک میت ہے
مظلوم بچارے لوگوں کی
اس شہر سے روزی چلتی ہے
اس دیس کے سارے لوگوں کی
یہ سب کا شہر کراچی ہے
اور تم سے ہی فریادی ہے
اس شہر کے دن ویران ہوئے
اور کتنی بھیانک راتیں ہیں
ہر بستی میں ہر کوچے میں
بس لاشوں کی سوغاتیں ہیں
سرکار کے گھر میں روز مگر
یا شادی یا باراتیں ہیں
بے جرم بھی پکڑے جائیں اگر
تقدیر میں گھونسے لاتیں ہیں
سرکار یہ بپتا سن کر بھی
جھجھکے ہیں نہ کچھ شرمائے ہیں
اسلام آباد سے آئے ہیں
اور عینک سبز لگائے ہیں
جو شہر کبھی سوتا ہی نہ تھا
کس نے اس کو بیمار کیا
سب چپ ہیں مگر سب جانتے ہیں
جو کچھ تم نے سرکار کیا​

 

[F@rzana]

باپ ماں کے سامنے بچوں کو مارا جائے گا
اور اسے جمہوریت کہہ کر بنایا جائے گا

فیصلہ مجرم کو تھانیدار جب لکھنے لگے
کیا عدالت میں کوئی شامت کا مارا جائے گا

آج اک لڑکی کے دولہا کو پکڑ کر لے گئے
کل کسی ماں کے بڑھاپے کا سہارا جائے گا

جس کی بیٹی پر نظر پڑجائے تھانیدار کی
اپنی بستی اپنے گھر سے وہ بچارا جائے گا

لڑکیاں مہندی کا سپنا دیکھتی رہ جائیں گی
نوجوانوں کو اگر چن چن کے مارا جائے گا

حکمراں جب بینک لوٹیں قرض کہہ کر بخش دیں
قسط جو گھر کی نہ دے مجرم پکارا جائے گا

پوچھتے ہیں باادب اپنی حکومت سے عوام
ہے کوئی بستی جہاں شب خوں نہ مارا جائے گا​

 

[F@rzana]

خون پودوں کو دیا کتنی جواں لاشوں کا
جاکے اب دیکھئے ہر شاخ ثمر لائی ہے

کچھ تو بتلائیے تاریخ میں لکھنے کے لئے
جرم ! جس کی مرے بچوں نے سزا پائی ہے​

 

[F@rzana]

ورق ورق گلاب

زندہ ہیں بہت سے سر کٹانے والے
آواز صداقت کی اٹھانے والے

تاریخ بتاتی ہے کہ مٹ جاتے ہیں
خود نعرہ تکبیر دبانے والے​

 

[شمشاد]

بہت خوب نیناں جی، بہت اچھی شاعری شیئر کی ہے آپ نے۔

اب کیا کہیں اربابِ اختیار کو وہ جانتے تو ہیں سب کچھ۔ اور جو جانتے بوجھتے انجان بنا رہے اس کا اللہ ہی حافظ ہے۔

اللہ جانتا ہے یہ خون ایک دن رنگ لا کر رہے گا۔ رائیگاں نہیں جائے گا۔

 

[محب علوی]

بہت اچھی شاعری ہے اور موقع کی مناسبت سے۔

 

[تیشہ]

 

[F@rzana]

آپ تمام کی اس داد کا شکریہ میں محترم شاعر “ناظر فاروقی “ کی جانب سے ادا کرتی ہوں۔
نوازش​

 

[دوست]

 

[ڈاکٹر عباس]

کراچی کا نوحہ

 

[سیدہ شگفتہ]

کون سا دکھ ہے جو اہلِ کراچی نے نہیں سہا اور سب سے زیادہ مسلک کے نام پر۔۔۔۔ مسلکانہ نفرت و عصبیت کے نام پر کیا کیا نہیں ہوا یہاں اور کیا کچھ نہیں کیا گیا۔۔۔ اور کیا کچھ نہیں کیا جائے گا۔۔۔ جو ہونا ہے ابھی۔۔۔ !

 

[ڈاکٹر عباس]

اَعصاب شکستہ ہیں تو چھلنی ہیں نگاہیں
احساسِ بہاراں ، نہ غمِ فصلِ خزاں ہے
آندھی کی ہتھیلی پہ ہے جگنو کی طرح دل
شعلوں کے تصرف میں رگِ غُنچہ جاں ہے

ہر سمت ہے رنج و غم و آلام کی بارش
سینے میں ہر اک سانس بھی نیزے کی انی ہے
اب آنکھ کا آئینہ سنبھالوں میں کہاں تک
جو اَشک بھی بہتا ہے وہ ہیرے کی کنی ہے

احباب بھی اعداء کی طرح تیر بکف ہیں
اب موت بھٹکتی ہے صفِ چارہ گراں میں
سنسان ہے مقتل کی طرح شہرِ تصور
سہمی ہوئی رہتی ہے فغاں خیمہِ جاں میںٍ​