مصطفیٰ زیدی کِرَن

[غزل قاضی]

کِرَن​

​

چھُپ گئے رات کے دامن میں ستارے لیکن​

ایک ننھا سا دیا اب بھی ہے ہم راہ و نشاں​

ایک ننھا سا دیا اور یہ شب کی یورش​

اور یہ ابر کے طوفاں ، یہ کُہرا ، یہ دُھواں​

​

لیکن اس ایک تصور سے نہ ہو افسردہ​

ساعتیں اب بھی نیا جوش لئے بیٹھی ہیں​

سنگِ رہ اور کئی آئیں گے لیکن آخر​

منزلیں گرمئی آغوش لئے بیٹھی ہیں​

​

اک نئے عہد کی امید، نئی صبح کی ضو !!​

اس اندھیرے سے اُبھرتے ہیں چراغاں کتنے​

زیست کے جامۂ صد چاک کا ماتم کیسا !​

زیرِ تخلیق ہیں خلّاق گریبَاں کتنے​

​

چھُپ گئے رات کے دامن میں ستارے لیکن​

یہ تری شُعلہ نوائی کا نیا دَور سہی !​

عزم ِ پرواز کی توہین سے مایوس نہ ہو​

ایک بار اور سہی ، اور سہی ، اور سہی​

​

(مصطفیٰ زیدی)​

​

روشنی​

 

[محمد وارث]

شکریہ آپ کا ارسال فرمانے کیلیے

 

[فارقلیط رحمانی]

غزل جی! اس پیاری سی پیشکش کے لیے بہت بہت شکریہ:!!!

 

[سید زبیر]

بہت خوب
اک نئے عہد کی امید، نئی صبح کی ضو !!
اس اندھیرے سے اُبھرتے ہیں چراغاں کتنے
زیست کے جامۂ صد چاک کا ماتم کیسا !
زیرِ تخلیق ہیں خلّاق گریبَاں کتنے

 

[غزل قاضی]

آپ سب کے انتخاب پسند فرمانے کا بیحد شکریہ ۔ وارث صاحب ، رحمانی صاحب ، زبیر صاحب !