کھانے کا حوصلہ نہیں، پینا محال کر دیا

[عرفان سعید]

مزاحیہ غزل
(پروین شاکر سے معذرت کے ساتھ)

کھانے کا حوصلہ نہیں، پینا محال کر دیا
کھانے کے وقت تیرے رونے نے نڈھال کر دیا

اے میری زوجہ! تجھے چاہ تھی کچھ کبابوں کی بہت
کچے کباب نے مگر کیا ترا حال کر دیا

کھانے کی میز پر طلب کیا کبھی گر جو قورمہ
غصے میں گھورا مجھ کو ،صرف شوربہ ڈال کر دیا

گر کہا اب بخار ہے، یخنی بنا کر لے آؤ
پانی کو بس نمک ہی کے ساتھ ابال کر دیا

بکتے ہوئے غراروں پر اور تھا فیصلہ کوئی
اس نے مگر وہ لیتے وقت اور سوال کر دیا

ممکنہ فیصلوں میں شادی کا بھی فیصلہ تو تھا
ہم نے تو ایک بات کی، اس نے وبال کر دیا

وقت بھی توبیاہ کا آج نہ یاد آسکا
شادی نے اہلیہ کو بھی خواب و خیال کر دیا

زمانے کے بعد مجھے بھی چائے لا کر پلا دی
منصبِ شوہری پہ کیا مجھ کو بحال کر دیا؟

(عرفان)​

 

[محمد عدنان اکبری نقیبی]

عمدہ لاجواب عرفان بھائی۔

 

[سید عمران]

ڈیڈیکیٹ ٹو محمد وارث بھی کردیں۔۔۔
تاکہ محنت وصو ل ہو!!!

 

[محمد وارث]

ڈیڈیکیٹ ٹو محمد وارث بھی کردیں۔۔۔
تاکہ محنت وصو ل ہو!!!

میں کچھ زیادہ ہی بدنام ہو گیا ہوں سید صاحب، حالانکہ یہ کہانی گھر گھر کی ہے، کیوں کیا غلط کہا؟

 

[سید عمران]

میں کچھ زیادہ ہی بدنام ہو گیا ہوں سید صاحب، حالانکہ یہ کہانی گھر گھر کی ہے، کیوں کیا غلط کہا؟

بدنام اگر ہوں گے تو کیا نام نہ ہوگا۔۔۔
ویسے ہر کوئی اپنا رولا آپ کے گلے ڈال کر اپنے جی کا بوجھ ہلکا کرلیتا ہے!!!

 

[عبد الرحمٰن]

میں کچھ زیادہ ہی بدنام ہو گیا ہوں

بدنام ہو کے نام تو ہو گا مثبت سوچیں

 

[محمد وارث]

بدنام ہو کے نام تو ہو گا مثبت سوچیں

الحمد للہ میری سوچ مثبت ہی ہے، میں تو ہمیشہ مثبت چار ہی کا سوچتا ہوں۔

 

[محمد خلیل الرحمٰن]

الحمد للہ میری سوچ مثبت ہی ہے، میں تو ہمیشہ مثبت چار ہی کا سوچتا ہوں۔

دو ہوتیں تو کیسا ہوتا
کتنا اچھا اچھا ہوتا
گھر آنگن میں خوشیاں ہوتیں
خوشیوں کا ہی ڈیرا ہوتا
​

 

[سید عمران]

دو ہوتیں تو کیسا ہوتا
کتنا اچھا اچھا ہوتا
گھر آنگن میں خوشیاں ہوتیں
خوشیوں کا ہی ڈیرا ہوتا
​

دل کے بہلانے کو غالب یہ خیال اچھا ہے وغیرہ!!!

 

[الف عین]

مزے کی چیز ہے۔ آسے مزاحیہ غزل اس لیے نہیں کہہ رہا کہ تقطیع گڑبرا رہی ہے۔ بات اور الفاظ بھی دو حصوں میں ٹوٹ زہے ہیں

 

[عرفان سعید]

عمدہ لاجواب عرفان بھائی۔

بہت نوازش جناب کی حوصلہ افزائی کی۔

 

[عرفان سعید]

ڈیڈیکیٹ ٹو محمد وارث بھی کردیں۔۔۔
تاکہ محنت وصو ل ہو!!!

ہم تو سر بچشم تیار ہیں۔ مگر قبلہ وارث بھائی کی جلالتِ علمی کے باعث شرم مانع آ جاتی ہے۔

 

[عرفان سعید]

مزے کی چیز ہے۔ آسے مزاحیہ غزل اس لیے نہیں کہہ رہا کہ تقطیع گڑبرا رہی ہے۔ بات اور الفاظ بھی دو حصوں میں ٹوٹ زہے ہیں

استادِ محترم! آپ کے التفات پر بے حد مشکور ہوں۔ فنی نزاکتوں اور اسے نبھا لے جانے کے تقاضوں سے بالکل تہی دامن ہوں۔ میری تدریس کی خاطر اگر آپ کچھ توضیح کر کے سمجھا دیں تو بہت عنائیت ہو گی۔

 

[الف عین]

مفتعلن مفاعلن دو بار ۔ اس بحر میں تقطیع کر کے دیکھیں۔
دو ٹکڑوں میں تقسیم بحر ہے، یہ پہلے ہی لکھ چکا ہوں