ایاز صدیقی کہکشاں وقت کی پلکوں پہ اتر آئی ہے

[مہ جبین]

کہکشاں وقت کی پلکوں پہ اتر آئی ہے​

آسماں تک مِری آہوں کی پذیرائی ہے​

​

کیا تجلی ہے کہ ہر آنکھ میں در آئی ہے​

کیا تماشا ہے کہ ہر شخص تماشائی ہے​

​

بارہا سلسلہ کفارہء جاں تک پہنچا​

بارہا تجھ سے نہ ملنے کی قسم کھائی ہے​

​

آئنہ بن گیا جس شخص نے دیکھا تجھ کو​

آئنہ ساز تِرا حسنِ خود آرائی ہے​

​

میں نے دیکھا ہے بکھرتے ہوئے شیرازہء گل​

میری نظروں میں مآلِ چمن آرائی ہے​

​

نہ کوئی دیکھنے والا نہ سجانے والا​

زخمِ دل آئنہء لالہء صحرائی ہے​

​

پھر مِرے چاکِ گریباں کی نمائش ہوگی​

پھر خرد کو ہوسِ انجمن آرائی ہے​

​

اب کوئی شعلہء آواز اٹھے یا نہ اٹھے​

آرزو بامِ سماعت سے اتر آئی ہے​

​

دلِ پُر داغ بھی اک طرفہ تماشا ہے ایاز​

بزم کی بزم ہے تنہائی کی تنہائی ہے​

​

ایاز صدیقی​

​

 

[نیرنگ خیال]

بہت عمدہ آپی۔ ​

کیا تجلی ہے کہ ہر آنکھ میں در آئی ہے​

کیا تماشا ہے کہ ہر شخص تماشائی ہے​

واہ واہ کیا کہنے​

 

[غنی شاد]

میں نے دیکھا ہے بکھرتے ہوئے شیرازہء گل
میری نظروں میں مآلِ چمن آرائی ہے،
واہ ، بہت خوب انتخاب ہے، شکریہ

 

[کاشفی]

کہکشاں وقت کی پلکوں پہ اتر آئی ہے ​

آسماں تک مِری آہوں کی پذیرائی ہے​

واہ بہت ہی عمدہ۔ بہت شکریہ شیئر کرنے کے لیئے۔۔خوش رہیئے۔۔​

 

[طارق شاہ]

کیا تجلی ہے، کہ ہر آنکھ میں درآئی ہے​

کیا تماشا ہے، کہ ہر شخص تماشائی ہے​

کیا کہنے​

شیئر کرنے کے لئے تشکّر​

بہت خوش رہیں​

 

[سید زبیر]

نہ کوئی دیکھنے والا نہ سجانے والا
زخمِ دل آئنہء لالہء صحرائی ہے
بہت اعلیٰ ۔۔ ہمیشہ کی طرح منفرد انتخاب ۔۔۔ بہت شکریہ محفل میں پیش کرنے کا