جوش کیا نمازِ شاہ تھی، ارکانِ ایمانی کے ساتھ

[حسان خان]

کیا نمازِ شاہ تھی، ارکانِ ایمانی کے ساتھ​

دل بھی جھک جاتا تھا ہر سجدے میں پیشانی کے ساتھ​

​

حشر تک زندہ ہے تیرا نام اے ابنِ رسول!​

کر چکا ہے تو وہ احساں، نوعِ انسانی کے ساتھ​

​

اُن کے آگے صولتِ دنیا کا ذکر، او ابنِ سعد​

کھیلتی ہے جن کی ٹھوکر تاجِ سلطانی کے ساتھ​

​

غیرتِ حق کو کہیں دیکھو نہ آ جائے جلال​

ظالمو ہولی نہ کھیلو خونِ انسانی کے ساتھ​

​

باندھتی ہو کیا ہوا، اے اہرمن کی آندھیو!​

کھیلنا آساں نہیں ہے شمعِ یزدانی کے ساتھ​

​

ہمتِ معصوم کو فاسق سے کیا خوف و خطر​

یہ سفینہ مضحکہ کرتا ہے طغیانی کے ساتھ​

​

صرف رو لینے سے قوموں کے نہیں پھرتے ہیں دن​

خوں فشانی بھی ہے لازم اشک افشانی کے ساتھ​

​

آنکھ میں آنسو ہوں، سینوں میں شرارِ زندگی​

موجۂ آتش بھی ہو، بہتے ہوئے پانی کے ساتھ​

​

اہلِ بیتِ پاک کی ہر سانس کو اے مدعی!​

ہاں ملا کر دیکھ لے آیاتِ قرآنی کے ساتھ​

​

جوش ہم ادنیٰ غلامانِ علیِ مرتضیٰ​

تمکنت سے پیش آتے ہیں جہانبانی کے ساتھ​

​

(جوش)​

 

[نیرنگ خیال]

صرف رو لینے سے قوموں کے نہیں پھرتے ہیں دن​

خوں فشانی بھی ہے لازم اشک افشانی کے ساتھ​

کیا انتخاب کیا ہے حسان بھائی۔ لاجواب ۔ بہت ہی عمدہ ​

 

[سیدہ شگفتہ]

بہترین شیئرنگ

 

[سیدہ شگفتہ]

حشر تک زندہ ہے تیرا نام اے ابنِ رسول!
کر چکا ہے تو وہ احساں، نوعِ انسانی کے ساتھ

 

[سیدہ شگفتہ]

کیا نمازِ شاہ تھی، ارکانِ ایمانی کے ساتھ
دل بھی جھک جاتا تھا ہر سجدے میں پیشانی کے ساتھ

 

[سید زبیر]

سبحان اللہ ۔ ۔۔ خوبصورت کلام
صرف رو لینے سے قوموں کے نہیں پھرتے ہیں دن
خوں فشانی بھی ہے لازم اشک افشانی کے ساتھ