گلاب آنکھیں

[یوسف-2]

گلاب آنکھیں، شراب آنکھیں
یہی تو ہیں، لاجواب آنکھیں

اِنہیں میں اُلفت، اِنہی میں نفرت
ثواب آنکھیں، عذاب آنکھیں

کبھی نظر میں بلا کی شوخی
کبھی سراپا حجاب آنکھیں

کبھی چُھپاتی ہیں راز دل کے
کبھی ہیں دل کی کتاب آنکھیں

کسی نے دیکھی تو جھیل جیسی
کسی نے پائیں سراب آنکھیں

”وہ“ آئے تو لوگ مجھ سے بولے
حضور! آنکھیں۔ جناب! آنکھیں۔

عجیب تھا، گفتگو کا عالم
سوال کوئی، جواب آنکھیں

یہ مست مست بے مثال آنکھیں
مصوری کا کمال آنکھیں

شراب رب نے حرم کردی
مگرکیوں رکھیں حلال آنکھیں

ہزاروں ان پہ قتل ہوئے ہیں
خدا کی بندی، سنبھال آنکھیں

(شاعر نامعلوم)​

 

[مہدی نقوی حجاز]

بہت لاجواب شراکت ہے جناب یوسف ثانی صاحب۔
البتہ "نامعلوم" صاحب نے آخری شعر میں "قتل" کا تلفظ غلط باندھا ہے، بر وزن "غلط"۔ جبکہ قتل کا ت ساکن ہے، بروزن "فعل"۔

اور آخری تین اشعار میں قوافی بھی بدل گئے ہیں۔

 

[الف عین]

کسی مبتدی کا کلام ہے، لیکن خوب ہے۔ اور مست مست پر غور نہیں کیا، آخری ت بھی حرف علت کی طرح غائب ہے

 

[عمر سیف]

آئی ٹو آئی والے طاہر شاہ ان سے متاثر لگتے ہیں ۔۔۔۔

 

[شمشاد]

کیا بات ہے جی آنکھوں کی۔

 

[انیس الرحمن]

کسی مبتدی کا کلام ہے، لیکن خوب ہے۔ اور مست مست پر غور نہیں کیا، آخری ت بھی حرف علت کی طرح غائب ہے

استادِ محترم شاید آخری تین شعر کسی اور کے ہیں۔

یہ مست مست بے مثال آنکھیں
نشے سے ہر دم نڈھال آنکھیں

اٹھیں تو ھوش و حواس چھینیں
گریں تو کر دیں کمال آنکھیں

کوئی ہے ان کے کرم کا طالب
کسی کا شوق وصال آنکھیں

نہ یوں جلائیں نہ یوں ستائیں
کریں تو کچھ یہ خیال آنکھیں

ہیں جینے کا بہانہ یارو
یہ روح پرور جمال آنکھیں

دراز پلکیں غزال آنکھیں
مصوّری کا کمال آنکھیں

شراب رب نے حرام کر دی
مگر رکھی ہیں حلال آنکھیں

ہزاروں ان سے قتل ہوئے ہیں
خدا کے بندے سنبھال آنکھیں