نصیر الدین نصیر گلبدنی از نصیر الدین نصیر گولڑوی

[عظیم اللہ قریشی]

گلبدنی
کیا حسن کا شاہ کار وہ اللہ ُ غنی ہے
قامت میں دل آویزی سروِ چمنی ہے
سَر تا بہ قدم مؤَجہ ۔شیریں سخنی ہے​

دو شیزۂِ کہسار و غزالِ خُتَنی ہے
دانتوں کی چمک رو کشِ دُرّعدنی ہے
کیا گُل بَدَنی ، گُل بَدَنی ، گُل بَدَنی ہے​

​

شانوں پہ ہیں گیسو کہ گھٹائیں ہیں معنبر
لب کیفِ تکلم سے کھنکتے ہوئے ساغر​

پیشانی ضَوْ بار ہے یا ماہِ منور
ابرو ہیں کماں رنگ ،مژہ ناوکِ خود سر​

مکھڑے پہ ہے جو خال ،عقیقِ یمنی ہے​

کیا گُل بَدَنی ، گُل بَدَنی ، گُل بَدَنی ہے​

​

اَنْفَاس کی خوشبو ہے کہ مہکا ہوا گلشن
زلفوں کی گھنی چھاؤں کہ امڈا ہو ا ساون
جھکتی سی نگاہیں تو ابھرتا ہوا جوبن
بجتے ہوئے پنڈے کی وہ ہر تار کی جَھن جَھن
چہرہ جو گلابی تو قبا ناروَنی ہے
کیا گُل بَدَنی ، گُل بَدَنی ، گُل بَدَنی ہے​

قامت کا خَم و چَم ہے کہ دجلے کی روانی
نقشِ کفِ پا رُو کشِ صد تاجِ کیانی
زلفوں کے سیہ ابر کی وہ عطر فشانی
گل رنگ پسینے میں ہے غرقاب جوانی​

جو بوند ہے ماتھے کی وہ ہیرے کی کنی ہے​

کیا گُل بَدَنی ، گُل بَدَنی ، گُل بَدَنی ہے​

​

انداز ہیں اعجاز ،کرشمہ ہیں ادائیں
سلجھائے جو گیسو تو الجھتی ہیں گھٹائیں
کلیوں کی چٹک ،لیتی ہے لہجے کی بلائیں
مل جائے جو ہم کو تو کلیجے سے لگائیں
دل میں ہے یہی بات جو مدت سے ٹھنی ہے​

کیا گُل بَدَنی ، گُل بَدَنی ، گُل بَدَنی ہے​

​

غمزے ہیں کہ آفت ہیں،اشارے ہیں کہ طوفاں
باتیں ہیںکہ گھاتیں ہیں ،تبسم کہ گلستاں
شوخی ہے کہ بجلی ہے ،خموشی ہے کہ پیکاں​

چہرے پہ تجلی ہے کہ ہے ماہِ زمستاں
سانسوں میںوہ لَپٹیں ہیں کہ جانوں پہ بنی ہے​

کیا گُل بَدَنی ، گُل بَدَنی ، گُل بَدَنی ہے
تیور ہیں کہ تلوار، ادائیں ہیں کہ خنجر
عشوے ہیں کہ نیزے ہیں نگاہیں ہیں کہ نشتر
پلکیں ہیں کہ شب خوں پہ کمر بستہ ہے لشکر​

یہ چیں جبیں ہے کہ عقوبت گہِ محشر
قامت ہے کہ نیزہ ہے نظر ہے کہ اَنی ہے​

کیا گُل بَدَنی ، گُل بَدَنی ، گُل بَدَنی ہے​

​

ماتھے پہ پھبن ،پھول سے ہونٹوں پہ تبسم
رخسار کے دریا میں ہے جلووں کا تلاطم
افکار میں ندرت ہے تو لفظوں میں ترنم
لہجے میں تحمل ہے تو باتوں میں تحکم
مہکائے ہوئے بزم کو عنبر دہنی ہے​

کیا گُل بَدَنی ، گُل بَدَنی ، گُل بَدَنی ہے
یہ مانگ میں افشاں ہے کہ رخشندہ ستارے
اٹھتا ہوا جو بن ہے کہ مڑتے ہوئے دھارے
تابندہ خدو خال کہ رقصندہ شرارے
جنبیدہ لَٹیں ہیں کہ چکاروں کے طرارے​

ساون کی سیہ رات ہے یا زلف گھنی ہے​

کیا گُل بَدَنی ، گُل بَدَنی ، گُل بَدَنی ہے​

​

چلتی ہے تو مل جاتی ہیں راہوں کو زبانیں
چِھٹکاتی ہے جب زلف ،برس پڑتی ہیں تانیں​

آتی ہے جماہی تو درکتی ہیں چٹانیں
انگڑائی جو لیتی ہے ،کڑکتی ہیں کمانیں
ابرو میں لیے جذبۂِ ناوک فِگنی ہے
کیا گُل بَدَنی ، گُل بَدَنی ، گُل بَدَنی ہے​

وہ قہر سے دیکھے تو سمندر کو سکھادے
چاہے تو اداؤں سے پہاڑوں کو ہلا دے
شوخی پہ جو اُترے تو دو عالم کو نچادے
کیوںخانہ عشاق کو پل بھر میں نہ ڈھادے​

کعبے میں جسے حوصلہ ِ نقب زنی ہے
کیا گُل بَدَنی ، گُل بَدَنی ، گُل بَدَنی ہے
​

ہر بول میں ہے بادۂِ گل کوں کی روانی
ہر مَوجہ انفاس میں ہے زمزمہ خوانی
خوں ریز اشارے ہیں تو قاتل ہے جوانی
ہے جھیل سی آنکھوں میں چمکتا ہوا پانی
وہ شعلہ ہے جلوت میں تو خلوت میں بَنی ہے​

کیا گُل بَدَنی ، گُل بَدَنی ، گُل بَدَنی ہے​

​

شوخی میں بھرے دولتِ دیرینۂِ قطبین
چوٹی میں لپیٹے شبِ رعنائی دارَین
الٹے ہوئے گھونگھٹ تو اتارے ہوئے نعلین
وہ بنتِ قمر آگئی ،لے داورِ کونین
یہ دینِ مقدس ہے یہ دنیائے دَنی ہے
کیا گُل بَدَنی ، گُل بَدَنی ، گُل بَدَنی ہے
غنچے کا دکھائی ہے سماں تنگ دہانی
نطق ایسا کہ بپھرے ہوئے دریا کی روانی
اندازِ تخاطب میں غرورِ ہمہ دانی
الفاظ میں ہیں گوہرِ صد رنگ معانی
اِن کا جو نہ قائل ہو وہ گردن زَدَنی ہے​

کیا گُل بَدَنی ، گُل بَدَنی ، گُل بَدَنی ہے​

اٹھتا نہیں گھونگھٹ کی طرف دست ِحنائی
ہر انگ لجاتا ہے دمِ چہرہ کشائی
نظروں کی گرانی سے مُڑَکتی ہے کلائی
حاصل ہے جسے اِس درِ دولت کی گدائی
وہ خسرو آفاق کی مانند غنی ہے​

کیا گُل بَدَنی ، گُل بَدَنی ، گُل بَدَنی ہے
سِن ہے جو تروتازہ تو رخسار ہیں شاداب
جلد اتنی ملائم کہ خجل قَاقُم و سنجاب
پلکوں کے جھپکنے میں ہے آمادگی خواب
نظروں میں جو لہریں ہیں تو آنکھوں میں ہے گرداب​

شبنم کی دُلَائِی سی شبستاں میں تنی ہے​

کیا گُل بَدَنی ، گُل بَدَنی ، گُل بَدَنی ہے​

​

سرشار مناظر ہیں ،جنوں خیز ہوائیں
قاتل ہے تبسم تو قیامت ہیں ادائیں
پہلو میں ہے وہ شوخ معطر ہیں فضائیں
اِس وقت سے کہ گِھرتی چلی آتی ہیں، گھٹائیں​

ساغر کو پَٹک دوں تو یہ ایماں شکنی ہے​

کیا گُل بَدَنی ، گُل بَدَنی ، گُل بَدَنی ہے​

​

دیکھو اسے ہنگامِ برافگندہ نقابی
اک مصحفِ تابندہ ہے یا روئے کتابی
نغمہ ہے نظر ،آنکھ کے ڈورے ہیں ربابی
کلیوں کی مہک جسم میں ،مکھڑا ہے گلابی​

یہ شکل و شباہت نہ بنے گی نہ بنی ہے​

کیا گُل بَدَنی ، گُل بَدَنی ، گُل بَدَنی ہے​

​

آہنگِ جوانی پہ سموات ہیں رقصاں
آواز ہے اک نغمہ ،تو لہجہ گلِ خنداں
بنیادِ دو عالم ہے اشارات سے لرزاں
مسقط دلِ عشاق ہے چاہ زنخداں​

وہ مؤجہ تابندگی سیم تنی ہے​

کیا گُل بَدَنی ، گُل بَدَنی ، گُل بَدَنی ہے​

​

تھم جائے وہیں ،دیکھے اگر گردشِ دوراں
ہو واعظِ بے چارہ بھی انگشتِ بدنداں
الحاد کے زانو میں ہے سویا ہوا ایماں
اعلانِ خدائی ہے لبِ کفر پہ خنداں​

اب آئے جسے ولولۂِ بت شکنی ہے
کیا گُل بَدَنی ، گُل بَدَنی ، گُل بَدَنی ہے
کچھ غم نہیں الفت میں جو دن رات کراہیں
چبھتی رہیں سینے میں وہ بے باک نگاہیں
دُھن ہے کہ گلے میں رہیں وہ پھول سی بانہیں
کیونکر نہ نصیر اُس بتِ نوخیز کو چاہیں​

رگ رگ میں رچی عاشقی و برہمنی ہے​

کیا گُل بَدَنی ، گُل بَدَنی ، گُل بَدَنی ہے

​

 

[نایاب]

واہہہہہہہہہہہہہہہہہ
کیا کمال شراکت ہے
لطف آ گیا پڑھ کر
روح تک مہک گئی سچ میں
بہت شکریہ محترم روحانی بابا جی

 

[زبیر مرزا]

سبحان اللہ
جزاک اللہ

 

[حسان خان]

واہ!

 

[مزمل شیخ بسمل]

واہ واہ۔ کیا خوب۔

 

[حسان خان]

ناروَنی کا مطلب کیا ہے؟

 

[عظیم اللہ قریشی]

ناروَنی کا مطلب کیا ہے؟

فارسی زبان میں گلشن میں جو سب سے اونچا اور سایہ دار درخت ہوتا ہے اس کو نارون کہتے ہیں اور تشبیہً محبوب کے قد سے مراد لی جاتی ہے اورکچھ پوچھنا ہوا تو بندہ حاضر ہے خوشی ہوئی کہ آپ نے پوچھ لیا

@نایاب@الف نظامی@شاہ حسین@ایم اے راجا@مغزل@خرم شہزاد خرم@بنت شبیر@الف عین@ ابن سعید​

@ناز پری@محمود احمد غزنوی@حسبیب نذیر گل@محمد بلال اعظم@ساجد@چھوٹاغالبؔ@کاشف اکرم وارثی@نیلم@مزمل بسمل شیخ@وارث@نبیل​

 

[محمود احمد غزنوی]

بابا جی آپ جب ٹیگ کرتے ہیں تو @ کے بعد نام لکھ کر اگلے ٹیگ سے پہلے ایک اسپیس دینا ضرور ہے ورنہ ٹیگنگ نہیں ہوتی۔

 

[حسان خان]

فارسی زبان میں گلشن میں جو سب سے اونچا اور سایہ دار درخت ہوتا ہے اس کو نارون کہتے ہیں اور تشبیہً محبوب کے قد سے مراد لی جاتی ہے اورکچھ پوچھنا ہوا تو بندہ حاضر ہے خوشی ہوئی کہ آپ نے پوچھ لیا

بہت شکریہ بھائی

 

[عظیم اللہ قریشی]

بابا جی آپ جب ٹیگ کرتے ہیں تو @ کے بعد نام لکھ کر اگلے ٹیگ سے پہلے ایک اسپیس دینا ضرور ہے ورنہ ٹیگنگ نہیں ہوتی۔

غزنوی جی یہی تو ایک غلطی ہوتی تھی خیر اب نہیں ہوگی محمود احمد غزنوی

 

[محمد وارث]

واہ واہ واہ، لاجواب۔

بہت شکریہ عظیم صاحب ارسال فرمانے کیلیے۔

 

[عظیم اللہ قریشی]

واہ واہ واہ، لاجواب۔

بہت شکریہ عظیم صاحب ارسال فرمانے کیلیے۔

جناب وارث صاحب یہ بتائیں کہ کیا ایسی روانی برجستگی آپ نے ساری عمر کسی اور کلام میں دیکھی ہے؟؟؟
محمد وارث

 

[محمد وارث]

جناب وارث صاحب یہ بتائیں کہ کیا ایسی روانی برجستگی آپ نے ساری عمر کسی اور کلام میں دیکھی ہے؟؟؟
محمد وارث

شکریہ عظیم صاحب، آپ درست فرما رہے ہیں کہ بہت رواں اور برجستہ کلام ہے۔ کیا بات ہے سید صاحب کی قادرالکلامی کی۔

 

[عظیم اللہ قریشی]

شکریہ عظیم صاحب، آپ درست فرما رہے ہیں کہ بہت رواں اور برجستہ کلام ہے۔ کیا بات ہے سید صاحب کی قادرالکلامی کی۔

حضور قبلہ وارث صاحب بندہ کافی عرصہ اس کے سحر میں گرفتار رہا اورگلبدنی کو دوستوں کی محفل میں اتنا پڑھا کہ حفظ ہوگئی تھی بلکہ اصل بات یہ تھی کہ ہر مرتبہ محفل کا خاتمہ ہی میرے گلبدنی سنانے کے بعد ہوا کرتا تھا۔