ہمارے ہیرو:: غالب، محمد حسین آزاد، بوعلی سینا، عبد الستار ایدھی

[محمد خلیل الرحمٰن]

ہمارے ہیرو:: غالب، محمد حسین آزاد، بوعلی سینا، عبد الستار ایدھی

محمد خلیل الرحمٰن

ایمان خلیل صاحبہ کے اردو پراجیکٹ جس میں ان چار ہیروز پر ایک نظم پیش کرنی ہے، کے لیے ہماری کوشش۔ اساتذۂ کرام اور محفلین کی خدمت میں اصلاح کے لیے پیش پے۔

آؤ بچو تمہیں سنائیں باتیں کچھ انسانوں کی
انسانوں کی خدمت کرنے والے شیر جوانوں کی

چھوٹے نام نہیں ہیں اِن میں، بات کریں گے ہم سیدھی
غالب ہیں، آزاد ہیں اِن میں، بوعلی سینا اور ایدھی

چاروں ہی مشہور ہیں یعنی آسمان کے تارے ہیں
علم و ادب کے ہیرے ہیں، سب انسانوں کے پیارے ہیں


(1)

اردو کا جب نام لیں، پہلے غالب ہی یاد آتے ہیں
اپنی پیاری غزلوں سے اردو کی شان بڑھاتے ہیں

غزلوں میں اِک نام ہے اِن کا، اور اردو کی شان ہیں
اچھے شاعر اور مفکر اور اچھے انسان ہیں


(2)

دلّی سے ہی لکھنے والے ایک حُسین آزاد ہیں
انشا پردازی میں اردو دانوں کو وہ یاد ہیں

اردو میں اِک بڑا حوالہ اُن کی "آبِ حیات" ہے
اردو کی خدمت میں سب سے آگے اُن کی ذات ہے


(3)

طِب میں اور حِکمت میں مسلم دنیا کا بھی کام ہے
سائنس پر احسان ہے اُن کا، ابنِ سینا نام ہے

مشرق اور مغرب کا سنگم بوعلی سینا زندہ ہے
جِس کی فکر و حکمت ساری دنیا میں پائیندہ ہے


(4)

خدمتِ انسانیت میں کچھ نام ہمیں یاد آتے ہیں
عبد الستار ایدھی کا بھی نام انہیں میں پاتے ہیں


اپنا آپ مٹا دیتے ہیں انسانوں کی خدمت میں
خدمت ہی ہے عین عبادت اِن لوگوں کی سیرت میں


​

 

[ارشد چوہدری]

خلیل بھائی بہت اچھی ہے ۔ہر شعر کی اپنی جداگانہ حیثیت ہے۔اور ہر شعر مطلع کی طرح ہے ۔ شاعری کی اس صنف کو کیا کہتے ہیں،تاکہ میں بھی کسی موضوع پر کوشش کر سکوں۔ والسلام

 

[محمد خلیل الرحمٰن]

خلیل بھائی بہت اچھی ہے ۔ہر شعر کی اپنی جداگانہ حیثیت ہے۔اور ہر شعر مطلع کی طرح ہے ۔ شاعری کی اس صنف کو کیا کہتے ہیں،تاکہ میں بھی کسی موضوع پر کوشش کر سکوں۔ والسلام

ارشد چوہدری بھائی یہ نظم کا فارمیٹ ہے جس میں ایک ہی موضوع پر مسلسل خیالات کا اظہار ہوتا ہے۔ بحر ایک ہوتی ہے لیکن ہر شعر کا ردیف و قافیہ مختلف ہوتا ہے۔

البتہ ہم نے جو مختلف شخصیات کے تذکروں پر الگ الگ نمبر لگائے ہیں وہ غلط ہے ۔ یہ الگ نمبر الگ بندوں کو ظاہر نہیں کررہے۔ یہ مسلسل نظم ہے جس میں الگ الگ بند نہیں ہیں۔

 

[ارشد چوہدری]

شکریہ بھائی

 

[کامران عاشر]

اردو کا جب نام لیں، پہلے غالب ہی یاد آتے ہیں
اپنی پیاری غزلوں سے اردو کی شان بڑھاتے ہیں

بہترین
بچوں کے لیے آپ کو اور نظمیں لکھنی چاہییں

 

[محمد وارث]

بہت خوب خلیل صاحب، کیا کہنے!

 

[محمد تابش صدیقی]

بہت خوب خلیل بھائی۔

 

[محمد تابش صدیقی]

بہترین
بچوں کے لیے آپ کو اور نظمیں لکھنی چاہییں

خلیل بھائی نے بچوں کے لیے بہت عمدہ نظمیں لکھی ہیں۔

 

[سردار محمد نعیم]

واہ واہ بہت خوب خلیل الرحمن صاحب۔۔

 

[الف عین]

کچھ مصرعوں میں ایک 'فع' کی کمی رہ گئی ہے، ' بھی' وغیرہ سے مکمل کیا جا سکتا ہے
غزلوں میں اِک نام ہے اِن کا، اور اردو کی شان ہیں
اچھے شاعر اور مفکر اور اچھے انسان ہیں
... بھی ہیں

دلّی سے ہی لکھنے والے ایک حُسین آزاد ہیں
انشا پردازی میں اردو دانوں کو وہ یاد ہیں
...؟
اردو میں اِک بڑا حوالہ اُن کی "آبِ حیات" ہے
اردو کی خدمت میں سب سے آگے اُن کی ذات ہے
... بھی ہے' کیا جا سکتا ہے