ہم عشق زدہ، سوختہ جاں، ہجر گزیدہ : از فاروق درویش

[سیدہ سارا غزل]

ہم عشق زدہ، سوختہ جاں، ہجر گزیدہ
وہ کعبہ ء جاں حسن کہ دیدہ نہ شنیدہ

زلفوں کے حجاب اٹھے کہ میخانے کھلے ہیں
آتش ہے شب ِ وصل کہ مشروب ِ کشیدہ

نورنگی ء دوراں ہے کہ نیرنگ ِ زمانہ
ہر شکل ہے صد چہرہ مگر عکس ندیدہ

اک شہر ِ مقفل ہے جہان ِ شب ِ جاناں
دل دشت میں بھٹکا ہوا آہوئے رمیدہ

ہم کوفہ ء احباب کے صحرا کے مسافر
کہتے ہیں ہمیں اہل ِجنوں اشک چکیدہ

نکلے ہیں سوئے دار غزالان ِ سحر خیز
دل راکھ ،جگر چاک، گریبان دریدہ

درویش قتیل عشق کے مر کر نہیں مرتے
بنتی ہے شجر خاک میں مل شاخ ِ بریدہ

(فاروق درویش)

 

[الف عین]

زبردست، لیکن فاروق درویش صاحب کہاں غائب ہیں

 

[الف نظامی]

زبردست، لیکن فاروق درویش صاحب کہاں غائب ہیں

کچھ پابندی۔۔۔

 

[سید زبیر]

واہ
نورنگئ دوراں ہے کہ نیرنگِ زمانہ
ہر شکل ہے صد چہرہ مگر عکس ندیدہ
بہت اعلیٰ