ہیچ ہے ۔۔۔ (مولانا حالی کے ایک شعر پر تضمین)۔۔خالد علیم

[نوید صادق]

خالد علیم​

ہیچ ہے

(مولانا حالی کے ایک شعر پر تضمین)

جس طرح اک صید‘ صیادوں کے آگے ہیچ ہے
شاعری میری سب اُستادوں کے آگے ہیچ ہے
جانتا ہوں میں کہ یہ میری دکانِ شیشہ گر
وقت کے آئینہ آبادوں کے آگے ہیچ ہے
یہ مرا فکرِ سخن آثار‘ اندازِ جدید
فکر و فن کی کہنہ بنیادوں کے آگے ہیچ ہے
سنگ زارِ فن پہ میرے لفظ کی تیشہ زنی
کوہسارِ فن کے فرہادوں کے آگے ہیچ ہے
جانتا ہوں‘ یہ مرا طرزِ ادا‘ رنگِ صدا
مانیوں کے اور بہزادوں کے آگے ہیچ ہے
جانتا ہوں یہ کہ میرے عشق کی اُفتاد بھی
عشق کی سب اگلی اُفتادوں کے آگے ہیچ ہے
شعر میں گریہ گزاری‘ نالہ پیمائی مری
میر کی دلدوز فریادوں کے آگے ہیچ ہے
میری ساری شاعری‘ آزاد کیا‘ پابند کیا!
غالب و آتش سے آزادوں کے آگے ہیچ ہے

پھر بھی شرح جاں ہے یہ فرمودہء حالی مجھے
”گو کہ حالی اگلے اُستادوں کے آگے ہیچ ہے
کاش ہوتے ملک میں ایسے ہی اب دوچار ہیچ“​

۔۔۔۔۔۔۔۔۔۔۔۔۔۔۔۔۔۔۔۔۔۔۔۔
-----------------------------------------------------------------
(خالد علیم)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مطبوعہ ماہنامہ بیاض

 

[فرخ منظور]

بہت خوب نوید صاحب! واقعی ہیچ ہے

 

[محمود احمد غزنوی]

غالبِ خستہ بھی اس محفل میں آکر رو اُٹھے
سب سخن آرائی نقّادوں کے آگے ہیچ ہے

 

[فاتح]

کاش ہوتے ملک میں ایسے ہی اب دوچار ہیچ
بہت خوب

 

[عمران شناور]

بہت اچھی غزل ہے۔ شکریہ

 

[مغزل]

اور ہمار ی داد ’’ استادوں‌‘‘ کے آگے ہیچ ہے ۔
خوب نوید بھائی ، شکریہ