مہ جبین
محفلین
یاد میں جس کی نہیں ہوش تن و جاں ہم کو
پھر دکھا دے وہ رخ اے مہر فروزاں ہم کو
دیر سے آپ میں آنا نہیں ملتا ہے ہمیں
کیا ہی خود رفتہ کیا جلوہء جاناں ہم کو
جس تبسم نے گلستاں پہ گرائی بجلی
پھر دکھا دے وہ ادائے گلِ خنداں ہم کو
عرش جس خوبیء رفتار کا پامال ہوا
دو قدم چل کے دکھا سرد خراماں ہم کو
شمعِ طیبہ سے میں پروانہ رہوں کب تک دور
ہاں جلا دے شررِ آتشِ پنہاں ہم کو
خاک ہوجائیں درِ پاک پہ حسرت مٹ جائے
یا الٰہی نہ پھرا بے سر و ساماں ہم کو
میرے ہر زخمِ جگر سے یہ صدا آتی ہے
اے ملیحِ عربی کردے نمکداں ہم کو
سیرِ گلشن سے اسیرانِ قفس کو کیا کام
نہ دے تکلیف چمن بلبلِ بستاں ہم کو
گر لبِ پاک سے اقرارِ شفاعت ہوجائے
یوں نہ بے چین رکھے جوششِ عصیاں ہم کو
نیرِ حشر نے اک آگ لگا رکھی ہے
تیز ہے دھوپ ملے سایہء داماں ہم کو
رحم فرمائیے یا شاہ کہ اب تاب نہیں
تابکے خون رلائے غمِ ہجراں ہم کو
پردہ اس چہرہء انور سے اٹھا کر اک بار
اپنا آئینہ بنا اے مہِ تاباں ہم کو
اے رضا وصف رخِ پاک سنانے کے لئے
نذر دیتے ہیں چمن مرغ غزل خواں ہم کو
اعلیٰ حضرت الشاہ امام احمد رضا خان فاضلِ بریلوی رحمۃ اللہ علیہ
ِ
