اس گریفائٹ کے بارے میں کچھ معلومات ملیں تو ۔۔۔ کیا مجھ جیسا آدمی اس کو استعمال کر پائے گا
گریفائٹ ایک ذہین فونٹ ٹیکنالوجی ہے جس کا بنیادی مقصد ایسی اقلیتی زبانوں کو سپّورٹ کرنا ہے جن کے لکھنے کے قوانین اپنے خط/سکرپٹ کے روایتی اصولوں سے کچھ مختلف ہوں،یا جن کا سکرپٹ بہت ہی نایاب/اچھوتا ہو۔ البتہ آپ اسے مشہور زبانوں/سکرپٹس کے لیے بھی استعمال کر سکتے ہیں، مثلاً انگریزی، عربی، وغیرہ۔
گریفائٹ اور اوپن ٹائپ میں ایک واضح فرق یہ ہے کہ اوپن ٹائپ فونٹس میں محض گلِفس کی میپنگ، تبدیلی، اور جگہ وغیرہ کی معلومات ہوتی ہیں اور سکرپٹ کی شیپنگ کے اصول اوپن ٹائپ لےآؤٹ انجن (جیسے حرف باز، یا مائکروسوفٹ کا ڈائریکٹ رائٹ) میں کوڈ کیے جاتے ہیں۔ فرض کریں کہ اس وقت مائیکروسوفٹ کے ڈائریکٹ رائٹ انجن میں صرف رومن سکرپٹ کی سپّورٹ موجود ہے۔ اب اگر اس انجن کو ایک عربی فونٹ تھما دیا جائے تو وہ اس وقت تک ناکام رہے گا جب تک عربی خط کی شیپنگ کی تفصیل اس انجن میں شامل نہیں کر دی جاتی۔ عربی سپّورٹ کے بعد وہ انجن رومن اور عربی کو تو سنبھال لے گا، لیکن جب کسی دیوناگری فونٹ کی باری آئے گی تو ایک مرتبہ پھر ناکام ہو جائے گا۔ یوں اوپن ٹائپ نظام میں صرف فونٹ کی موجودگی کافی نہیں ہوتی، بلکہ ایک عدد لےآؤٹ انجن بھی درکار ہوتا ہے جو فونٹ کو اس کے مطلوبہ سکرپٹ کے اصولوں کے مطابق شکل دے سکے۔
گریفائٹ میں شیپنگ کے تمام اصول بھی فونٹ ہی میں موجود ہوتے ہیں۔ چنانچہ اگر ایک ایپلیکیشن گریفائٹ نظام کو سپّورٹ کرتی ہے تو باقی سب کام فونٹ کا ہے۔ سکرپٹ چاہے رومن، عربی، دیوناگری، کانجی، کچھ بھی ہو، فونٹ ہی کے اندر اس کی شیپنگ کی تفصیل موجود ہوتی ہے۔ یوں اگر آپ کوئی نیا (یا نایاب) سکرپٹ بھی لے آئیں، تو کوئی بھی ایپلیکیشن جو گریفائٹ فونٹس کو پڑھنا جانتی ہو، اس فونٹ کو اس کے سکرپٹ کے درست اصولوں کے مطابق بآسانی استعمال کر لے گی کہ سب کچھ خود فونٹ کے اندر ہی موجود ہے۔ (یہاں آپ اندازہ لگا سکتے ہیں کہ اقلیتی زبانوں کے لیے ایسے سیٹ اَپ کی اہمیت کیوں ہے۔)
گریفائٹ فونٹس بنانے کے لیے عام طور پر GDL (گریفائٹ ڈسکرپشن لینگوئج) کا سہارا لیا جاتا ہے۔ GDL اڈوب کی
AFDKO کے فیچر فائل سنٹیکس سے ملتی جلتی ایک زبان ہے جس میں آپ اپنے فونٹ کے ’ذہین‘ عمل کو بیان کرتے ہیں۔ پھر GDL میں لکھی یہ ہدایات اور ایک ٹروٹائپ فونٹ اِن پُٹ کے طور پر
گریفائٹ کمپائلر کو مہیا کیے جاتے ہیں، جس کے نتیجے میں ایک گریفائٹ فونٹ تخلیق ہوتا ہے۔ پھر وہ گریفائٹ فونٹ کسی بھی
ایسی ایپلیکیشن، جس میں گریفائٹ کی سپّورٹ موجود ہو، میں استعمال ہو سکتا ہے۔
ایک ٹُول
Graide کے نام سے بھی دستیاب ہے جس میں آپ ایک گرافل انٹرفیس استعمال کرتے ہوئے گریفائٹ فونٹس بنا سکتے ہیں، لیکن یہ ٹُول ابھی ابتدائی مراحل میں ہے۔
GDL یا Graide دونوں کے لیے
ٹیوٹوریلز بھی موجود ہیں، جبکہ GDL کی
ڈاکیومینٹیشن بھی دستیاب ہے۔
مزید تفصیلات کے لیے آپ
گریفائٹ کی ویب سائٹ کا مطالعہ کر سکتے ہیں۔
