آج کا شعر - 3

[راجہ صاحب]

فکرِ معاش ، شاعری ، اس پر تمھاری یاد
اک تو سزا سی زندگی، اس پر تمھاری یاد
دوکام ایک ساتھ بھلا کس طرح کروں
دن بھر کسی کی نوکری ، اس پرتمھاری یاد

قیصر وجدی

 

[مغزل]

ایک محبت کافی ہے
باقی عمر اضافی ہے

محبوب خزاں (اکیلی بستیاں)

 

[راجہ صاحب]

مرنے کا ترے غم میں‌ارادہ بھی نہیں‌ہے
ہے عشق مگر اتنا زیادہ بھی نہیں ہے

امجد اسلام امجد

 

[مغزل]

اصل پر فرق کچھ نہیں پڑتا
ہیں عجب تو عجب گزرتے ہیں

لوگ ہی لوگ بے شمار و قطار
چند اہلِ ادب گزرتے ہیں

دیکھنا ہے تو دیکھتے رہئے
کب وہ آتے ہیں کب گزرتے ہیں

شاہد حمید

 

[راجہ صاحب]

غیروں سے کیا گِلا ہو کہ اپنوں کے ہاتھ سے
ہے دوسروں کی آگ مرے گھر لگی ہوئی

لازم ہے مرغِ بادنما بھی اذان دے
کلغی تو آپ کے بھی ہے سر پر لگی ہوئی


احمد فراز

 

[فرحت کیانی]

جامد نہیں گر وقت ، تو حیراں ہوں کہ اس میں
امروز ہی امروز ہے، فردا نہیں آتا

احمد ندیم قاسمی

 

[راجہ صاحب]

اپنے بے خواب کواڑوں کو مقفل کر لو
اب یہاں، کوئی نہیں، کوئی نہیں آئے گا

 

[فرخ منظور]

پیدا کیا ہر ایک کو اِک کام کے لئے
اُس کو جفا سے کام ہے مجھ کو وفا سے کام
(مصحفی)

 

[راجہ صاحب]

گم ہوا جاتا ہے کوئی منزلوں کی گرد میں
زندگی بھر کی مسافت رائیگاں ہونے کو ہے

عطا الحق قاسمی

 

[مغزل]

آئے ہیں میر منھ کو بنائے خفا سے آج
شاید بگڑ گئی ہے کچھ اُس بے وفا سے آج

ساقی ٹک ایک موسم گُل کی طرف بھی دیکھ
ٹپکا پڑے ہے رنگ چمن میں ہوا سے آج

تھا جی میں اُس سے ملیے تو کیا کیا نہ کہیے میر
پرکچھ کہا گیا نہ غمِ دل، حیا سے آج

میر

 

[راجہ صاحب]

در پہ رہنے کو کہا اور کہہ کے کیسا پھر گیا
جتنے عرصے میں مرا لپٹا ہوا بستر کھلا

 

[فرخ منظور]

؂
اللہ ری بیخودی کہ ترے پاس بیٹھ کر
تیرا ہی انتظار کیا ہے کبھی کبھی
(نامعلوم)

 

[مغزل]

باغ کا باغ ہی آپ کی ہوسِ دسترس میں‌ہے
ایک غریب نے اگر پھول اٹھا لیا تو کیا !!!!

عبیداللہ علیم

 

[سارہ خان]

چہرے سجے سجے ہیں تو دل ہیں بجھے بجھے
ہر شخص میں تضاد ہے دن رات کی طرح

 

[محمداحمد]

ہم کیا کسی کے حسن کا صدقہ اُتارتے
اک زندگی ملی تھی سو خیرات کی طرح

 

[مغزل]

یک بیک ختم ہوا اس کی رفاقت کا شمار
گننے والا میں‌غلط تھا کہ شمار ایسا تھا

سرور جاوید

’’ اردو سےمحبت کرنے والوں کی محفل ‘‘ ایس تنویر جذباتی فیصلے کے تحت ’’ شٹ ڈاؤن ‘‘ کردی گئی ۔ اسی موقع پر یہ شعر

 

[مغزل]

عجیب ہوتے ہیں آدابِ رخصتِ محفل
کہ اٹھ کے وہ بھی چلا جس کا گھر نہ تھا کوئی

پروفیسر سحر انصاری

 

[راجہ صاحب]

کچھ تو ہوتے ہیں محبت میں جنوں کے انداز
اور کچھ لوگ بھی دیوانہ بنا دیتے ہیں


ہو سکتا ہے الفاظ اوپر نیچے ہو گئے ہوں

 

[آبی ٹوکول]

میں شجر ہوں شہر ملال کا میری ٹہنیوں کو نہال کر
کبھی بھیج اپنی نوازشیں کسی جام ابر میں ڈال کر
میرے بے جواز وجود پر تیری رحمتوں کا جواز ہیں
وہ ندامتیں جنھے آنکھ میں کبھی رکھ لیا تھا سنبھال کر

 

[ساقی۔]

ہم ایسے بھی گئے گزرے نہیں ہیں
ہمارے ساتھ یہ کیا ہو رہا ہے!