آنکھ،آنکھیں

[شمشاد]

اسے دیکھنے کی جو لو لگی، تو قتیل دیکھ ہی لیں گے ہم
وہ ہزار آنکھ سے دور ہو، وہ ہزار پردہ نشیں سہی
(قتیل شفائی)

 

[راجہ صاحب]

بچ بچا کر کوزہ گر کی آنکھ سے
چاک پر خود کو دوبارہ رکھ دیا

منصور آفاق

 

[جاسمن]

آنکھ رنجیدگی سے بھر آئی
آج سُننے کو وہ خبر آئی

بشیر بدؔر

 

[زیرک]

تری آنکھ پھرتے ہی کیسا پھرا ہے
مری راہ پر آسماں آتے آتے
داغ دہلوی

 

[لاريب اخلاص]

مَر کے بھی دیکھتے رہنے کی چاہ میں
آنکھیں کسی کو دے گیا تاکید کر کے

 

[جاسمن]

دیکھنا چھوڑے نہیں خواب مری آنکھوں نے
پورا ہر چند کوئی خواب نہیں ہو پایا
جاوید نسیمی

 

[جاسمن]

ایک چہرہ ہے جو آنکھوں میں بسا رہتا ہے
اک تصور ہے جو تنہا نہیں ہونے دیتا
جاوید نسیمی

 

[جاسمن]

طلب کریں تو یہ آنکھیں بھی ان کو دے دوں میں
مگر یہ لوگ ان آنکھوں کے خواب مانگتے ہیں
عباس رضوی

 

[جاسمن]

آنکھ رکھے ہوئے ستارے پر
کشتیاں جا لگیں کنارے پر
احمد سجاد بابر

 

[جاسمن]

جھیل آنکھوں میں سرمگیں آنسو
چاند بے خود تھا اس نظارے پر
احمد سجاد بابر

 

[سیما علی]

اے خدا جو بھی مجھے پندِ شکیبائی دے
اس کی آنکھوں کو مرے زخم کی گہرائی دے

اتنا بے صرفہ نہ جائے مرے گھر کا جلنا
چشمِ گریاں نہ سہی چشمِ تماشائی دے

فراز

 

[سیما علی]

یہ دشتِ ہجر، یہ وحشت یہ شام کے سائے
خدا یہ وقت تری آنکھ کو نہ دکھلائے

اسی کے نام سے لفظوں میں چاند اترے ہیں
وہ ایک شخص کہ دیکھوں تو آنکھ بھر آئے

امجد اسلام امجد

 

[سیما علی]

ٹھہرتی ہی نہیں آنکھیں جاناں
تیری تصویر کی زیبائی پر

سطح کے دیکھ کے اندازے لگیں
آنکھ جاتی نہیں گہرائی پر

پروین شاکر

 

[سیما علی]

کیا میں بھی پریشانیِ خاطر سے قریں تھا
آنکھیں تو کہیں تھیں دلِ غم دیدہ کہیں تھا

کس رات نظر کی ہے سوئے چشمکِ انجم
آنکھوں کے تلے اپنے تو وہ ماہ جبیں تھا

نام آج کوئی یاں نہیں لیتا ہے انہوں کا
جن لوگوں کے کل ملک یہ سب زیرِ نگیں تھا

میر

 

[سیما علی]

اس ایک خواب کی حسرت میں جل بجھیں آنکھیں
وہ ایک خواب کہ اب تک نظر نہیں آیا

افتخار عارف

 

[سیما علی]

انہیں کبھی نہ بتانا میں ان کی آنکھیں ھوں
وہ لوگ پھول سمجھ کر مجھے مسلتے ھیں

کئ ستاروں کو میں جانتا ھوں بچپن سے
جہاں بھی جائوں میرے ساتھ ساتھ چلتے ھیں

(بشیر بدر)

 

[سیما علی]

ایك جلوہ تھا كلیم طور سینا كے لیے
تو تجلی ہے سراپا چشم بینا كے لیے

علامہ اقبال

 

[یاسر شاہ]

بہتا آنسو ایک جھلک میں کتنے روپ دکھائے گا
آنکھ سے ہو کر گال بھگو کر مٹی میں مل جائے گا
احمد مشتاق

 

[ارشد رشید]

آنکھ برسی ہے ترے نام پہ ساون کی طرح

جسم سلگا ہے تری یاد میں ایندھن کی طرح

مرتضی برلاس​

(یہ غزل کسی پاکستانی گلوکار نے بہت خوبصورتی سے گائی ہے،کسی کو کوئی اتہ پتہ ۔۔۔۔!)

یہ غزل کلیم عثمانئ کی غزل
"رات پھیلی ہے تیرے سرمئی آنچل کی طرح" کی زمین میں ہے اور اُسے ملکہ ترنم نورجہاں نے بڑی خوبصورتی سے گایا ہے - مرتضیٰ برلاس کی غزل بھی کچھ لوگوں نے گائی ہے پر وہ اتنی مشہور نہیں -