آپ کے پسندیدہ اشعار!

[طارق شاہ]

اتفاقاتِ زمانہ بھی عجب ہیں ناصر
آج وہ دیکھ رہے ہیں، جو سُنا کرتے تھے

ناصر کاظمی ​

 

[طارق شاہ]

یہ اُداسیوں کے موسم یونہی رائیگاں نہ جائیں
کسی یاد کو پُکارو کسی درد کو جگاؤ

یہ جُدائیوں کے رستے بڑی دور تک گئے ہیں
جو گیا وہ پھر نہ آیا، مِری بات مان جاؤ

احمد فراز ​

 

[طارق شاہ]

گلاب ہاتھ میں ہو ، آنکھ میں سِتارہ ہو​

کوئی وجودِ محبّت کا استعارہ ہو​

​

کبھی کبھار اُسے دیکھ لیں، کہیں مِل لیں​

یہ کب کہا تھا، کہ وہ خوش بدن ہمارا ہو​

​

پروین شاکر ​

 

[طارق شاہ]

دل عجب شہر کہ جس پر بھی کھُلا در اِس کا​

وہ مُسافر اِسے ہر سمت سے برباد کرے​

​

اپنے قاتل کی ذہانت سے پریشان ہُوں میں​

روز اِک موت نئے طرز کی ایجاد کرے​

​

پروین شاکر ​

 

[طارق شاہ]

بہت لطیف اِشارے تھے چشمِ ساقی کے!
نہ میں ہُوا کبھی بے خود، نہ ہوشیار ہُوا

اصغر گونڈوی

 

[طارق شاہ]

اُس جلوۂ بے کیف سے محروم ہی رکھا!
کمبخت کبھی ہوش، کبھی بے خبری نے

اصغر گونڈوی

 

[طارق شاہ]

تحسین ہے لب پر تِرے دشنام نہیں ہے
الزامِ تمنّا کوئی الزام نہیں ہے

خُوبی تِری بے قید ہے خواہش مِری بیحد
اِن دونوں کے آغاز کا انجام نہیں ہے

حسرت موہانی

 

[طارق شاہ]

کعبہ نہیں، کہ ساری خُدائی کو دخل ہو
دل میں سِوائے یار کسی کا گُزر نہیں

یاس یگانہ چنگیزی

 

[طارق شاہ]

ہم سادہ ہی ایسے تھے، کی یوں ہی پذیرائی
جس بار خزاں آئی، سمجھے کہ بہار آئی

اُمیدِ تلطّف میں رنجیدہ رہے دونوں
تُو اور تِری محفل، میں اور مِری تنہائی

فیض احمد فیض

 

[طارق شاہ]

مثالِ زینۂ منزل بکارِ شوق آیا
ہر اِک مقام، کہ ٹُوٹی جہاں جہاں پہ کمند

فیض احمد فیض

 

[طارق شاہ]

اِس انجمن میں دیکھیے اہلِ وفا کے ظرف
کوئی ادا شناس ہے، کوئی ادا شکار

آتا ہے خود ہی چوٹ پہ صیدِ سُبک مُراد
ہوتا ہے ورنہ کون زکارِ قضا شکار

مجید امجد

 

[فرقان احمد]

دن رات ظرفِ وقت میں ڈھلتی ہے زندگی
مٹتی نہیں ۔۔۔۔۔۔۔ لباس بدلتی ہے زندگی

سکندر علی وجد

 

[فرقان احمد]

تعبیر جس کو موت سے کرتے ہیں بے خبر
تبدیلیء مقام ہے ۔۔۔۔۔۔مرتا نہیں کوئی
دریائے زندگی ہے دما دم رواں دواں
ڈوبے بغیر ۔۔۔۔پار اترتا نہیں کوئی

سکندر علی وجد

 

[فرقان احمد]

تصویر کائنات ابھی ناتمام ہے
قدرت کو روز نقش بدلنے سے کام ہے

سکندر علی وجد

 

[فرقان احمد]

جنوں میں موج برق کا جو رخ ذرا بدل گیا
غبار نور شعلہ بار پیکروں میں ڈھل گیا
خودی کی جب ہوا چلی تو سب کا دل مچل گیا
کوئی ادھر نکل گیا کوئی ادھر نکل گیا
ابھی چھڑا نہیں ربابِ داستان زندگی
عدم کی گرد میں نہاں ہے کاروان زندگی
انھیں میں تھی زمین بھی ایک شعلہ شرر فشاں
بجھی ہزارہا برس میں مدتوں اٹھا دھواں
یہ رات جب کٹی تو کوہ و دشت و جو ہوئے عیاں
دیا سمندروں کو آفتاب نے پیام جاں
بنی اسی عمل سے سطح آب کان زندگی
عجیب شان سے رواں ہے کاروان زندگی
کھلی ہے مدتوں کے بعد اب زبان زندگی
عدم کے بت کدے میں دی گئی اذان زندگی


سکندر علی وجد

 

[فرقان احمد]

رہبر کی ضرورت نہیں یہ ایسا سفر ہے
منزل کا پتہ دیتے ہیں کچھ نقشِ قدم بھی

فاطمہ تاج

 

[طارق شاہ]

ان گنت امروں میں ، اور کیا ہے تِرے دل کے لئے
اک جیون ہار ڈر سا ہے ترے دل کے لئے

اپنے ضمیروں کے ثمر ہیں، پستیاں، سچائیاں
جانے تِرے ذہن میں کیا ہے، تِرے دل کے لئے

مجید امجد

 

[طارق شاہ]

تمھاری جیت تو جب تھی دلوں میں گھر کرتے
زباں سے ہار نہ مانیں گے ہارنے والے

یاس یگانہ چنگیزی

 

[طارق شاہ]

تمہارے دم سے سلامت ہیں ولولے دل کے
سزا کے بعد خطا پر اُبھارنے والے

یاس یگانہ چنگیزی

 

[طارق شاہ]

نہ جانے کیا ہو، یہ دیوانہ جس جگہ بیٹھے
خودی کے نشّے میں کچھ اَن کہی نہ کہہ بیٹھے

اُمیدوار ہیں احسانِ دوست کے ہم بھی !
وفا کی داد نہ دے، بے وفا ہی کہہ بیٹھے

یاس یگانہ چنگیزی