انتخاب قابل اجمیری

[نوید صادق]

بھڑک اٹھی ہیں شاخیں، پھول شعلے بنتے جاتے ہیں
ہمارے آشیانوں سے کہاں تک روشنی ہوتی

 

[نوید صادق]

صحنِ گلشن نہ سہی گوشۂ زنداں ہی سہی
قافلے راہ میں آرام لیا کرتے ہیں

 

[نوید صادق]

ہمارا کیا ہمیں تو ڈوبنا ہے ڈوب جائیں گے
مگر طوفان جا پہنچا لبِ ساحل تو کیا ہو گا

 

[نوید صادق]

شوق ہو راہنما تو کوئی مشکل نہ رہے
شوق مشکل سے مگر راہنما ہوتا ہے
رخصتِ دوست پہ قابل دلِ مایوس کو دیکھ
اک سفینہ ہے کہ ساحل سے جدا ہوتا ہے

 

[نوید صادق]

جلوہ گاہِ یار سے بھی تشنہ کام آئے ہیں لوگ
جانے امیدیں زیادہ ہیں کہ جلوے کم رہے

 

[نوید صادق]

ہمیشہ شمع بھڑکے گی، سدا پیمانہ چھلکے گا
تری محفل میں ہم چھوڑ آئے ہیں جوشِ بیاں اپنا
جمالِ دوست کو پیہم نکھرنا ہے، سنورنا ہے
محبت نے اٹھایا ہے ابھی پردہ کہاں اپنا

 

[نوید صادق]

بہت ہیں میکدے میں لڑکھڑانے جھومنے والے
وقارِ لغزشِ پیرِ مغاں کچھ اور ہوتا ہے
بہت دلچسپ ہیں ناصح کی باتیں بھی مگر قابل
محبت ہو تو اندازِ بیاں کچھ اور ہوتا ہے

 

[نوید صادق]

ہنسی معلوم ہوتی ہے فغاں معلوم ہوتی ہے
محبت زندگی کی داستاں معلوم ہوتی ہے

 

[نوید صادق]

راہ پرخار ہے اور رات اندھیری قابل
دور تک کوئی چراغِ رخِ زیبا بھی نہیں

 

[نوید صادق]

اپنے گلشن میں جب بہار آئی
کوئی شائستہ بہار نہ تھا

 

[نوید صادق]

درِ زنداں پہ کس نے دستک دی
آج موسم بہار سا کیوں ہے

 

[نوید صادق]

باغ تک پہونچی بیابانوں کی خاک
تیرا دیوانہ کہاں ہے آج کل

 

[نوید صادق]

جانے کیا ہو پلک جھپکنے میں
زندگی جاگتی ہی رہتی ہے
جھوٹے وعدوں کی لذتیں مت پوچھ
آنکھ در سے لگی ہی رہتی ہے

 

[نوید صادق]

عجیب چیز ہے خاکسترِ محبت بھی
ذرا کسی نے چھوا اور آگ ابھر آئی

 

[نوید صادق]

نہیں یہ ہوش کہ کیونکر ترے حضور آیا
بس اتنا یاد ہے ٹھکرا دیا تھا دنیا نے

 

[نوید صادق]

دن نکلتا ہے کس تمنا میں
رات کس آسرے پہ آتی ہے
جب وہ گیسو بکھیر دیتے ہیں
زندگی راہ بھول جاتی ہے

 

[نوید صادق]

انتخاب علامہ طالب جوہری

چشمِ میگوں پہ ہیں سیہ پلکیں
یا گھٹائیں شراب خانے پر

 

[نوید صادق]

وہ ہر مقام سے پہلے وہ ہر مقام کے بعد
سحر تھی شام سے پہلے سحر ہے شام کے بعد

مجھی پہ اتنی توجہ مجھی سے اتنا گریز
مرے سلام سے پہلے مرے سلام کے بعد

چرغِ بزمِ ستم ہیں ہمارا حال نہ پوچھ
جلے تھے شام سے پہلے بجھے ہیں شام کے بعد

یہ رات کچھ بھی نہیں تھی یہ رات سب کچھ ہے
طلوعِ جام سے پہلے طلوعِ جام کے بعد

رہِ طلب میں قدم لڑکھڑا ہی جاتے ہیں
کسی مقام سے پہلے کسی مقام کے بعد

 

[نوید صادق]

رفتہ رفتہ رنگ لایا جذبہ خاموشِ عشق
وہ تغافل کرتے کرتے امتحاں تک آ گئے

خود تمہیں چاکِ گریباں کا شعور آ جائے گا
تم وہاں تک آ تو جاؤ ہم جہاں تک آ گئے

آج قابل میکدے میں انقلاب آنے کو ہے
اہلِ دل اندیشۂ سود و زیاں تک آ گئے

 

[نوید صادق]

ٹھنڈے پڑے ہیں انجمنِ رنگ کے چراغ
اک نغمہ بہار بطرزِ فغاں سہی