تجلیات از حافظ مظہر الدین مظہر

[الف نظامی]

میں بے نوا عجمی ، شاہِ انبیا عربی
کرشمہ ساز ہے اے عشق تیری بے سببی

ازل سے فطرتِ بوجہل و ذوقِ بولہبی
ہے ناشناسِ مقامِ محمدِ عربی

ہے رشکِ کوثر و تسنیم تیری ایک نظر
ترے کرم کی ہے محتاج میری تشنہ لبی

بس اک تجلی ء دیوانه ساز و بنده نواز
بس ایک جلوه ء رنگین به خاکِ تیره شبی

ادب ادب نگہِ شوق! یہ مدینہ ہے
یہاں نظر کی بھی آوارگی ہے بے ادبی

جہاں میں عام ہے فیضان میرے ساقی کا
حبش کا جامِ سیہ ہو کہ شیشہ ء حلبی

حضور ہی کی نوازش ہے میرا کربِ مُدام
حضور ہی کی عطا ہے مری سکوں طلبی

مری نگاہ میں وہ رشک طور و ایمن ہے
وہ دل کہ جس میں ہے عشقِ نبی کی آگ دبی

یہی جہاں میں ہے پہچان مردِ مومن کی
زبان پر زمزمه ء حمد ، لب پر نعتِ نبی

زہے نصیب کہ روزِ ازل سے ہوں مظہر
غلامِ سیدِ لولاک ، بنده ء عربی​

 

[الف نظامی]

مولی کی رحمتوں کا خزینہ نظر میں ہے
تقل علی کہ شہر مدینہ نظر میں ہے

طوفاں نظر میں ہے نہ سفینہ نظر میں ہے
تیرا کرم ہی شاہ مدینہ نظر میں ہے

اب بام و در ہیں شہر نبی کے نگاہ میں
طیبہ کا ایک ایک قرینہ نظر میں ہے

دیکھے کوئی حضور کی بندہ نوازیاں
مجھ سا ذلیل، مجھ سا کمینہ نظر میں ہے

حُسنِ ازل ، فروغِ ابد دیکھتا ہوں میں
رنگینی ء جمالِ مدینہ نظر میں ہے


یا رب ! نواز دولت سوز و گداز سے
بوذر کا دل، بلال کا سینہ نظر میں ہے

بنتِ رسول ! تیری غذا یا د ہے مجھے
نانِ شعیر و نانِ شبینہ نظر میں ہے

جس میں عرب کا مہرِ مبیں جلوہ گر ہوا
صدیوں کے بعد بھی وہ مہینہ نظر میں ہے

اب میری چشمِ شوق پہنچتی ہے عرش تک
معراج جانے والے کا زینہ نظر میں ہے

بنده نواز ! بندہ نوازی سے کام لے
بنده نوازیوں کا قرینہ نظر میں ہے

دل کیا ہے ؟ ایک مخزنِ اسرارِ مصطفیٰ
یہ گنجِ معرفت، یہ خزینہ نظر میں ہے

مظہر تصورات کی دنیا ہے عطر بیز
محبوبِ کبریا کا پسینہ نظر میں ہے​

 

[الف نظامی]

ندیم ! آج مدینے کی گفتگو ہو جائے
ہو آنکھ اشک فشاں ، دل لہو لہو ہو جائے

ارادہ ہے کہ مدینے پہنچ کے نعت پڑھوں
دل و نگاہ کی تقدیس باوُضو ہو جائے

مرے لئے ہے جہنم کہ خلد داورِ حشر؟
جو آج ہونا ہے وہ اُن کے روبرو ہو جائے

فسانہ ہجر کا پیشِ حضور اشک کہیں
زباں خموش ہو اور شرحِ آرزو ہو جائے

محال ہے کہ مزوِّز! نبی کا دیوانہ
مدینہ سامنے ہو اور قبلہ رو ہو جائے

حرم کے خاک نشینوں کی بھی بلائیں لیں
سگانِ طیبہ سے بھی دل کی گفتگو ہو جائے

یہی ہے اب تو تمنا کریم ابنِ کریم
کہ دل سے محو ، یہ دنیائے کاخ و کو ہو جائے

عطا ہو تیرے ثناخواں کو ایسی سرمستی
کہ مست میری نواوں سے چار سو ہو جائے

زوال فکر و نظر ہے خرد کی بے کیفی
جنونِ عشق نوا سنج کو بہ کو ہو جائے

مرے سبوچہ و ساغر میں مستیاں بھر دے
امینِ کیف مرا جام اور سبو ہو جائے

گناہگار کو مطلوب ہے اگر رحمت
گناہگار خجل اُن کے روبرو ہو جائے

مقامِ بدر ہے ، یہ احد کی منزل ہے
اِدھر بھی آو کہ تھوڑی سی ہاوہو ہو جائے

یہ غارِ ثور کے جلوے ہیں ، یہ حرا کا مقام
یہاں بھی دیدہ ء نم ناک باوُضو ہو جائے

صفا و مروہ کے میداں میں اِس طرح دوڑیں
کہ عشق غلغلہ انداز چار سو ہو جائے

عجیب شانِ خدا جنت البقیع میں ہے
یہاں بھی آ کے مرا عشق سرخ رو ہو جائے

حریم حق میں تو لبیک کی صدائیں تھیں
یہ ہے مدینہ ، یہاں ختم گفتگو ہو جائے

کرم ہو اُن کا تو بھر جائے دامنِ مظہر
نظر کریں تو ہر اِک چاکِ دل رفو ہو جائے​

 

[الف نظامی]

ز ہوائے اُو نسیما ! دلِ غنچہ را کشودے
بہ رساں بہ اُو سلامے بہ رساں بہ اُو درودے

اگر آں کرم نمائے نہ بہ من کرم نمودے
دلِ درد آشنائے بہ کنارِ من نہ بودے

زہے عابدے کہ خواند بہ حریمِ اُو نمازے
زہے ساجدے کہ ریزد بہ زمینِ اُو سجودے

ز سوادِ زلفِ شاہے رخِ شام رنگ گیرد
ز فروغِ عارضِ اُو رخِ صبح را نمودے

ز گروہِ شہر یاراں چہ کشودِ کار جویم؟
شہِ مرسلاں ! بخواہم ز نگاہِ تو کشودے

دلِ ذرہ ذرہ دارد ز خرامِ اُو نشانے
اے جبینِ شوق آور! بہ دیارِ اُو سجودے

دلِ عرشیاں گدازم ، دلِ فرشیاں بہ سوزم
بنواز زاں نوائے ، بنواز زاں سرودے

پئی من شدہ است مظہر ز ازل پناہ گاہے
حَرمِ جمالِ پاکے ، درِ سیدُ الوجودے

​

 

[الف نظامی]

ابو تراب
ازل کی مستی ء رقصاں ابد کا کیف و سرور
ظہورِ سرِّ ولایت، نمودِ عشقِ غیور

تلاطمِ یم ہستی، تموّج انوار
عرب مطلعِ رنگیں پہ زمزموں کی پھوار

جلالِ چہره یزداں، جمال روئے رسول
فروغ صبح تجلی، سکونِ قلب ملول

قسیمِ کوثر و تسنیم کی ادائے جمیل
حریمِ قدس کا محرم نبی کے گھر کا کفیل

نگاہدارِ نبوت، عالی کش ایام
بہ رزم قہر الہی، بہ بزم لطفِ تمام

بدوش خواجہ ولایت کا منتہائے کمال
زمانہ لا نہ سکے گا کبھی علی کی مثال

علی کے نور سے مردانِ حُر تجلی گیر
علی کا فقر ہے بدر و حنین کی توقیر

علی کا عزم ہے جزات فزائے اہلِ حرم
علی نصیر و علی ناصر و علی محکم

علی کا زور ہے مرحب شکار و کفر شکن
علی کی ضرب سے خیبر کے معرکے کی پھبن

علی ہے معنی ء ام الکتاب و نفسِ رسول
علی لطیف ، علی حسنِ علت و معلول

علی ہے مظہر تقویمِ جملہ موجودات
علی ہے نورِ الہی ، علی ہے پرتوِ ذات

علی شہید و علی شاہد و علی مشہود
علی وجود و علی واجد و علی موجود

علی علیم و علی عالم و علی معلوم
علی قسیم و علی قاسم و علی مقسوم

علی خبیر و علی مخبر و علی ہے خبر
علی نظیر و علی ناظر و علی ہے نظر

علی حسین و علی احسن و علی ہے حسن
علی خزینہ علی خازِن و علی مخزن

ہر اِک ادا میں ہیں سو جلوے ماہتابی کے
نثار ، دیدہ و دل شانِ بُو ترابی کے​

 

[الف نظامی]

امام حسین علیہ السلام

اُٹھا نگاہ میں اِک عزمِ بے پناہ لئے
ستارہ صبح کا تنویرِ مہر و ماہ لئے

عذار طلعتِ رخشاں ، جبیں گلابی تھی
پیمبرانہ ادا ، شانِ بُو ترابی تھی

نبی کی آل کو ہمراہ لے کے نکلا تھا
فروغِ جلوہ گہِ ماہ لے کے نکلا تھا

اُٹھا تو عظمتِ کونین جھوم جھوم گئی
نظر فرینی دارین جھوم جھوم گئی

سلام دشتِ مصیبت میں آنیوالے پر
خدا کی راہ میں سب کچھ لُٹانے والے پر

وہ جس نے رسم و رہِ عشق کی بنا ڈالی
بنائے قصرِ شہنشاہیت ہلا ڈالی

بلند مرتبہ ء لا الہ جس نے کیا
یزید و شمر کا لشکر تباہ جس نے کیا

میانِ کرب و بلا خاک و خون میں تڑپا
وہ جس نے عشق کو اِک تازہ ولولہ بخشا

وہ سروِ ناز تھا بھوکا بھی اور پیاسا بھا
رسولِ پاک کا محبوب بھی نواسا بھی

تمام جسم بھی زخمی تھا اور سینہ بھی
لُٹا چکا تھا بھرے گھر میں کا سب خزینہ بھی

مگر اطاعت شمر و یزید کی نہ قبول
مرا سلامِ محبت ، ریاض دہر کے پھول
​

 

[الف عین]

مکمل ہو جائے تو اس کی فائل مجھے دینا نہ بھول جانا الف نظامی

 

[الف نظامی]

مکمل ہو جائے تو اس کی فائل مجھے دینا نہ بھول جانا الف نظامی

جی ضرور۔

 

[الف نظامی]

اے عاشقوں کے قافلہ سالار السلام
دینِ محمدی کے نگہدار السلام

عالم فروز و مطلعِ انوار السلام
ضو ریز و ضو فشان و ضیا بار السلام

حسن و جمالِ سیدِ ابرار السلام
آئینہ دارِ عظمتِ کردار السلام

اللہ کی رضا کے طلب گار السلام
اے رہ نورد جادہ ء دشوار السلام

بازو و دستِ حیدرِ کرار السلام
اسلام کے معین و مددگار السلام

حق آشنا و محرمِ اسرار السلام
اے جان و دل سے حق کے خریدار السلام

تصویرِ شوق و جلوہ ء سرشار السلام
عزم آفرین و صاحبِ کردار السلام

حسنِ تمام ، حسن کے شہکار السلام
باغِ رسول کے گلِ بے خار السلام

نورِ نگاہِ مرتضوی ، جانِ سیدہ
تسکینِ روحِ عابدِ بیمار السلام

اے رُوحِ پاکِ سیدِ مظلوم ! الصلوۃ
مظلومِ تیغ و خنجرِ خونخوار السلام

تیغِ علی و خنجرِ برانِ مصطفے
اے ربِ ذوالجلال کی تلوار السلام

اے عشق کے امام ، محبت کے پیشوا
صدر الصدور ملتِ احرار السلام

خود دار و خود شناس و خود آگاہ و خود نگر
حق بین و حق نما و حق آثار السلام

تو اور قید لشکرِ شمر و یزید میں ؟
تو اور بندِ غم میں گرفتار السلام

جو زخم بھی لگے ترے جسمِ لطیف پر
وہ زخم میرے دل کا ہیں آزار السلام

تھا فطرتا بلند ، مذاقِ نظر ترا
حق کے نقیب ، حق کے علمدار السلام

پڑھتے ہیں تجھ پہ لوگ ہر اِک شہر میں درود
کہتے ہیں تجھ کو کوچہ و بازار السلام

تڑپا رہی ہے مجھ کو بھی مظلومیت تری
میں بھی ہوں دل فِگار و عزادار السلام​

 

[الف نظامی]

جِلو میں رہ عشق کے چند راہی ، زرہ کی جگہ جن کا ملبوس سادہ
ترے عزمِ محکم کے قربان جاوں ، یہ سامان اور کربلا کا ارادہ

ابھی تک وہی قبلہ ء جان و دل ہے ، ابھی تک وہیں عشق ہے سر نہادہ
ترے ذوق نے جو بنائی ہے منزل ، ترے عشق نے جو تراشا ہے جادہ

محبت کے رمز آشنا کرنے آئیں ترے صدق و اخلاص سے استفادہ
تری یاد ہے آج منزل بہ منزل ترا ذکر ہے آج جادہ بہ جادہ

شہادت کے نشے میں سرشار ہو کر کیا تو نے جب کربلا کا ارادہ
ترے سامنے تھی اجل سرفگندہ ترے سامنے تھی قضا سر نہادہ

وہ دشتِ بلا وہ قیامت کا منظر ، وہ لاشوں کے انبار اللہ اکبر
اُدھر سائے میں شمر کا لاو لشکر ، اِدھر دھوپ میں ہاشمی خانوادہ

یہ تیرا کرم تھا کہ سر دے کے تو نے کیا زندہ روحِ صداقت کو ورنہ
سیاست تھی خود بینی و خود نمائی صداقت پہ تھا مصلحت کا لبادہ

محبت کی تفسیر ہے خون تیرا ، ہے فطرت کو مطلوب مضمون تیرا
جو تیری زباں پر تھا حرفِ صداقت ، جہاں کر رہا ہے اُسی کا اعادہ​

 

[الف نظامی]

پیام دیتی ہے اب بھی یہ کربلا کی زمیں
حسین و شمر کا اندازِ فکر ایک نہیں

حسین بے سروساماں ، حسین بے لشکر
یزیدیوں کی سپہ ، شمر کے یسار و یمیں

یہ کون ہے ؟ یہ محمد کے دل کا ٹکڑا ہے
جبیں پہ نورِ نبوت ، جگر میں سوزِ یقیں

رہِ خدا میں لٹانے کو لے کے آیا ہے
تمام گوہرِ تاباں ، تمام لعل و نگیں

مچی ہے لشکرِ شمر و یزید میں ہلچل
کھڑا ہے دھوپ میں ابنِ علی بصد تمکین

جلالِ مرتضوی کی نمود آنکھوں میں
جمالِ یار کا آئینہ ، تابناک جبیں

شہادتِ علی اصغر سے بھی نہیں مغموم
شہادتِ علی اکبر سے بھی نہیں غمگیں

بس اک شہادتِ عظمی ہے منتہائے نظر
زہے کمالِ جگر گوشہ ء رسولِ امیں

​

 

[الف نظامی]

شہیدِ کرب و بلا ! کیا مقام تیرا ہے
ہجومِ غم میں بھی دل شاد کام تیرا ہے

ترے نقوشِ قدم مشعلِ ہدایت ہیں
حیات جس پہ ہے نازاں وہ کام تیرا ہے

یہاں خیال و قیاس و گماں کا دخل نہیں

یہ کربلا ہے ، یہاں انتظام تیرا ہے

خوشا کہ میرے لبوں پر ہے گفتگو تیری
زہے نصیب کہ دل میں مقام تیرا ہے

انیسِ خاطرِ ناشاد ، یاد ہے تیری
تسلی ء دلِ رنجور ، نام تیرا ہے

صداقتوں کے امیں جاں نثار ہیں تیرے
زعیمِ وقت ہر اک تشنہ کام تیرا ہے

خدا گواہ کہ ہستی ہے لازوال تری
تری قسم کہ مسلّم دوام تیرا ہے

خرد کو بادہ ء الہام کی ضرورت ہے
جہاں کو پھر ترے پیغام کی ضرورت ہے​

 

[الف نظامی]

اللہ اللہ عظمتِ شانِ شہیدِ کربلا
کتنا رخشندہ ہے عنوانِ شہیدِ کربلا

ساری دنیا پر ہے لازم کربلا کا احترام
ساری دنیا پر ہے احسانِ شہیدِ کربلا

کون ہے منزل شناسِ راکبِ دوشِ رسول
کس کو ہو سکتا ہے عرفانِ شہید کربلا

میرا سینہ ٹکڑے ٹکڑے ہے غمِ شبیر سے
میرے جان و دل ہیں قربانِ شہید کربلا

ہر نفس میں بوئے خوں ہے ہر بشر سینہ فگار
عام ہے دنیا میں فیضانِ شہید کربلا

میری نظروں میں ہے رنگِ جلوہ ء روئے حسین
میرے ہاتھوں میں ہے دامانِ شہیدِ کربلا

اصغر و اکبر کے لاشے ، بے کسوں کی بے کسی
کربلا میں یہ تھا سامانِ شہیدِ کربلا

دست و بازو میں تھی قوت حیدرِ کرار کی
تھا قضا کا تیر ، پیکانِ شہیدِ کربلا

زیرِ خنجر بھی رہی تکمیلِ سجدہ کی طلب
دیدنی ہے ذوق و وجدانِ شہیدِ کربلا

اے دلِ درد آشنا ، اے دیدہ ء خوننابہ بار
لا کوئی نذرانہ شایانِ شہیدِ کربلا

ریزہ ریزہ جسم و جانِ اعتبارِ قدسیاں
ٹکڑے ٹکڑے جیب و دامانِ شہید کربلا

​

 

[الف نظامی]

رباعیات
وہ شان و ادائے دلربائی تیری
عالم کو ہے یاد ، حق نمائی تیری
پھر گھیرا ہے وقت کے یزیدوں نے ہمیں
شاہنشہ ء کربلا ، دھائِی تیری
---
کوفی بھی وہی ہیں طمطراقی بھی وہی
شامی بھی وہی ہیں بد مذاقی بھی وہی
جا کر یہ کوئی ابنِ علی سے کہدے
اِس دور میں بھی یزید باقی ہیں وہی
---
تکمیلِ رہ و رسمِ وفا کا دن ہے
بندے کا نہیں ہے ، یہ خدا کا دن ہے
جبریل بھی حیران ہیں ، فطرت بھی خموش
کیا معرکہ ء کرب و بلا کا دن ہے؟
​

 

[الف نظامی]

بیادِ مخدوم علی ہجویری عرف داتا گنج بخش رحمۃ اللہ علیہ

اے خوشا عظمتِ دربارِ علی ہجویری
جلوہ افروز ہیں انوارِ علی ہجویری

خلق ہے طالبِ دیدار علی ہجویری
مرحبا گرمئی بازارِ علی ہجویری

میں کہ اک سوختہ سامانِ محبت تھا ، مجھے
مل گیا سایہ ء دیوارِ علی ہجویری

دیدہ افروز ہیں درویش کے اسرار و رموز
دیکھ ! رنگینی ء افکارِ علی ہجویری

میری نظروں میں ہے ہجویر کا خورشید جمال
میرے دامن میں ہیں انوارِ علی ہجویری

قدسیو کھول دو سرکار کا بابِ رحمت
آ گیا بندہ ء سرکارِ علی ہجویری

جلوہ گر نورِ خدا ہے مرے آئینے میں
میں بھی ہوں آئینہ بردارِ علی ہجویری

جب بھی میں شوق کے عالم میں نوا سنج ہوا
منکشف ہو گئے اسرارِ علی ہجویری

آج سرکار کے جلووں کا نیا عالم ہے
آج ہے وجد میں سرشارِ علی ہجویری

میکدہ ساقی ء ہجویر کا ہر دم ہے کُھلا
جُھوم سرمستی میں مے خوارِ علی ہجویری

اب بھی ہے اہلِ محبت کے دلوں پر مظہر
اثرِ مستی ء کردارِ علی ہجویری



​

 

[الف نظامی]

نذرِ فرید
رات کے تین بجے بہشتی دروازے میں لکھے گئے

کھینچ لایا ہے مجھے جذبِ فراوانِ فرید
لللہ الحمد ہوا آج میں مہمانِ فرید

کیوں نہ پلکوں سے چُنوں خارِ بیابانِ فرید
میں ازل ہی سے ہوں سرگشہ و حیرانِ فرید

تختِ جمشید کو کیا خاک نظر میں لائیں؟
خسروِ ملکِ ولایت ہیں غلامانِ فرید

اِن کے جلووں سے ہوئی جاتی ہیں آنکھیں خیرہ
مثلِ خورشید ہیں ذراتِ بیابانِ فرید

میں نے ایک عشق کو دیکھا ہے بہ شکل صابر
میں نے اِک حُسن کو پایا ہے بہ عنوانِ فرید

دل میں کچھ خوف نہ آشوبِ قیامت کا رہے
ہاتھ آ جائے اگر گوشہ ء دامانِ فرید

فائزِ جلوہ ء خاصانِ خدا ہوں مظہر
دل ہے صابر پہ فدا ، جان ہے قربانِ فرید​

 

[الف نظامی]

---تکمیل---
الف عین​

 

[الف عین]

---تکمیل---
الف عین​

زبردست، اب ای بک شروع کرتا ہوں ان شاء اللہ

 

[الف عین]

ای بک
مفت کتب
بزم اردو

 

[سیما علی]

تڑپا رہی ہے مجھ کو بھی مظلومیت تری
میں بھی ہوں دل فِگار و عزادار السلام

سبحان اللہ
سبحان اللہ