تصویر کشی (Imagery) سے مزین اشعار شامل کیجے

[محمداحمد]

آ عندلیب مل کے کریں آہ و زاریاں
تو ہائے گل پکار، میں چلّاؤں ہائے دل

 

[محمداحمد]

وہ جن درختوں کی چھاؤں میں سے مسافروں کو اٹھا دیا تھا
انہیں درختوں پہ اگلے موسم جو پھل نہ اترے تو لوگ سمجھے

اس ایک کچی سی عمر والی کے فلسفے کو کوئی نہ سمجھا
جب اس کے کمرے سے لاش نکلی، خطوط نکلے تو لوگ سمجھے

وہ گاؤں کا اک ضعیف دہقاں، سڑک کے بننے پہ کیوں خفا تھا
جب ان کے بچے جو شہر جاکر کبھی نہ لوٹے تو لوگ سمجھے

احمد سلمان

بشکریہ نیرنگ خیال بھائی!

 

[محمداحمد]

دلِ وحشی مجھے ہونے نہیں دیتا سرسبز
چشم ِ گریہ ہے کہ صحرا نہیں بننے دیتی

ظہیراحمدظہیر

 

[محمداحمد]

دشت ایسا ہے کہ چھتنار شجر ہیں ہر گام
دھوپ ایسی ہے کہ سایا نہیں بننے دیتی

ظہیر احمد ظہیرؔ

 

[محمداحمد]

کیا قیامت ہے کہ اب میرے تصور کی تھکن
بادلوں میں کوئی چہرہ نہیں بننے دیتی

ظہیر احمد ظہیرؔ

 

[محمداحمد]

دامن ہے ٹکڑے ٹکڑے، ہونٹوں پہ ہے تبسّم
اک درس لے رہا ہوں پھولوں کی زندگی سے

شکیل بدایونی

 

[محمد تابش صدیقی]

خار کی ہر چبھن پہ اب کرتے ہیں ہائے ہائے کیوں
کس نے کہا تھا آپ سے، سیرِ چمن کو آئے کیوں

نظر لکھنوی

 

[محمد تابش صدیقی]

ہے اس کی یاد مرے دل کی ظلمتوں میں نہاں
خوشا چراغ کہ ہے تیرگی کے پردے میں

نظر لکھنوی

 

[محمداحمد]

اس گھر کی ہر اک چیز ستائے گی ترے بعد
دہلیز پہ بیٹھوں گا تو در تنگ کرے گا

شعیب تنویر

 

[محمداحمد]

وہ جب کہتے ہیں، فردا ہے خوش آئند
عجب حسرت سے مُڑ کر دیکھتا ہوں

انور شعورؔ

 

[محمداحمد]

کہاں تک کاہلی کے طعن سنتا
تھکن سے چور ہو کر گر پڑا ہوں

انور شعورؔ

 

[فرقان احمد]

آیا وہ بام پر تو کچھ ایسا لگا منیر
جیسے فلک پہ رنگ کا بازار کھل گیا

منیر نیازی

 

[فرقان احمد]

شب ڈھل گئی اور شہر میں سورج نکل آیا
میں اپنے چراغوں کو بجھاتا نہیں ۔۔۔ پھر بھی

شہزاد احمد

 

[محمداحمد]

تم گئے ہو توسرِ شام یہ عادت ٹھہری
بس کنارے پہ کھڑے ہاتھ ہلاتے رہنا

 

[arifkarim]

arifkarim

عارف کریم بھائی ! خیریت ہے شاعری کے دھاگے پڑھے جا رہے ہیں اور دوستانہ کی ریٹنگز پھینکی جا رہی ہیں۔

سب خیریت؟

پر مزاح کا بٹن خراب ہے تو آجکل اسی سے کام چلا رہا ہوں

 

[محمداحمد]

پر مزاح کا بٹن خراب ہے تو آجکل اسی سے کام چلا رہا ہوں

یہ خرابی بڑی خوش آئند ہے۔

ایسے ہی چلاتے رہیے فی الحال۔

 

[محمداحمد]

جلے جاتے ہيں بڑھ بڑھ کر مٹے جاتے ہيں گر گر کر
حضورِ شمع پروانوں کی نادانی نہيں جاتی

جگر مرادآبادی

 

[محمداحمد]

محبت ميں اک ايسا وقت بھی دل پر گزرتا ہے
کہ آنسو خشک ہو جاتے ہيں طغيانی نہيں جاتی

جگر مرادآبادی

 

[محمداحمد]

کچھ خانماں برباد تو سائے میں کھڑے ہیں
اس دور کے انساں سے تو یہ پیڑ بھلے ہیں

چیونٹی کی طرح رینگتے لمحوں کو نہ دیکھو
اے ہمسفرو! رات ہے اور کوس کڑے ہیں

پتھر ہیں تو رستےسے ہٹا کیوں نہیں دیتے
رہرو ہیں تو کیوں صورتِ دیوار کھڑے ہیں

رسا چغتائی

 

[شکیب]

ہمارے گھر کی دیواروں پہ ناصر
اداسی بال کھولے سو رہی ہے
ناصر کاظمی
(اس شعر کو میں ہمیشہ مثال کے طور پر پیش کرتا ہوں کہ تصویر ہر موقع پر ساتھ نہیں دیتی)