خدا

[زیرک]

لگے ہوئے ہو مجھے بھلانے کی کوششوں میں
مِری دعا ہے، خدا تجھ کو کامیاب کرے​

 

[زیرک]

خدا ایسے احساس کا نام ہے
رہے سامنے اور دکھائی نہ دے
بشیر بدر​

 

[زیرک]

نظر چرا کے کہا، ''بس یہی مقدر تھا''
بچھڑنے والے نے قصہ خدا پہ ڈال دیا​

 

[زیرک]

تیرا اندازِ تخاطب، ترا لہجہ، ترے لفظ
وہ جسے خوفِ خدا ہوتا ہے، یوں بولتا ہے؟​

 

[محمد تابش صدیقی]

خدا کی نعمتوں سے نعمتیں کچھ اور کر پیدا
خدا نے آنکھ دی تو کر محبت کی نظر پیدا
نظرؔ لکھنوی

 

[محمد تابش صدیقی]

ہمارے چار تنکوں کے نشیمن کا خدا حافظ
کہ اب صحنِ چمن تک شعلۂ برقِ تپاں پہنچا
نظرؔ لکھنوی

 

[محمد تابش صدیقی]

جو خود کٹ گیا رہبرِ کارواں سے
خدا ہی محافظ ہے اس کارواں کا
نظرؔ لکھنوی

 

[محمد تابش صدیقی]

خدا کا خوف، غمِ زندگی کہ ذکرِ فنا
بتا وہ چیز کہ دل کو ترے گداز کرے
نظرؔ لکھنوی

 

[زیرک]

آپ کرتے جو احترامِ بُتاں
بتکدے خود خدا خدا کرتے
انور صابری​

 

[زیرک]

بُت کدے سے چلے ہو کعبے کو
کیا ملے گا تمہیں خدا کے سوا؟
حفیظ جالندھری​

 

[زیرک]

اتنا خالی تھا اندروں میرا
کچھ دنوں تو خدا رہا مجھ میں
جون ایلیا​

 

[زیرک]

واعظ بھی اسی بُت کو خدا مان رہا ہے
اس شہر میں اب کون مسلمان رہا ہے؟​

 

[زیرک]

کون جانے یہ ترِا شاعرِ آشفتہ مزاج
کتنے مغرور خداؤں کا رقیب آج بھی ہے
ساحر لدھیانوی​

 

[زیرک]

وہ خدا ہے، کسی ٹوٹے ہوئے دل میں ہو گا
مسجدوں میں اسے ڈھونڈو نہ کلیساؤں میں
قتیل شفائی​

 

[زیرک]

خدارا! کیجیے رابطہ، کہ اب تو لوگ
بالوں میں سفیدی کا سبب پوچھتے ہیں​

 

[زیرک]

شیخ جاگیر سمجھتا ہے خدائی کو بھی
ہم خدا کو بھی کسی کا نہ سمجھنے والے​

 

[زیرک]

نہ مانگیے جو خدا سے تو مانگیے کس سے
جو دے رہا ہے اسی سے سوال ہوتا ہے
مادھو رام جوہر​

 

[جاسمن]

عجب مذاق ہے ہم نے خدا کے دھوکے میں
تمام عمر کسی وسوسے سے باتیں کیں
(عدنان محسن)

 

[طاہر شیخ]

رہتا ہے عبادت میں ہمیں موت کا کھٹکا
ہم یاد خدا کرتے ہیں کر لے نہ خدا یاد

اکبر الہ آبادی

 

[منہاج علی]

’خدا ساز‘ تھا آذرِ بت پرست
ہم اپنے تئیں آدمی تو بنائیں !

میرؔ