دیوان (ناصر کاظمی)

[وہاب اعجاز خان]

غزل

چہرہ افروز ہوئی پہلی جھڑی ہم نفسو شکر کرو
دل کی افسردگی کچھ کم تو ہوئی ہم نفسو شکر کرو

آو پھر یادِ عزیزاں ہی سے میخانہ ء جاں گرم کریں
دیر کے بعد یہ محفل تو جمی ہم نفسو شکر کرو

آج پھر دیر کی سوئی ہوئی ندی میں نئی لہر آئی
دیر کے بعد کوئی ناو چلی ہم نفسو شکر کرو

رات بھر شہر میں بجلی سی چمکتی رہی ہم سوئے رہے
وہ تو کہیے کہ بلا سر سے ٹلی ہم نفسو شکر کرو

درد کی شاخِ تہی کاسہ میں اشکوں کے نئے پھول کھلے
دل جلی شام نے پھر مانگ بھری ہم نفسو شکر کرو

آسماں لالہء خونیں کی نواوں سے جگر چاک ہوا
قصرِ بیدار کی دیوار گری ہم نفسو شکر کرو

۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

حسن کہتا ہے اک نظر دیکھو
دیکھو اور آنکھ کھول کر دیکھو

سن کے طاوس رنگ کی جھنکار
ابر اٹھا ہے جھوم کر دیکھو

پھول کو پھول کا نشاں جانو
چاند کو چاند سے ادھر دیکھو

جلوہ ء رنگ بھی ہے اک آواز
شاخ سے پھول توڑ کردیکھو

جی جلاتی ہے اوس غربت میں
پاوں جلتے ہیں گھاس پر دیکھو

جھوٹی امید کا فریب نہ کھاو
رات کالی ہے کس قدر دیکھو

نیند آتی نہیں تو صبح تلک
گردِ مہتا ب کا سفر دیکھو

اک کرن جھانک کر یہ کہتی ہے
سونے والو ذرا ادھر دیکھو

خمِ ہر لفظ ہے گلِ معنی
اہل تحریر کا ہنر دیکھو

۔۔۔۔۔۔۔۔۔۔
​

 

[وہاب اعجاز خان]

غزل

ہنستے گاتے روتے پھول
جی میں ہیں کیسے کیسے پھول

اور بہت کیا کرنے ہیں
کافی ہیں یہ تھوڑے پھول

وقت کی پھلواری میں نہیں
دامن میں ہیں ایسے پھول

اس دھرتی کی رونق ہیں
میرے کانٹے تیرے پھول

کسیے اندھے ہیں وہ ہاتھ
جن ہاتھوں نے توڑے پھول

اُن پیاسوں پر میرا سلام
جن کی خاک سے نکلے پھول

ایک ہری کونپل کے لیے
میں چھوڑے کتنے پھول

اونچے اونچے لمبے پیڑ
سادے پتے پیلے پھول

مٹی ہی سے نکلے تھے
مٹی ہو گئے سارے پھول

مٹی کی خوشبو لینے
نیل گگن سے اترے پھول

چادر اوڑھ کے شبنم کی
نکلے آنکھوں ملتے پھول

شام ہوئی اب گلیوں میں
دیکھو چلتے پھرتے پھول

سونا جسم سفید قمیص
گورے ہاتھ سنہرے پھول

کچی عمریں کچے رنگ
ہنس مکھ بھولے بھالے پھول

آنکھ آنکھ میں بھیگی نیند
ہونٹ ہونٹ سے جھڑتے پھول

گورے گورے ننگے پیر
جھلمل جھلمل کرتے پھول

جیسا بدن ویسا ہی لباس
جیسی مٹی ویسے پھول

مہک اٹھی پھر دل کی کتاب
یاد آئے یہ کب کے پھول

شام کے تارے تو ہی بتا
آج کدھر سے گزرے پھول

کانٹے چھوڑ گئی آندھی
لے گئی اچھے اچھے پھول

دھیان میں پھرتے ہیں ناصر
اچھی آنکھوں والے پھول



۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

درد کم ہونے لگا آو کہ کچھ رات کٹے
غم کی معیاد بڑھا جاو کہ کچھ رات کٹے

ہجر میں آہ بکا رسمِ کہن ہے لیکن
آج یہ رسم ہی دہراو کہ کچھ رات کٹے

یوں توتم روشنیء قلب و نظر ہو لیکن
آج وہ معجزہ دکھلاو کہ کچھ رات کٹے

دل دکھاتا ہے وہ مل کر بھی مگر آج کی رات
اُسی بے درد کو لے آو کہ کچھ رات کٹے

دم گھٹا جاتا ہے ہے افسردہ دلی سے یارو
کوئی افواہ ہی پھیلاو کہ کچھ رات کٹے

میں بھی بیکار ہوں اور تم بھی ہو ویران بہت
دوستو آج نہ گھر جاو کہ کچھ رات کٹے

چھوڑ آئے ہو سرشام اُسے کیوں ناصر
اُسے پھر گھر سے بلا لاو کہ کچھ رات کٹے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

ایسا بھی جوئی سپنا جاگے
ساتھ مرے اک دنیا جاگے

وہ جاگے جیسے نیند نہ آئے
یا کوئی میرے جیسا جاگے

ہوا چلی تو جاگے جنگل
ناو چلے تو ندیا جاگے

راتوں میں یہ رات امر ہے
کل جاگے تو پھر کیا جاگے

داتا کی نگری میں ناصر
میں جاگوں یا داتا جاگے

۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

نئے کپڑے بدل کر جاوں کہاں اور بال بناوں کس کے لیے
وہ شخص تو شہر ہی چھوڑ گیا میں باہر جاوں کس کے لیے

جس دھوپ کی دل میں ٹھنڈک تھی وہ دھوپ اسی کے ساتھ گئی
ان جلتی بلتی گلیوں میں اب خاک اڑاوں کس کے لیے

وہ شہر میں تھا تو اس کے لیے اوروں سے بھی ملنا پڑتا تھا
اب ایسے ویسے لوگوں کے میں ناز اٹھاوں کس کے لیے

اب شہر میں اُس کا بدل ہی نہیں کوئی ویسا جانِ غزل ہی نہیں
ایوانِ غزل میں لفظوں کے گلدان سجاوں کس کے لیے

مدت سے کوئی آیا نہ گیا سنسان پڑی ہے گھر کی فضا
ان خالی کمروں میں ناصر اب شمع جلاوں کس کے لیے

۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

جرمِ انکار کی سزا ہی دے
میرے حق میں کچھ سنا ہی دے

شوق میں ہم نہیں زیادہ طلب
جر ترا نازِ کم نگاہی دے

تو نے تاروں سے شب کی مانگ بھری
مجھ کو اک اشکِ صبحگاہی دے

تو نے بنجر زمیں کو پھول دیے
مجھ کو اک زخمِ دل کشائی دے

بستیوں کو دیے ہیں تو نے چراغ
دشتِ دل کو بھی کوئی راہی دے

عمر بھر کی نواگری کا صلہ
اے خدا کوئی ہم نواہی دے

زرد رو ہیں ورق خیالوں کے
اے شبِ ہجر کچھ سیاہی دے

گر مجالِ سخن نہیں‌ ناصر
لبِ خاموش سے گواہی دے

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

قصے ہیں خموشی میں نہاں اور طرح کے
ہوتے ہیں غمِ دل کے بیاں اور طرح کے

تھی اور ہی کچھ بات کہ تھا غم بھی گوارا
حالات ہیں اب درپےء جاں اور طرح کے

اے راہرو راہِ وفا دیکھ کے چلنا
اس راہ میں ہیں سنگِ گراں اور طرح کے

کھٹکا ہے جدائی کا نہ ملنے کی تمنا
دل کو ہیں مرے وہم و گماں اور طرح کے

پر سال تو کلیاں ہی جھڑی تھیں مگر اب کے
گلشن میں ہیں آثارِ خزاں اور طرح کے

دنیا کو نہیں تاب مرے درد کی یارب
دے مجھ کو اسالیبِ فغاں اور طرح کے

ہستی کا بھرم کھول دیا ایک نظر نے
اب اپنی نظر میں ہیں جہاں اور طرح کے

لشکر ہے نہ پرچم ہے نہ دولت ہے نہ ثروت
ہیں خاک نشینوں کے نشاں اور طرح کے

مرتا نہیں اب کوئی کسی کے لیے ناصر
تھے اپنے زمانے کے جواں اور طرح کے

۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

صبح کا تارا ابھر کر رہ گیا
رات کا جادو بکھر کر رہ گیا

ہمسفر سب منزلوں سے جاملے
میں نئی راہوں میں مر کر رہ گیا

کیا کہوں اب تجھ سے اے جوئے کم آب
میں بھی دریا تھا اتر کر رہ گیا

۔۔۔۔۔۔۔۔​

 

[وہاب اعجاز خان]

غزل

اب اُن سے اور تقاضائے بادہ کیا کرتا
جو مل گیا ہے میں اُس سے زیادہ کیا کرتا

بھلا ہوا کہ ترے راستے کی خاک ہوا
میں یہ طویل سفر پا پیادہ کیا کرتا

مسافروں کی تو خیر اپنی اپنی منزل تھی
تری گلی کو نہ جاتا تو جادہ کیا کرتا

تجھے تو گھیرے ہی رہتے ہیں رنگ رنگ کے لوگ
ترے حضور مرا حرفِ سادہ کیا کرتا

بس ایک چہرہ کتابی نظر میں ہے ناصر
کسی کتاب سے میں استفادہ کیا کرتا

۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

دیارِ دل کی رات میں چراغ سا جلا گیا
ملا نہیں توکیا ہوا وہ شکل تو دکھا گیا

وہ دوستی تو خیراب نصیبِ دشمناں ہوئی
وہ چھوٹی چھوٹی رنجشوں کا لطف بھی چلا گیا

جدائیوں کے زخم دردِ زندگی نے بھر دیے
تجھے بھی نیند آگئی مجھے بھی صبر آگیا

پکارتی ہیں فرصتیں کہاں گئیں وہ صحبتیں
زمیں نگل گئی انہیں کہ آسماں کھا گیا

یہ صبح کی سفیدیاں یہ دوپہر کی زردیاں
اب آئینے میں دیکھتا ہوں میں کہاں چلا گیا

یہ کس خوشی کی ریت پر غموں کو نیند آگئی
وہ لہر کس طرف گئی یہ میں کہاں سما گیا

گئے دنوں کی لاش پر پڑے رہو گے کب تلک
الم کشو اُٹھو کہ آفتاب سر پہ آگیا

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

کب تک بیٹھے ہاتھ ملیں
چل ساتھی کہیں‌اور چلیں

اب کس گھاٹ پہ باندھیں ناو
اب یہ طوفاں کسیے ٹلیں

اب یہ مانگیں کون بھرے
اب یہ پودے کیسے پھلیں

جگ جگ جیں مرے ساتھی
جلنے والے اور جلیں

تجھ کو چین ملے ناصر
تیرے دکھ گیتوں میں ڈھلیں

۔۔۔۔۔۔۔۔۔۔۔۔​

 

[وہاب اعجاز خان]

غزل

ایک نگر میں ایسا دیکھا دن بھی جہاں اندھیر
پچھلے پہر یوں چلے اندھیری جیسے گرجیں شیر

ہوا چلی تو پنکھ پنکھیرو بستی چھوڑ گئے
سونی رہ گئی کنگنی، خالی ہوئےمنڈیر

بچپن میں بھی وہی کھلاڑی بناہے اپنا میت
جس نے اونچی ڈال سے توڑے زرد سنہری بیر

یارو تم تو ایک ڈگر پر ہار کے بیٹھ گئے
ہم نے تپتی دھوپ میں کاٹے کڑے کوس کے پھیر

اب تواس دیس میں یوں آیا سیلاب
کب کی کھڑی حویلیاں پل میں ہوگئیں ڈھیر

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

کل جنہیں زندگی تھی راس بہت
آج دیکھا انہیں‌اداس بہت

رفتگاں کا نشاں نہیں ملتا
اُگ رہی ہے زمیں پہ گھاس بہت

کیوں نہ رووں تری جدائی میں
دن گزرتے ہیں تیرے پاس بہت

چھاوں مل جائے دامنِ گل کی
ہے غریبی میں یہ لباس بہت

وادیِ دل میں پاوں دیکھ کے رکھ
ہے یہاں درد کی اُگاس بہت

سوکھے پتوں کو دیکھ کر ناصر
یاد آتی ہے گل کی باس بہت

۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

یہ خوابِ سبز ہے یا رت وہی پلٹ آئی
چھتوں پہ گھاس ہوا میں نمی پلٹ آئی

کچھ اس ادا سے دکھایا ہے تیری یاد نے دل
وہ لہر سی جو رگ و پے میں‌تھی پلٹ آئی

تری ہنسی کے گلابوں کو کوئی چھو نہ سکا
صبا بھی چند قدم ہی گئی پلٹ آئی

خبر نہیں وہ مرے ہمسفر کہاں پہنچے
کہ رہگزر تو مرے ساتھ ہی پلٹ آئی

کہاں سے لاو گے ناصر وہ چاند سی صورت
گر اتفاق سے وہ رات بھی پلٹ آئی

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

دل میں آو عجیب گھر ہے یہ
عمرِ رفتہ کی رہگزر ہے یہ

سنگِ منزل سے کیوں نہ سر پھوڑیں
حاصلِ زحمتِ سفر ہے یہ

رنجِ غربت کے ناز اُٹھاتا ہوں
میں ہوں اب اور دردِ سر ہے یہ

ابھی رستوں کی دھوپ چھاوں نہ دیکھ
ہمسفر دور کا سفر ہے یہ

دن نکلنے میں کوئی دیر نہیں
ہم نہ سو جائیں اب تو ڈر ہے یہ

کچھ نئے لوگ آنے والے ہیں
گرم اب شہر میں خبر ہے یہ

اب کوئی کام بھی کریں ناصر
رونا دھونا تو عمر بھر ہے یہ

۔۔۔۔۔۔۔۔۔۔۔۔​

 

[وہاب اعجاز خان]

غزل

تو ہے دلوں کی روشنی تو ہے سحر کا بانکپن
تیری گلی گلی کی خیر اے مرے دل رُبا وطن

وہ تو بس ایک موج تھی آئی ادھر اُدھر گئی
آنکھوں میں ہے مگر ابھی رات کے خواب کی تھکن

پھر وہی دشتِ بے اماں پھر وہی رنجِ‌ رائیگاں
دل کو جگا کے سو گئی تیرے خیال کی کرن

آیا گیا نہ میں کہیں‌ صبح سے شام ہو گئی
جلنے لگے ہیں‌ ہاتھ کیوں ٹوٹ رہا ہے کیوں‌بدن

کس سے کہوں کوئی نہیں سو گئے شہر کے مکیں
کب سے پڑی ہے راہ میں میتِ شہرِ بے کفن

میکدہ بجھ گیا تو کیا رات ہے میری ہمنوا
سایہ ہے میرا ہم سبو چاند ہے میرا ہم سخن

دل ہے مرا لہو لہو تاب نہ لاسکے گا تو
اے مرے تازہ ہمنشیں تو مرا ہم سبو نہ بن

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

یہ رنگِ خوں ہے گلوں پر نکھار اگر ہے بھی
حنائے پائے خزاں ہے بہار اگر ہے بھی

یہ پیش خیمہء بیدادِ تازہ ہو نہ کہیں
بدل رہی ہے ہوا سازگار اگر ہے بھی

لہو کی شمیں جلاو قدم بڑھاتے چلو
سروں پہ سایہء شب ہائے تار اگر ہے ابھی

ابھی تو گرم ہے میخانہ جام کھنکاو
بلا سے سر پہ کسی کا ادھار اگر ہے بھی

حیاتِ درد کو آلودہء نشاط نہ کر
یہ کاروبار کوئی کاروبار اگر ہے بھی

یہ امتیاز من و تو خدا کے بندوں سے
وہ آدمی نہیں طاعت گزار اگر ہے بھی

نہ پوچھ کیسی گزرتی ہے زندگی ناصر
بس ایک جبر ہے یہ اختیار اگر ہے بھی


۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

پھر لہو بول رہا ہے دل میں
دم بدم کوئی صدا ہے دل میں

تاب لائیں گے نہ سننے والے
آج وہ نغمہ چھڑا ہے دل میں

ہاتھ مَلتے ہی رہیں گے گل چیں
آج وہ پھول کھلا ہے دل میں

دشت بھی دیکھے چمن بھی دیکھا
کچھ عجب آب و ہوا ہے دل میں

رنج بھی دیکھے خوشی بھی دیکھی
آج کچھ درد نیا ہے دل میں

چشم تری ہی نہیں محوِ تسبیح
خوں بھی سرگرمِ دعا ہے دل میں

پھر کسی یاد نے کروٹ بدلی
کوئی کانٹا سا چبھا ہے دل میں

پھر کسی غم نے پکارا شاید
کچھ اجالا سا ہوا ہے دل میں

کہیں چہرے کہیں‌ آنکھیں کہیں ہونٹ
اک صنم خانہ کھلا ہے دل میں

اُسے ڈھونڈا وہ کہیں بھی نہ ملا
وہ کہیں بھی نہیں یا ہے دل میں

کیوں بھٹکتے پھریں دل سے باہر
دوستو شہر بسا ہے دل میں

کوئی دیکھے تو دکھاوں ناصر
وسعتِ‌ارض وسما ہے دل میں

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

جبیں پہ دھوپ سی آنکھوں میں کچھ حیا سی ہے
تو اجنبی ہے مگر شکل آشنا سی ہے

خیال ہی نہیں‌ آتا کسی مصیبت کا
ترے خیال میں ہربات غم ربا سی ہے

جہاں میں یوں تو کسے چین ہے مگر پیارے
یہ تیرے پھول سے چہرے پہ کیوں‌ اداسی ہے

دلِ غمیں سے بھی جلتے ہیں‌شادمانِ حیات
اسی چراغ سے اب شہر میں‌ہوا سی ہے

ہمیں‌سے آنکھ چُراتا ہے اس کا ہر ذرہ
مگر یہ خاک ہمارے ہی خوں کی پیاسی ہے

ادس پھرتا ہوں میں جس کی دھن میں برسوں سے
یونہی سی ہے وہ خوشی بات وہ ذرا سی ہے

چہکتے بولتے شہروں کو کیا ہوا ناصر
کہ دن کو بھی مرے گھر میں وہی اداسی ہے

۔۔۔۔۔۔۔۔۔۔۔۔۔۔۔۔​