دیے کی آنکھ - مقبول عامر

[وہاب اعجاز خان]

غزل

غزل

تجھے باہوں میں بھرنا چاہتا ہوں
پھر اس کے بعد مرنا چاہتا ہوں

صدف پھر موتیوں سے بھر گئے ہیں
تہہِ دریا اترنا چاہتا ہوں

میں ہم آغوش ہو کر چاندنی سے
تجھے محسوس کرنا چاہتا ہوں

جہاں سے لوگ واپس آگئے ہیں
میں‌اُس حد سے گزرنا چاہتا ہوں

ذرا بھیگی ہوائیں‌ بھیج دینا
کہ میں پھر سے نکھرنا چاہتاہوں

میں اپنی زیست کے خاکے میں جاناں
تمہارا رنگ بھرنا چاہتا ہوں

۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

جو گم ہوئے وہ زمانے تلاش کرتا ہوں
میں واپسی کے بہانے تلاش کرتا ہوں

جسے اجاڑ سمجھ کر کسی نے چھوڑ دیا
میں اُس کھنڈر میں خزانے تلاش کرتاہوں

سدا کریدتا رہتا ہوں اپنی ذات کا ڈھیر
میں‌ خود میں‌کس کو نجانے تلاش کرتا ہوں

میں اپنے کھوئے ہوئے روپ کے تعاقب میں
گئی رتوں کے ٹھکانے تلاش کرتا ہوں

انہیں یہ وہم مناتا ہوں رتجگے عامر
میں ہوں کہ خواب پرانے تلاش کرتا ہوں

۔۔۔۔۔۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

سکوتِ شب سے تکلم کی ابتدا تو کرو
حدیثِ دل تو کہو، ذکرِ آشنا تو کرو

زمانے والا کبھی اہل دل سے جیتے ہیں!
شکست ان کا مقدر ہے تم دعا تو کرو

تمہیں میں عکس تمہارا دکھا نہ دوں تو کہو
تم آئینے کی طرح میرا سامنا تو کرو

بجا ہے ترکِ تعلق مگر کبھی نہ کبھی
کسی بہانے سرِ رہگزار ملا تو کرو

۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

نظم

۔۔۔۔۔۔۔۔۔۔۔۔۔۔۔۔۔۔۔
خوبصورت آنکھوں کے لیے ایک نظم



تری آنکھیں
بہت گہری
بہت ہی خوبصورت ہیں
اجازت ہو تو میں کچھ دیر
ان میں جھانک کر دیکھوں
کہ مجھ کو چاند کی مانند
جھیلوں میں اترنا
لطف دیتا ہے

۔۔۔۔۔۔۔۔۔۔۔

 

[وہاب اعجاز خان]

نظم

۔۔۔۔۔۔۔


نیلا رنگ



اک دن باتوں ہی باتوں میں
اس نے پوچھا
کونسا رنگ تمہیں بھاتا ہے؟
میں نے نیلا رنگ بتا کر؟
اُس سے پوچھا
تم ایسا کیوں پوچھ رہی ہو؟
وہ شرمائی اور کہا بس ایسے ہی
لیکن کچھ دن بعد
وہ میرے گھر آئی تو میں نے دیکھا
وہ سرتاپا
نیلے رنگ میں رنگی ہوئی تھی

۔۔۔۔۔۔۔۔۔۔۔۔۔۔۔۔۔۔۔۔۔

 

[وہاب اعجاز خان]

نظم

۔۔۔۔۔۔۔۔۔۔۔۔۔۔۔

۔۔۔۔۔۔۔پیاسے کو شبنم


پھر اک بار
میں تیرے شہر میں‌آیا ہوں
لیکن اب کے
تجھ سے ملنا
جان سے جانا لگتا ہے!


پچھلے برس کا وہ منظر
اب تک میری آنکھوں ہے
جب تو مجھ کو رخصت کرنے
دروازے تک آئی تھی
اور تری بھیگی آنکھوں میں
میرا چہرہ لرز رہا تھا


ہجر کے اس بے انت سفر میں
پل دو پل کا میل تو ساجن
وصل نہیں ہے، خود سوزی ہے

۔۔۔۔۔۔۔۔۔۔۔۔۔۔۔

 

[وہاب اعجاز خان]

غزل

غزل

رات بیٹھا تھا مرے پاس خیالوں میں کوئی
انگلیاں پھیر رہا تھا مرے بالوں میں کوئی

دیدہء تر نے بڑی دیر میں پہچانا اُسے
روپ کھو بیٹھا ہے دو چار ہی سالوں میں‌کوئی

غمزدہ شب کی گلو گیر ہوا کہتی ہے
یاد کرتا ہے مجھے جاگنے والوں میں‌کوئی

میں‌ شبِ شہر میں‌تھا اور ادھر گاوں‌میں
جلتی شمعیں لیے پھرتا رہا گالوں میں کوئی

ہم اندھیروں کے مکیں‌ان کو نظر آنہ سکے
کس قدر محو رہا اپنے اجالوں میں کوئی

ہجر نے اتنا ستایا ہے کہ جی چاہتا ہے
کاش مل جائے ترے چاہنے والوں میں‌کوئی​

 

[وہاب اعجاز خان]

غزل

غزل

شب کی تلخی شبِ غم سے پوچھو
ہم پہ جو گزری وہ ہم سے پوچھو

منزلیں گردِ سفر میں ڈھونڈو
راستہ نقشِ قدم سے پوچھو

کتنی جاں سوز ہے فن کی تخلیق
صاحبِ لوح و قلم سے پوچھو

ہم نے دامن جو نہیں پھیلایا
اپنے ہی دستِ کرم سے پوچھو

۔۔۔۔۔۔۔۔۔​

 

[وہاب اعجاز خان]

غزل

غزل

وہ خواب ٹوٹے ہوئے کتنے ماہ و سال ہوئے
جو عمر بھر کےلیے باعث ملال ہوئے

ہوائے شام دریچوں سے یوں گزر آئی
کہ سارے ٹوٹے ہوئے سلسلے بحال ہوئے

تمام عمر جنہیں مجھ سے اختلاف رہا
تمہارے باب میں وہ میرے ہم خیال ہوئے

اکیلے ہم ہی نہیں ہیں شکستہ پا جاناں!
رہِ وفا میں کئی لوگ پائمال ہوئے

محبتوں کا سفر بھی عجیب تھا عامر
کہ لوگ چلتے رہے، راستے نڈھال ہوئے​

 

[وہاب اعجاز خان]

ایک نوجوان محنت کش کا نغمہ

۔۔۔۔۔۔۔۔۔


ایک نوجوان محنت کش کا نغمہ


دن بھر کی محنت سے تھک کر
شام کوجب گھر جاتا ہوں
افسردہ دہلیز کو اپنا رستہ
تکتا پاتا ہوں
اپنی تھکن کی میلی چادر
آنگن کی رسی پہ ڈال کے
پھر باہر آجاتا ہوں
رات گئے تک بازاروں میں
اپنا جی بہلاتا ہوں
چمپا کے ہاروں سے
اپنی دنیا کو مہکاتا ہوں
آوارہ کہلاتا ہوں

۔÷÷÷÷÷

 

[وہاب اعجاز خان]

غزل

غزل

اس ایک ذات سے اپنا عجیب ناتا ہے
میں جب بھٹکتا ہوں وہ راستہ دکھاتا ہے

سوادِ شب میں بھی روشن ہے راستہ میرا
وہ چاند بن کے مرے ساتھ ساتھ چلتا ہے

یہ سوز و ساز ، یہ تابندگی، یہ ہالہء جاں
کوئی چراغ کی صورت مجھے جلاتا ہے

میں کھو بھی جاوں اگر زندگی کے میلے میں
وہ مہربان مجھے پھر سے ڈھونڈ لاتا ہے

فقیہِ شہر کو معلوم ہی نہیں عامر!
وہ راستہ جو دلوں سے گزر کے جاتا ہے

۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

آنکھ میں رنگ بھریں ، روح کو تازہ کرلیں
شہر سے دور کسی بن میں بسیرا کر لیں

ایسا کھلتا ہوں موسم ہے کہ جی چاہتا ہے
ہم بھی کلیوں کی طرح بند قبا وا کرلیں

بادلوں سے کوئی کہدے کہ گھڑی بھر کے لیے
دھوپ میں جلتے ہوئے دشت پہ سایہ کرلیں

دور سے اپنی زمیں کیسے نظر آتی ہے
آو کہسار سے وادی کا نظارہ کرلیں

سوچتے رہنے سے بہتر ہے کہ اُٹھ کرعامر
نہر میں‌ بہتے ہوئے پھول کا پیچھا کر لیں

۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

نظم

۔۔۔۔۔۔۔۔۔

ملازمت


مجھے اس بات کا دکھ ہے
کہ میرا ذہن
میرا وقت
اور میری توانائی
حصولِ رزق کی خاطر
بہت ہی چھوٹے چھوٹے مسئلوں پر
صرف ہوتے ہیں

۔۔۔۔۔۔۔۔۔۔۔۔۔

 

[وہاب اعجاز خان]

قطعہ

۔۔۔۔۔۔۔۔۔


یہیں‌نہیں کہ وہ گم گشتہ قافلہ نہ ملا
پلٹنا چاہا تو پھر گھر کا راستہ نہ ملا

پھر اُس کے بعد سردشت ایسی خاک اڑی
میں دور دور گیا تیرا نقشِ پا نہ ملا

وفا کے شہر سے گزری ہوں آندھیان جیسے
کسی منڈیر پہ جلتا ہوا دیا نہ ملا

۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

پاس جو کچھ تھا وار آیا ہوں
بوجھ سر سے اتار آیا ہوں

چھا گیا ہوں تمام رستوں پر
مثلِ موجِ غبار آیا ہوں

پھر اٹھائے ہیں خلق نے پتھر
پھر سرِ رہگزار آیا ہوں

کب رہائی ملے گی بارِ خدا
کتنی صدیاں گزار آیا ہوں

گھر، گھروندے دکھائی دیتے ہیں
میں سرِ کوہسار آیا ہوں

کوئی آیا نہ ساتھ دینے کو
شہر بھر کو پکار آیا ہوں

۔۔۔۔۔۔۔۔۔۔۔۔۔۔۔۔۔۔​

 

[وہاب اعجاز خان]

غزل

غزل

زندگی کس ڈگر پہ چلتی ہے
نت نئے راستے بدلتی ہے

تشنگی بجھ رہی ہے کھیتوں کی
برف کہسار پر پگھلتی ہے

میرا چہرہ جھلس گیا کیسے!
آگ تو میرے دل میں جلتی ہے

دھیرے دھیرے اُبھر رہا ہے چاند
روشنی پاوں پاوں چلتی ہے

۔۔۔۔۔۔۔۔۔۔۔۔۔۔
​

ختم شد