زندگی

[محمد تابش صدیقی]

زندگی سے زندگی بھر پھر مٹایا کیجیے
ایک ہی لحظہ میں وہ فتنہ اٹھا جاتا ہے دل
نظرؔ لکھنوی

 

[محمد تابش صدیقی]

خدا کا خوف، غمِ زندگی، کہ ذکرِ فنا
بتا وہ چیز کہ دل کو ترے گداز کرے
نظرؔ لکھنوی

 

[محمد تابش صدیقی]

مسخ ہو کر رہ گیا ہر ایک بابِ زندگی
دید کے قابل نہیں اب تو کتابِ زندگی

راہِ حق میں جھیل کر دو دن عذابِ زندگی
ہو گئے اہلِ محبت کامیابِ زندگی

عاشقِ ناکام ہوں یا عاشقانِ با مراد
غور اگر کیجے تو دونوں ہی خرابِ زندگی

اہلِ دنیا میں رہا میں، گوشۂ صحرا میں تُو
میں کہ تُو؟ زاہد بتا، ہے فیض یابِ زندگی

تیز گامی دیکھتے کیا ہم کہ سوتے ہی رہے
آ کے چلتا بھی بنا دورِ شبابِ زندگی

ٹوٹتے رہنے کا منظر دیکھتا رہتا ہوں میں
موت کی لہروں پہ ہے رقصاں حبابِ زندگی

کلّیہ توحید کا معلوم جو تجھ کو نہیں
ٹھیک لگ سکتا نہیں تجھ سے حسابِ زندگی

توشۂ اعمال کچھ کر لے مہیا اے نظرؔ
ایک دن ہونا ہے آخر احتسابِ زندگی
٭٭٭
محمد عبد الحمید صدیقی نظرؔ لکھنوی​

 

[محمد تابش صدیقی]

جان و دل سی شے کروں میں کیوں نثارِ زندگی
مجھ کو حاصل جب نہیں کچھ اختیارِ زندگی

کھینچ کر رکھ اس کی راسیں اے سوارِ زندگی
تا غلط رخ پر نہ چل دے راہوارِ زندگی

خوب ہی مرغوب ہے گو مرغزارِ زندگی
پر اسی میں گھومتے پھرتے ہیں مارِ زندگی

یہ حقیقت مجھ سے سن اے کامگارِ زندگی
رزقِ بہتر پر نہیں دار و مدارِ زندگی

میں یہ کہتا ہوں یہ مہلت ہے بکارِ آخرت
میں نہیں دیتا تمھیں درسِ فرارِ زندگی

زندگی کی کل حقیقت موت سے معلوم کر
موت کو پایا ہے ہم نے رازدارِ زندگی

کچھ بھی کہتے رہیے پھر، ہوتا نہیں دل پر اثر
پھیل جائے جب کسی میں زہرِ مارِ زندگی

آرزوؤں کے بھنور میں وہ نہیں پھنستا کبھی
کھل گیا ہے جس پہ رازِ اختصارِ زندگی

چند سانسوں کا تکلف رنج و غم کے درمیاں
مجھ کو بھی ہونا تھا دو دن گنہگارِ زندگی

میرے تیرے ذوق میں اے دل ہے بُعد المشرقین
جاں نثارِ آخرت میں، تو نثارِ زندگی

ٹوٹتے دیکھا حباب اور کھل گئی آنکھیں مری
کر لیا تھا پہلے میں نے اعتبارِ زندگی

موت کے چنگل سے اس کا بچ نکلنا ہے محال
موت کو دیکھا ہے ہم نے پہرہ دارِ زندگی
٭٭٭
محمد عبد الحمید صدیقی نظرؔ لکھنوی​

 

[زیرک]

لوحِ جہاں سے پیشتر لکھا تھا کیا نصیب میں
کیسی تھی میری زندگی، کچھ تو پتہ چلے مجھے​

 

[زیرک]

زندگی ڈر کے نہیں ہوتی بسر، جانے دو
جو گزرنی ہے قیامت، وہ گزر جانے دو
دیکھتے جانا بدل جائے گا منظر سارا
یہ دھواں سا تو ذرا نیچے اتر جانے دو
سعد اللہ شاہ​

 

[زیرک]

اختر کو زندگی کا بھروسہ نہیں رہا
جب سے لٹا چکے سر و سامانِ آرزو
اختر شیرانی​

 

[زیرک]

عجب تضاد میں کاٹا ہے زندگی کا سفر
لبوں پہ پیاس تھی بادل تھے سر پہ چھائے ہوئے​

 

[زیرک]

نہ کر شمار، کہ ہر شے گِنی نہیں جاتی
یہ زندگی ہے حسابوں سے جی نہیں جاتی
وسیم بریلوی​

 

[زیرک]

زندگی اک آنسوؤں کا جام تھا
پی گئے کچھ اور کچھ چھلکا گئے
شاہد کبیر​

 

[فلسفی]

وقت تیرے بنا جو گزرتا ہے وہ
زندگی کا مصیبت زدہ دور ہے

 

[فلسفی]

ہم سے محبوب کا نام پوچھا گیا
منہ سے نکلا فقط زندگی زندگی

 

[زیرک]

کیا ہے گر زندگی کا بس نہ چلا
زندگی کب کسی کے بس میں ہے​

 

[زیرک]

زندگی دھوپ کا میدان بنی بیٹھی ہے
اپنا سایہ بھی گریزاں، ترا داماں بھی خفا​

 

[زیرک]

زندگی کم ہے چاہتوں کے لیے
لوگ کیوں نفرتوں میں جیتے ہیں​

 

[فلسفی]

زندگی نے کیا عمر بھر موت کا
انتظار اس طرح کوئی کرتا نہیں

 

[زیرک]

آئے، ٹھہرے اور روانہ ہو گئے
زندگی کیا ہے، سفر کی بات ہے
حیدر علی جعفری​

 

[زیرک]

سر جھکائے ہوئے خاموش ہوں یوسف کی طرح
زندگی بیچ رہی ہے سرِ بازار مجھے​

 

[جاسمن]

میں اس کے جھوٹ کو بھی سچ سمجھ کے سنتا ہوں
کہ اس کے جھوٹ میں بھی زندگی کی قوت ہے
غضنفر

 

[الماس حسین]

زندگی تُو نے مجھے قبر سے کم دی ہے جگہ
پاؤں پھیلاؤں تو دیوار سے سر لگتا ہے!!!!

شعر درست کیجیے۔۔

زندگی تو نے مجھے قبر سے کم دی ہے زمیں

پاؤں پھیلاؤں تو دیوار میں سر لگتا ہے