سید شہزاد ناصر
محفلین
نہاری کے لئے سب سے بہترین گائے کا گوشت ہوتا ہے۔ یہ گوشت بونگ کا ہونا چاہئے اور بڑے ٹکڑے ہونے چاہئیں۔ مثال کے طور پر اگر ایک کلو گوشت کا ٹکڑا ہے تو اس کے چار ٹکڑے کروا لیجئے۔ اس سے چھوٹے نہیں۔ اس کے علاوہ گوشت پر لگی چکنائی بھی بالکل صاف نہ کروائیں۔
1- گائے کا بونگ کا گوشت ایک کلو، چار ٹکڑے کروا لیجئے
2- نلی والی ہڈیاں ایک کلو
3- نمک ایک سے ڈیڑھ چائے کا چمچ یا حسب ذائقہ
4- سرخ مرچ پسی ہوئی دو ڈیڑھ سے دو کھانے کے چمچ یا حسب ذائقہ
5- ہلدی آدھا چائے کا چمچ
6- کشمیری مرچ پسی ہوئی دو کھانے کے چمچ، یہ تیکھی نہیں ہوتی، کھانے کو خوش رنگ بنا دیتی ہے
7- خشک دھنیا دو کھانے کے چمچ
8- سونٹھ دو بڑے ٹکڑے
9- پپلی چار عدد
10- بادیاں خطائی دو عدد پھول
11- اجوائن آدھا کھانے کا چمچ
12- جائفل پسا ہوا چوتھائی چائے کا چمچ
13- جلوتری ہسی ہوئی چوتھائ چائے کا چمچ
14- کالی مرچ آدھا کھانے کا چمچ
15- سفید زیرہ آدھا کھانے کا چمچ
16- کالا زیرہ آدھا کھانے کا چمچ
17- بڑی الائچی دو عدد
18- چھوٹی سبز الائچی پانچ عدد
19- سونف تین کھانے کے چمچ
20- لونگ چھ عدد
21- دار چینی ایک ایک انچ کے دو ٹکڑے
نوٹ: سیریل نمبر 7 سے سیریل نمبر 21 تک لکھے ہوئے تمام مصالحے باریک پیس / گرائنڈ کر لیجئے۔
22- گھی تین کپ
23- ادرک لہسن پیسٹ تین کھانے کے چمچ
24- گندم کا آٹا آدھا کپ
25- پانی حسب ضرورت
پوٹلی کے لئے ایک صاف ململ کا کپڑا کے لیجئے اور درج ذیل اجزاء پوٹلی مصالحہ کے ہیں؛
1- ثابت دھنیا چار کھانے کے چمچ
2- تیز پات دو بڑے پتے
ثابت دھنئے اور تیز پات کو ایک پوٹلی میں باندھ لیجئے
شاہی نہاری کو گارنش کرنے کے لئے درکار اجزاء؛
1- ادرک لمبی لمبی باریک کترنیں کٹی ہوئی چار کھانے کے چمچ یا حسب ضرورت
2- سبز مرچ باریک کٹی ہوئی چار کھانے کے چمچ یا حسب ضرورت و ذائقہ
3- ہرا دھنیا و پودینہ مکس باریک باریک کٹا ہوا چار کھانے کے چمچ
4- لیموں چھ عدد- چار عدد کے چار چار ٹکڑے کاٹ لیجئے اور دو لیمووں کے باریک باریک گول قتلے کاٹ لیجئے
شاہی نہاری کا اسپیشل گرم مصالحہ سرو کرتے وقت نہاری کے اوپر چھڑکنے کے لئے تیار کرنے کے لئے درکار اجزاء اور طریقہ؛
1- پپلی دو عدد
2- سفید زیرہ دو کھانے کے چمچ
3- کالی مرچ ایک کھانے کا چمچ
4- بڑی الائچی دو عدد
5- لونگ سات عدد
6- دارچینی ڈیڑھ انچ کا ٹکڑا
شاہی نہاری اسپیشل گرم مصالحہ کے تمام اجزا کو سل بٹے / کونڈی ڈنڈے / گرائنڈر میں بالکل باریک پیس کر بوتل میں بھر لیجئے۔ اور شاہی نہاری سرو کرتے وقت ذرا سا پلیٹ میں شاہی نہاری کے اوپر چھڑک دیجئے۔ اس سے شاہی نہاری کا ذائقہ اور خوشبو دوبالا ہو جاتی ہے-
شاہی نہاری تیار کرنے کی ترکیب
گوشت اور نلیاں اچھی طرح دھو لیجئے۔ ایک کافی بڑی بھاری پیندے کے دیگچے میں گھی گرم کر کے اس میں گوشت، نلیاں اور ادرک لہسن ڈال کر تین چار منٹ اچھی طرح ہلاتے ہوئے بھون لیجئے۔ اس کے بعد نمک، پسی سرخ مرچ، ہلدی، کشمیری سرخ مرچ اور دوسرے پسے ہوئے تمام مصالحے اس میں شامل کر کے تین سے چار منٹ تک چمچ چلاتے ہوئے مکس کرتے ہوئے بھونئے۔ اس کے بعد اس میں اتنا پانی ڈالیں کہ تمام بوٹیاں اور نلیاں اچھی طرح ڈوب جائیں۔ اس کے ساتھ ہی ثابت دھنئے اور تیز پات کی پوٹلی بھی ڈال دیجئے۔ اس میں آٹا بھی پانی میں اچھی طرح گھول کر اور چھان کر شامل کر دیجئے۔ اب اس کو پہلے تیز آنچ پر پکائیں جب ابلنے لگے تو آنچ ھلکی کر دیجئے اور دیگچے کے منہ پر ململ کا کپڑا ڈھک کر اس پر ڈھکن رکھ کر اس پر کوئی وزن رکھ دیجئے جیسے کہ سل کا بٹہ یا دوری وغیرہ۔ اور ڈھکن کو گندھے ہوئے آٹے کی مدد سے سیل seal کر دیجئے- اب اس کو ہلکی آنچ پر چھ گھنٹے تک پکنے دیجئے۔ یاد رکھئے کہ شاہی نہاری پریشر ککر میں نہیں بنائی جاتی۔ اگر ہریشر ککر میں بنائیں تو مصالحوں کا ذائقہ اور خوشبو شاہی نہاری میں نہیں آے گا۔ چھ گھنٹے بعد چیک کیجئے۔ یاد رکھئے کہ شاہی نہاری کا گوشت بالکل حلوئے کی طرح نرم ہونا چاہئے کہ چمچ سے دبانے پر ریشہ ریشہ ہو جائے۔ اگر گوشت خوب اچھی طرح گل گیا اور روغن اوپر آگیا ہو تو روغن کو کفگیر کی مدد سے اتار کر ایک الگ برتن میں ڈال لیجئے۔ دھنئے اور تیز پات کی پوٹلی اچھی طرح نچوڑ کر پھینک دیجئے۔ اب شاہی نہاری کا گاڑھا پن چیک کیجئے۔ اگر گاڑھا پن کم ہو تو آدھا کپ آٹا پانی میں گھول کر چھان لیجئے اور اس کو شاہی نہاری میں شامل کر کے ہلکی آنچ پر اتنا پکائیں کہ گریوی مناسب گاڑھی ہوجائے۔ شاہی نہاری تیار ہے۔ نلیاں نکال کر علیحدہ رکھئے اور ان کا مغز نکال لیجئے اب جب شاہی نہاری سرو کرنے کے لئے پلیٹ میں نکالیں تو الگ سے نکالی ہوئی نلی کا کچھ مغز اور پہلے سے نکالا ہوا روغن /:تری بھی تھوڑی سی اوپر ڈال دیجئے۔ اس پر ذرا سا پسا ہوا اسپیشل شاہی نہاری گرم مصالحہ چھڑک کر گارنش والے ہرے مصالحے کے ساتھ پیش کیجئے۔ تندوری نان یا خمیری روٹی کے ساتھ کھائیں، کھلائیں، خوب لطف اٹھائیں اور اللہ کریم سوھنے پاک رب العالمین کا شکر بجا لائیں آمین- یاد رکھئے کہ اگر آپ تمام مصالحوں کے ساتھ درست طریقے سے شاہی نہاری بنائیں تو آپ کو شاہی نہاری کا وہی ذائقہ ملے گا جس کو پرانے لوگ یاد کرتے ہیں-
