ایاز صدیقی شکوہ گزارِ چرخ ستمگر نہیں ہوں میں

[مہ جبین]

شکوہ گزارِ چرخ ستمگر نہیں ہوں میں ​

سرکار کا کرم ہے کہ مضطر نہیں ہوں میں​

​

شہرِ جمال میں بھی نہ اڑ پاؤں تیرے ساتھ​

موجِ ہوا ! اب ایسا بھی بے پر نہیں ہوں میں ​

​

طیبہ کے دشت و راغ بھی جنت بدوش ہیں ​

منّت پذیرِ گنبدِ بے در نہیں ہوں میں ​

​

صد شکر میں گدائے شہِ مشرقین ہوں ​

دارا و کیقیا و سکندر نہیں ہوں میں ​

​

مجھ کو درِ حضور سے دوری کا رنج ہے​

آلامِ روزگار کا خوگر نہیں ہوں میں ​

​

مجھ سے گریز پا ہیں زمانے کی ٹھوکریں ​

آقا ! کسی کی راہ کا پتھر نہیں ہوں میں​

​

مال و متاعِ عشقِ محمد ہے میرے پاس ​

یہ کس نے کہہ دیا کہ تونگر نہیں ہوں میں​

​

​

روشن ہے نورِ عشقِ محمد سے میرا دل​

پامالِ جلوہء مہ و اختر نہیں ہوں میں ​

​

آقا کے در پہ ہے سرِ تسلیمِ خم ایاز ​

اللہ جانتا ہے کہ خود سر نہیں ہوں میں​

ایاز صدیقی ​

 

[سید زبیر]

صد شکر میں گدائے شہِ مشرقین ہوں
دارا و کیقیا و سکندر نہیں ہوں میں
واہ ۔۔۔ سبحان اللہ ۔ آپ کی بدولت بہت خوبصورت کلام پڑھنے کو ملتا ہے جزاک اللہ

 

[مہ جبین]

صد شکر میں گدائے شہِ مشرقین ہوں
دارا و کیقیا و سکندر نہیں ہوں میں
واہ ۔۔۔ سبحان اللہ ۔ آپ کی بدولت بہت خوبصورت کلام پڑھنے کو ملتا ہے جزاک اللہ

بہت شکریہ سر جی ! آپ کا حسنِ ذوق ہے
جزاک اللہ

 

[عاطف بٹ]

مال و متاعِ عشقِ محمد ہے میرے پاس
یہ کس نے کہہ دیا کہ تونگر نہیں ہوں میں
سبحان اللہ، بہت خوب۔
جزاک اللہ خیرا خالہ جان

 

[حسان خان]

سبحان اللہ۔ بہت خوب کلام ہے

 

[Saadullah Husami]

ایاز صدیقی نے کیا پرُ معنی "سر " کیا ہے ۔ماشاء اللہ
آقا کے در پہ ہے سرِ تسلیمِ خم ایاز
اللہ جانتا ہے کہ خود سر نہیں ہوں میں

بہت خوب ۔مہ جبین صاحبہ ۔​

 

[مہ جبین]

عاطف بٹ ، حسان خان اور سعداللہ بھائی
آپ سب کا نعت کی پسندیدگی کا شکریہ

جزاکم اللہ