طویل غیر حاضری کے بعد ایک کاوش

[محمد شکیل خورشید]

ڈھل گئی رات صبح آئی نہ
حالتِ دل سنبھلنے پائی نہ
زندگی تو حسین تھی لیکن
میری پژمردگی کو بھائی نہ
کتنا سمجھایا تھا تجھے اے دل
پھر سے الفت میں چوٹ کھائی نہ
حالِ دل کیوں کہا سرِ محفل
ہو گئی پھر سے جگ ہنسائی نہ
کیا گلہ اس سے اے شکیل اگر
ہم نے رسمِ وفا نبھائی نہ

 

[نور وجدان]

اچھی کوشش ہے اسکی بحر کونسی ہے؟

 

[محمد ریحان قریشی]

اچھی کوشش ہے اسکی بحر کونسی ہے؟

خفیف مسدس مخبون محذوف(فاعلاتن مفاعلن فعلن)

 

[محمد تابش صدیقی]

دو حرفی نہ سے گریز بہتر ہے۔

 

[محمد ریحان قریشی]

نہ

نہ کو دو حرفی باندھنا مستحسن نہیں۔ بہتر ہوگا کہ ردیف بدل دیں یا غزل غیر مردف کہیں شاید کچھ یوں

ڈھل گئی رات پر نہ صبح آئی
حالتِ دل سنبھل نہیں پائی

 

[نور وجدان]

خفیف مسدس مخبون محذوف(فاعلاتن مفاعلن فعلن)

دو حرفی نہ سے گریز بہتر ہے۔

یہی کچھ گڑ بڑ لگی تھی

 

[فاخر رضا]

نا اور نہ کا استعمال کیا ہے

 

[شاہد شاہنواز]

حالتِ دل سنبھل نہیں پاتی ۔۔۔ اس طرح سے کوشش کرکے دیکھئے۔۔۔

 

[محمد تابش صدیقی]

نا اور نہ کا استعمال کیا ہے

نہ نہیں کے معنوں میں مستعمل ہے
جبکہ نا سابقہ کے طور پر مستعمل ہے یا پھر کسی بات پر زور دینے کے لیے۔ مثلاً ناممکن، نالائق
میرا ایک کام کر دیجیے نا۔
نہ کی جگہ نا استعمال نہیں ہو سکتا۔

 

[الف عین]

نہ کو نہیں سے بدل دیں، پوری غزل درست ہو جائے گی صرف اس شعر کو نکال دیں
ہو گئی پھر سے جگ ہنسائی نا !

 

[محمد شکیل خورشید]

تمام محترم اساتذہ اور ساتھیوں کا شکریہ
اگر میری ناعلمی کے تدارک کیلئے کوئی صاحب یہ فرما دیں کہ دو حرفی نہ کا اس طرح استعمال کیوں نا مناسب ہے تو نوازش ہوگی، یعنی اس میں کوئی تکنیکی پہلو ہے یا مستعمل نہیں یا کوئی اور پہلو ہے

 

[محمد تابش صدیقی]

تمام محترم اساتذہ اور ساتھیوں کا شکریہ
اگر میری ناعلمی کے تدارک کیلئے کوئی صاحب یہ فرما دیں کہ دو حرفی نہ کا اس طرح استعمال کیوں نا مناسب ہے تو نوازش ہوگی، یعنی اس میں کوئی تکنیکی پہلو ہے یا مستعمل نہیں یا کوئی اور پہلو ہے

دراصل نہ کا وزن ہے ہی یک حرفی۔ دو حرفی نا ہوتا ہے اور نا کامطلب "نہیں" نہیں ہوتا۔

 

[محمد شکیل خورشید]

دراصل نہ کا وزن ہے ہی یک حرفی۔ دو حرفی نا ہوتا ہے اور نا کامطلب "نہیں" نہیں ہوتا۔

یعنی اس طرح نہ کو ایک حرفی پڑھیں گے تو شعر وزن میں نہیں رہے گا؟ اور دو حرفی پڑھنے سے معنی غلط ہو جائے گا؟؟ میں درست سمجھا ہوں کیا؟

 

[شاہد شاہنواز]

دراصل نہ کا وزن ہے ہی یک حرفی۔ دو حرفی نا ہوتا ہے اور نا کامطلب "نہیں" نہیں ہوتا۔

یہی زیادہ تر "سقہ شعراء" کا وطیرہ ہے۔ تاہم کچھ لوگ جو شاعر بھی ہیں، دو حرفی "نا" کو بمعنی "نہیں" استعمال کرنے میں قباحت نہیں سمجھتے۔ ۔۔۔

 

[محمد تابش صدیقی]

یہی زیادہ تر "سقہ شعراء" کا وطیرہ ہے۔ تاہم کچھ لوگ جو شاعر بھی ہیں، دو حرفی "نا" کو بمعنی "نہیں" استعمال کرنے میں قباحت نہیں سمجھتے۔ ۔۔۔

ثقہ
جی لیکن غلط العوام ہی کہا جائے گا۔

 

[شاہد شاہنواز]

ثقہ
جی لیکن غلط العوام ہی کہا جائے گا۔

نہیں ۔۔۔ میں سمجھتا ہوں یہ دو مکاتبِ فکر کی بات ہے۔۔۔ اور جو مکتبہ فکر "نا" کے نفی میں استعمال کے خلاف ہے، وہ اکثریت میں ہے، سو اسی کی مانی جائے گی۔