وارث شاہ ایتھے کی کی وِکدا
وِکدا وِچ بزار
قبراں وِکدیاں
قبراں وِچوں بول وی وِکدے
یار وی وِکدا
اوہدے گَل دا ہار وی وِکدا
عشق دا ورقہ ورقہ وِکدا
وِکدے قول قرار
وارث شاہ ایتھے کی کی وِکدا
وِکدا وِچ بزار
ہٹیاں وِکدیاں
جٹیاں وِکدیاں
رنگ وی وِکدا
جھنگ وی وِکدا
ہِیراں وِکدیاں
رانجھے وِکدے
وِکدا تخت ہزار
وارث شاہ ایتھے کی کی وِکدا
وِکدا وِچ بزار
کھیڑے وِکدے
گیڑے وِکدے
ساہواں وِکدیاں
رُکھ رُکھ تے چھانواں وِکدیاں
مَجھاں وِکدیاں
گانواں وِکدیاں
وِکدے سارے کھوہ
وارث شاہ ایتھے کی کی وِکدا
وِکدا وِچ بزار
تُوں لبھدی پھریں بزار کُڑے
ایتھے کیہڑی شے جو وِکدی نہیں
تیرے دل دا جانی وِکدا
راوی دا سبھ پانی وِکدا
اَکھاں دے سبھ اتھرُو وِکدے
وارث شاہ ایتھے کی کی وِکدا
وِکدا وِچ بزار
ایتھے شِکر دوپہری وِکدی
شاماں وِکدیاں نیں
دن وی وِکدے
راتاں وِکدیاں
ایتھے جگر! جگراتے وِکدے
نیندراں وِکدیاں
سفنے وِکدے
سُفنیاں دے وِچ
سجُن وِکدے
وارث شاہ ایتھے کی کی وِکدا
وِکدا وِچ بزار
ایتھے جنگل بیلے وِکدے
منگل وِکدے، میلے وِکدے
ایتھے چن چناں وی وِکدے
سوہنی وِکدی
ماہی تے مہینوال وی وِکدا
ایتھے موجاں موجاں وِکدیاں
بیلے وِچھیاں لاشاں وِکدیاں
فوجاں وِکدیاں
وارث شاہ ایتھے کی کی وِکدا
وِکدا وِچ بزار
اوہدے گل دی گانی وِکدی
ہر اِک پیار نشانی وِکدی
گور پیا کوئی ہور وی وِکدا
بُکل دے وچ چور وی وِکدا
ایتھے تخت لہور وی وِکدا
کیہ جاناں میں کون کوئی وِکدا
وارث شاہ ایتھے کی کی وِکدا
وِکدا وِچ بزار
تُوں لکھ لکھ مارے وین
وارث شاہ
ایتھے لکھاں روندیاں دِھیاں وِکدیاں
ایتھے جیوندیاں مانواں وِکدیاں
نی مائے میں کنوں دَسّاں
ایتھے مر گئياں ماواں وِکدیاں
وارث شاہ ایتھے
وارث شاہ میں تینوں آکھاں
ہائے وے میں وی مر گئیاں
فیر وی میں مر گئی ہاں
دامن! تو کیویں کہندا سی
پٗتّر ہٹّاں تے نہیں وِکدے
پر ایتھے پال تے پالنے وِکے
پنچھی تے فیر آہلنے وِکے
ایتھے گھر گھروندے وِکے
ایتھے بند تے بُوہے وِکے
ایتھے میرا کمرہ وِکیا
کی کی وِکیا نہیں
کناں سُنیاں بول نہیں وِکیا
اکھاں ویکھے ویکھ نہیں وِکے
ہر اِک دل دا منظر وِکیا
اندر وِکیا باہر وِکیا
کیہ کیہ رنگ رتول نئیں وِکیا
اوہدا برش کینوس وی وِکیا
ہر اِک رُت دی لیکھا وِکی
تیری پیار بھلیکھا دی
تیری سبھ اُڈیک وی وِکی
اوہدے میرے ہاسے وِکے
اوہدے میرے اتھرُو وِکے
اوہدا ہر اِک چتر وِکیا
میرا ہر اک اکھر وِکیا
مٹی دا ہر ذرہ ذرہ
میرے گھر دی اِٹ اِٹ وِکی
میری شب و روز وی وِکیا
میرا امروز وہ وِکیا
میرا اج اجوکا وِکیا
تے میرا اِک سُورج وِکیا
ایش ٹرے توں سانبھے
سگرٹ دے ٹوٹے وِکے
ساحر دی اوہ خُوشبو وِکی
اوہدی کوئی رسید نہ منگی
اندر دا بس بھانبڑ وِکیا
اوہدا پر پرچھاواں وِکیا
تے میرا اکلاپا وِکیا
ہر اِک مِلن والا وِکیا
تے وِچھڑن والا وِکیا
ہر کوِیتا تے کہانی وِکی
میری ناگ منی وی وِکی
ویساکھی تے ہولی وِکی
ماں وِکی، ماں بولی وِکی
سارے پُھل کھڑن وی وِکے
رُکھ وِکے تے بُوٹے وِکے
وا دے سارے جُھوٹے وِکے
میریاں ساریاں ہوکاں وِکیاں
اوہ کوئل دی کوکاں وِکیاں
تے میرا ٹُرنا وی وِکیا
میری اَج اخیر وی وِکی
میرا ہر ایک ویس وی وِکیا
دلی وِکی، دیس وی وِکیا
ہائے نی وارث شاہ
تُوں وی وِک گئیاں ایں
کی تکنا پنجاب وارث شاہ
تُوں تک اپنا پنجاب نی مائے
تک اپنا پنجاب
وارث شاہ ایتھے کی کی وِکدا
وِکدا وچ بزار
حسن مجتبٰی
