ماشاء اللہ آپ کا انداز تحریر اچھا ہے لیکن قرآن و حدیث کے مقابلے میں ذاتی رائے، منطق اور ذاتی استدلال کی کوئی حیثیت نہیں ہوتی۔ قرآن پاک کا تھوڑا سا علم رکھنے والا مسلمان بھی جانتا ہے کہ قرآن پاک کی ایک ایک سورۃ میں بیسیوں مسائل بیان ہوتے ہیں اس لئے سورۃ کا سیاق وسباق نہیں دیکھا جاتا ۔ آیت کا سیاق و سباق دیکھ کر مسئلہ اخذ کیا جاتا ہے۔ مرد اور عورت میں فضیلت کا استدلال قرآن و حدیث سے اخذ کریں گے نا کہ ذاتی رائے سے۔ نبی کریم صلی اللہ علیہ وسلم نے فرمایا کہ اگر اللہ کے علاوہ کسی کو سجدہ روا ہوتا تو میں عورت کو حکم دیتا کہ وہ خاوند کو سجدہ کرے۔ کیا اس حدیث مبارکہ کے بعد کوئی مسلمان خاوند کی فضیلت سے انکار کرنے کی جرات کر سکے گا؟یہاں عورت اور مرد کی فضیلت پر بات نہیں ہورہی یہاں تذکرہ خاوند اور بیوی کا ہو رہا ہے اور یقینا اسلام میں خاوند کو فضیلت حاصل ہے بیوی پر۔ یہ نہیں کہ مرد کوصرف ذمہ داریاں زیادہ سونپی گئیں ہیں۔ اس دھاگے کا عنوان ہے مروجہ جہیز کی برائیاں، میرا موقف یہ ہے کہ اسلامی تعلیمات کی رو سے جہیزکی ذمہ داری مرد پر ہے نہ کہ عورت پر ۔ جس کے لئے میں نے قرآن و حدیث اور فقہ حنفی سے دلائل پیش کئے ہیں۔ اگر اس موضوع پر دلائل دیئے جائیں تو موضوع سے مطابقت قائم رہ سکے گی۔
آپ نے اپنی اس تحریر میں ایسی باتیں کردیں ہیں کہ انتہائی مصروفیت کے باوجود آپ کے استدلال کا کم زکم مختصراً جواب دینا میں لازمی سمجھتا ہوں ۔ آپ کے استدلال کے جواب میں اپنی بات مختصر اس لیئے کر رہا ہوں کہ یہ دھاگہ اس بحث کا متحمل نہیں ہوسکتا کہ جو نکتہ آپ نے اٹھایا ہے وہ دھاگے کے موضوع سے مطابقت نہیں رکھتا ۔ اگر اس پر آپ کو "علمی بحث " مقصود ہے تو اس کے لیئے آپ ایک نیا دھاگہ تخلیق کرسکتے ہیں ۔
قرآن مجید دنیا کی واحد کتاب ہے،جس کے بارے میں عموماً تاثر یہ ہے کہ کہ اس کا ہر جملہ ایک سے زیادہ معنی رکھتا ہے۔ اوریہ چیز اس کے معجزانہ پہلو کی حیثیت سے بیان کی جاتی ہے، بہ نظر تامل اگر دیکھا جائے تو اسے خوبی قرار نہیں دیا جا سکتا۔قرآن مجید ہی نہیں بلکہ آپ کسی بھی کتاب کا جملہ سیاق و سباق سے کاٹ دیں تو اس میں ایک سے زیادہ معنی کا احتمال پیدا ہوجاتا ہے۔چنانچہ وہ لوگ جو اپنی مرضی کے معنی قرآن مجید سے اخذ کرنا چاہتے ہیں،انھیں کلام الٰہی سے منسوب،یہ معجزبیانی بڑا سہارا دیتی ہے ۔ اوراسی بنیاد پر کسی کے لیئے اپنی رائے کے مطابق کسی بھی آیات سے خود ساختہ معنی نکالنا اس کے لیے مشکل نہیں رہتا۔ لیکن یہ کسی بھی طور ایسی کتاب کی خصوصیت نہیں ہو سکتی جو ایک واضح پیغام، متعین شریعت اور اعلیٰ حقائق کی حامل ہو اور خصوصاً اس کے مخاطب وہ عرب ہوں جو سادہ اور واضح اسلوب نگارش پسند کرتے اور ایسا ادب تخلیق کرتے ہوں جو فطرت کے بالکل قریب ہو اور جس میں مصنوعی خیال ، استعارے اور محض لفاظی کو کوئی دخل حاصل نہ ہو ۔ قرآن مجید کی ہر آیت ایک واضح اور متعین پیغام کی حامل ہے۔چنانچہ اسے سمجھنے کے لیے ضروری ہے کہ ہر آیت کو اس کے سیاق و سباق میں رکھ کر دیکھا جائے۔پوری سورہ کا مضمون، اس باب کا مرکزی خیال،جس میں یہ سورہ رکھی گئی ہے اور زیر بحث آیت کی سابق ولاحق آیات جب تک ایک مفہوم کے ساتھ ہم آہنگ نہ ہو جائیں، کسی مفہوم کو قرآن مجید کا مفہوم قرار نہیں دیا جا سکتا۔اصل حقیقت یہ ہے کہ وہ شخص جو قرآن کے دائرے میں نہ رہنا چاہتا ہو،اس کے لیے دو راستے ہیں۔ایک راستہ یہ ہے کہ وہ زبان کے قواعد و ضوابط کی شکل بگاڑ کر ان سے چھٹکارا حاصل کر لے اور دوسرا راستہ یہ کہ قواعد و ضوابط کی پابندیوں ہی کو ماننے سے انکار کر دے۔یہ دونوں طریقےکسی بھی طور پر جائز قرار نہیں دیئے جاسکتے ۔ چنانچہ قرآن مجید کی اہمیت اور مقام کا تقاضا یہ ہے کہ اس کی تفسیر ان اصولوں کے مطابق کی جائے جو ابتدائی زمانے ہی سے اہل حق نے طے کر دیے ہیں۔
لہذا ٰ یہ ضروری ہے کہ قرآن مجید کے معنی طے کرتے ہوئے،ایک ہی تاویل ،ایک ہی مفہوم تک پہنچنے کی کوشش کی جائے۔ کوئی آیت ظاہر الفاظ میں ایک سے زائد معنی کا احتمال رکھتی ہو تو نظم کلام، سیاق وسباق اور نظائر کلام کی روشنی میں،اس کا مفہوم ٹھیک ٹھیک متعین ہوجائے گا ۔ الفاظ کے تمام احتمال بیان کر دینا قرآن مجید کی کوئی خدمت نہیں ہے اور اس طرح ایک واضح کتاب ہونے کی نفی ہوتی ہے ۔
اور آپ نے عورت اور مرد کے درمیان فضلیت کے ذاتی استدلال کا جو نکتہ ، قرآن و حدیث کے حوالے سے پیش کیا ہے ۔ وہ اتنا غیر منطقی ہے کہ فی الوقت مجھےاس کا کوئی منطقی جواب نہیں سوجھ رہا ہے ۔ ( اس کے لیئے میں معذرت خواہ ہوں ) ۔
