شہزاد احمد ممکن ہو آپ سے تو بھلا دیجئے مجھے - شہزاد احمد

[صائمہ شاہ]

ممکن ہو آپ سے تو بھلا دیجئے مجھے
پتھر پہ ہوں لکیر مٹا دیجئے مجھے

ہر روز مجھ سے تازہ شکایت ہے آپ کو
میں کیا ہوں، ایک بار بتا دیجئے مجھے

میرے سوا بھی ہے کوئی موضوعِ گفتگو
اپنا بھی کوئی رنگ دکھا دیجئے مجھے

میں کیا ہوں کس جگہ ہوں مجھے کچھ خبر نہیں
ہیں آپ کتنی دور صدا دیجئے مجھے

کی میں نے اپنے زخم کی تشہیر جا بجا
میں مانتا ہوں جرم سزا دیجئے مجھے

قائم تو ہو سکے کوئی رشتہ گہر کے ساتھ
گہرے سمندروں میں بہا دیجئے مجھے

شب بھر کرن کرن کو ترسنے سے فائدہ
ہے تیرگی تو آگ لگا دیجئے مجھے

جلتے دنوں میں خود پسِ دیوار بیٹھ کر
سائے کی جستجو میں لگا دیجئے مجھے

شہزادؔ یوں تو شعلۂ جاں سرد ہو چکا
لیکن سُلگ اٹھیں تو ہوا دیجئے مجھے

​

 

[طارق شاہ]

بہت اچھا انتخاب ہے

شہزادؔ یوں تو شعلۂ جاں سرد ہو چکا
لیکن سُلگ اٹھیں تو ہوا دیجئے مجھے

 

[رانا]

قائم تو ہو سکے کوئی رشتہ گہر کے ساتھ​

گہرے سمندروں میں بہا دیجئے مجھے​

بہت عمدہ انتخاب ہے۔ شکریہ۔​

​

 

[محمد بلال اعظم]

شہزاد صاحب کی غزلیں کافی لمبی ہوتی ہیں، 5،6 اشعار کی غزلیں تو بہت ہی نایاب ہیں ان کی شاعری میں۔

 

[محمد بلال اعظم]

بہت ہی پیاری غزل ہے۔

 

[مقدس]

ہر روز مجھ سے تازہ شکایت ہے آپ کو
میں کیا ہوں، ایک بار بتا دیجئے مجھے

میرا بھی اکثر یہی رونا ہوتا ہے

 

[فاتح]

گہرے سمندروں میں بہا دیجئے مجھے

بحیرۂ مردار بہتر رہے گا کہ وہاں ڈوب نہیں سکتا کوئی۔

 

[محمداحمد]

شب بھر کرن کرن کو ترسنے سے فائدہ
ہے تیرگی تو آگ لگا دیجئے مجھے

سبحان اللہ! خوبصورت غزل ہے۔

 

[صائمہ شاہ]

بحیرۂ مردار بہتر رہے گا کہ وہاں ڈوب نہیں سکتا کوئی۔

ساری غزل میں سے ایک ہی مصرعے نے اٹریکٹ کیا آپکو ؟ اور بحیرہ مردار کے بارے میں کیا کہوں " ہوئے تم دوست جس کے "

 

[فاتح]

ساری غزل میں سے ایک ہی مصرعے نے اٹریکٹ کیا آپکو ؟ اور بحیرہ مردار کے بارے میں کیا کہوں " ہوئے تم دوست جس کے "

ہم نے اس مصرع کو پسندیدہ تو قرار ہی نہیں دیا تھا بلکہ محض مقام کا تعین کیا تھا کہ آپ اگر ڈوبنا ہی چاہ رہی ہیں تو کون سا سمندر مناسب رہے گا۔

 

[صائمہ شاہ]

طارق شاہ ، بلال اعظم ، رانا صاحب ، محمد احمد پسند فرمانے کا شکریہ
مقدس ، اسی شکایت کے بہانے آپ نے ہر ہماری پوسٹ پر قدم رنجہ تو فرمایا
فاتح بےحد ممنون ہیں ایک مصرعہ پسند فرمانے کے لیے۔

 

[ابن سعید]

ہم نے اس مصرع کو پسندیدہ تو قرار ہی نہیں دیا تھا بلکہ محض مقام کا تعین کیا تھا کہ آپ اگر ڈوبنا ہی چاہ رہی ہیں تو کون سا سمندر مناسب رہے گا۔

فاتح بےحد ممنون ہیں ایک مصرعہ پسند فرمانے کے لیے۔

مقام کا تعین بھی مشاورت کے بعد ہوا تھا۔۔۔

 

[صائمہ شاہ]

ہم نے اس مصرع کو پسندیدہ تو قرار ہی نہیں دیا تھا بلکہ محض مقام کا تعین کیا تھا کہ آپ اگر ڈوبنا ہی چاہ رہی ہیں تو کون سا سمندر مناسب رہے گا۔

ہم تو وہ ہیں جو " خود تو ڈوبے ہیں صنم تم کو بھی لے ڈوبیں گے " پر یقین رکھتے ہیں سمندر خواہ کوئی بھی ہو

 

[صائمہ شاہ]

مقام کا تعین بھی مشاورت کے بعد ہوا تھا۔۔۔

بروٹس یو ٹو؟؟؟؟؟؟

 

[فاتح]

مقام کا تعین بھی مشاورت کے بعد ہوا تھا۔۔۔

جی بالکل! بلکہ اس مقام کی نشان دہی آنجناب نے ہی فرمائی تھی۔

 

[صائمہ شاہ]

جی بالکل! بلکہ اس مقام کی نشان دہی آنجناب نے ہی فرمائی تھی۔

بھیا آپ کب سے صفِ دشمناں میں شامل ہو گئے؟

 

[فاتح]

بھیا آپ کب سے صفِ دشمناں میں شامل ہو گئے؟

آپ کے یہ بھیا تو روزِ اول سے ہی ہماری صفوں میں شامل ہیں

 

[صائمہ شاہ]

آپ کے یہ بھیا تو روزِ اول سے ہی ہماری صفوں میں شامل ہیں

دیکھیں ہمارے بھائی کی فراخدلی
ویسے آپکو کیا ضرورت ہے کسی سہارے کی آپ تو اکیلے ہی کافی ہیں

 

[ابن سعید]

بروٹس یو ٹو؟؟؟؟؟؟

جی بالکل! بلکہ اس مقام کی نشان دہی آنجناب نے ہی فرمائی تھی۔

بھیا آپ کب سے صفِ دشمناں میں شامل ہو گئے؟

ہم نے تو دشمنوں کی صفوں میں رہ کر اپنی بٹیا رانی کی حفاظت کی سعی کی تھی۔ آپ کو علم تو ہے نہ کہ بحر مردار میں کوئی بھی ذی حیات نہیں نیز اس کا پانی اتنا کثیف ہے کہ کوئی اس میں ڈوبتا ہی نہیں بلکہ سطح آب پر ایسے تیرتا ہے جیسے کوئی کشتی کھلی چھوڑ دی گئی ہو۔ لہٰذا ہم نے سوچا کہ یہ محفوظ ترین سمندر ہوگا۔ لیکن بٹیا رانی کو بھائی مشکوک نظر آئیں تو پھر بھیا کے ڈوب مرنے کی گھڑی ہوتی ہے، خواہ وہ کوئی سمندر ہو خواہ چلو بھر پانی۔

 

[فاتح]

دیکھیں ہمارے بھائی کی فراخدلی
ویسے آپکو کیا ضرورت ہے کسی سہارے کی آپ تو اکیلے ہی کافی ہیں

اس میں ان کی فراخ دلی کہاں سے آ گئی۔۔۔ یہ تو رحم دلی کہلائے گی کہ انھوں نے بحیرۂ مردار کا انتخاب کیا بہن کو ڈبونے کے لیے۔۔۔ ہاہاہاہا