میں زمیں زاد ہی سہی لیکن (بحرِ خفیف)

[نوید ناظم]

میں زمیں زاد ہی سہی لیکن
آسماں سے گزر کر آیا ہوں

جانتا ہوں عدم کو اچھی طرح
میں وہاں سے گزر کر آیا ہوں

بیچ میں حرفِ کُن بھی آیا تھا
میں جہاں سے گزر کر آیا ہوں

وہ جبینیں ملائکہ کی تھیں
جس نشاں سے گزر کر آیا ہوں

اب نہیں واپسی کا رستہ بھی
اب تو جاں سے گزر کر آیا ہوں​

 

[نوید ناظم]

محترم سر الف عین
دیگر اساتذہءِ کرام

 

[محمد ریحان قریشی]

بہت خوب!

اب نہیں واپسی کا رستہ بھی

یہ مصرع بہتر بنایا جا سکتا ہے مثلاََ
اب نہیں واپسی کی کوئی رہ
اب نہیں کوئی واپسی کی رہ
اب نہیں واپسی کی راہ کوئی

 

[محمد خلیل الرحمٰن]

خوبصورت غزل۔ داد قبول فرمائیے۔

محمد ریحان قریشی بھائی کی اصلاح خوب ہے، قبول کرلیجے۔

اب نہیں واپسی کی راہ کوئی​

 

[نوید ناظم]

بہت خوب!

یہ مصرع بہتر بنایا جا سکتا ہے مثلاََ
اب نہیں واپسی کی کوئی رہ
اب نہیں کوئی واپسی کی رہ
اب نہیں واپسی کی راہ کوئی

بہت شکریہ ریحان بھائی۔۔
"'اب نہیں واپسی کی راہ کوئی"
ممنون ہوں کہ بہت خوبصورت اور رواں مصرعہ دیا آپ نے۔

 

[نوید ناظم]

خوبصورت غزل۔ داد قبول فرمائیے۔

محمد ریحان قریشی بھائی کی اصلاح خوب ہے، قبول کرلیجے۔

اب نہیں واپسی کی راہ کوئی​

بہت شکریہ کہ آپ نے غزل کو پسند فرمایا۔
آپ کی "صلاح" بھی خوب ہوا کرتی ہے

 

[عرفان سعید]

بیچ میں حرفِ کُن بھی آیا تھا
میں جہاں سے گزر کر آیا ہوں

وہ جبینیں ملائکہ کی تھیں
جس نشاں سے گزر کر آیا ہوں

بہت ہی اعلی! چھوٹی بحر میں بلند تخیل کی عمدہ مثال!

 

[الف عین]

اچھی غزل ہے۔ اگر ردیف میں ’کر‘ کی جگہ ’کے‘ کر دیا جائے تو کیا روانی میں اضافہ ہوتا ہے؟
ایک شعر میں مجھے خامی محسوس ہوئی۔
وہ جبینیں ملائکہ کی تھیں
جس نشاں سے گزر کر آیا ہوں
جبینیں جب جمع میں استعمال کی گئی ہیں تو دوسرے مصرعے میں بھی ’نشانوں‘ استعمال کرنا چاہئے تھا نا!!
الفاظ بدل کر دیکھو

 

[نوید ناظم]

بہت ہی اعلی! چھوٹی بحر میں بلند تخیل کی عمدہ مثال!

بڑی نوازش!

 

[نوید ناظم]

اچھی غزل ہے۔ اگر ردیف میں ’کر‘ کی جگہ ’کے‘ کر دیا جائے تو کیا روانی میں اضافہ ہوتا ہے؟
ایک شعر میں مجھے خامی محسوس ہوئی۔
وہ جبینیں ملائکہ کی تھیں
جس نشاں سے گزر کر آیا ہوں
جبینیں جب جمع میں استعمال کی گئی ہیں تو دوسرے مصرعے میں بھی ’نشانوں‘ استعمال کرنا چاہئے تھا نا!!
الفاظ بدل کر دیکھو

بہت شکر سر۔۔۔۔
"اچھی غزل ہے۔ اگر ردیف میں ’کر‘ کی جگہ ’کے‘ کر دیا جائے تو کیا روانی میں اضافہ ہوتا ہے؟"
'کے' سے روانی میں شاید فرق آئے لیکن 'کر' بہتر لگا تھا اس لیے استعمال کیا۔

ایک شعر میں مجھے خامی محسوس ہوئی۔
وہ جبینیں ملائکہ کی تھیں
جس نشاں سے گزر کر آیا ہوں
جبینیں جب جمع میں استعمال کی گئی ہیں تو دوسرے مصرعے میں بھی ’نشانوں‘ استعمال کرنا چاہئے تھا نا!!
الفاظ بدل کر دیکھو

سر یہ بات تو بالکل درست۔۔۔۔ یہ خامی تو ہے شعر میں، الفاظ بدلوں گا تو خیال بھی بدل جائے گا، میری درخواست تو یہی ہے کہ اسے رعایت ملے اور ایسے ہی قبول ہو جائے۔

 

[الف عین]

مابدولت تو قبول کر لیں گے لیکن عوام و خواص؟

 

[نوید ناظم]

مابدولت تو قبول کر لیں گے لیکن عوام و خواص؟

بہتر سر،
الفاظ بدل دیے، اب ملاحظہ کیجیے گا،
سجدہ گاہِ ملائکہ تھی وہ
جس نشاں سے گزر کر آیا ہوں

 

[الف عین]

بہتر سر،
الفاظ بدل دیے، اب ملاحظہ کیجیے گا،
سجدہ گاہِ ملائکہ تھی وہ
جس نشاں سے گزر کر آیا ہوں

بہت خوب ہو گیا یہ اب۔