نئی کوشش

[محمد شکیل خورشید]

نالہ بے کیف، بے نوا ٹھہرا
کیوں مرا درد لا دوا ٹھہرا
ساری تعزیر میرے نام آئی
اور زمانہ تو پارسا ٹھہرا
گھوم پھر کر تمام دنیا میں
دل تری زلف پر ہی جا ٹھہرا
بات مبہم تو اس کی بھی ہوگی
پر ، مرا فہم نا رسا ٹھہرا
اس کو چاہا شکیلؔ، سب نے ہی
میرا انداز نا روا ٹھہرا

 

[شاہد شاہنواز]

نالہ بے کیف، بے نوا ٹھہرا
کیوں مرا درد لا دوا ٹھہرا
۔۔۔ بے کیف و بے نوا کر لیجئے۔ اب یہ ترکیب درست ہے یا نہیں جناب @الف عین بتا سکتے ہیں۔

ساری تعزیر میرے نام آئی
اور زمانہ تو پارسا ٹھہرا
۔۔۔ اور زمانہ ۔۔۔ "یہ زمانہ تو پارسا ٹھہرا "بھی کرسکتے ہیں۔ کیونکہ اور "ار" ہو رہا ہے۔

گھوم پھر کر تمام دنیا میں
دل تری زلف پر ہی جا ٹھہرا
۔۔ ۔درست

بات مبہم تو اس کی بھی ہوگی
پر ، مرا فہم نا رسا ٹھہرا
۔۔۔ پہلا مصرع کسی قدر بہتر ہوسکے تو کرلیجئے۔۔

اس کو چاہا شکیلؔ، سب نے ہی
میرا انداز نا روا ٹھہرا
۔۔۔ "ہی" کسی مصرعے کے آخر میں لانا شاذو نادر ہی درست ہوسکتا ہے۔ اس نے یہاں مصرع کمزور کردیا۔۔۔

 

[نور وجدان]

نالہ بے کیف، بے نوا ٹھہرا
کیوں مرا درد لا دوا ٹھہرا

ایک چھوٹی سی بات پوچھنی ہے کہ پہلے مصرعے میں وجہ تو بتادی ہے تو دوسرے میں کیوں کا استعمال ہونا چاہیے؟

 

[محمد شکیل خورشید]

ایک چھوٹی سی بات پوچھنی ہے کہ پہلے مصرعے میں وجہ تو بتادی ہے تو دوسرے میں کیوں کا استعمال ہونا چاہیے؟

آپ اصلاح فرما دیں، میں تو طفلِ مکتب ہوں، یہاں آنے کا مقصد ہی سیکھنا ہے

 

[محمد شکیل خورشید]

تفصیلی اصلاح کا بہت بہت شکریہ
یہ زمانہ تو پارسا ٹھہرا، ۔۔۔۔۔ اس طرح بہت بہتر لگ رہا ہے
آخری مصرع کو اگر یوں کرلوں تو
"اس کو چاہا شکیل سب ہی نے"
کیا یہ بہتر رہے گا؟

 

[نور وجدان]

آپ اصلاح فرما دیں، میں تو طفلِ مکتب ہوں، یہاں آنے کا مقصد ہی سیکھنا ہے

اساتذہ کرام ہی اصلاح فرمائیں گے، میں تو خود طالب علم ہوں

 

[الف عین]

مطلع اور اگلے شعر میں شاہد نے اچھا مشورہ دیا ہے
پر ، مرا فہم نا رسا ٹھہرا
یہاں ابتدا میں پر، بمعنی مگر، اچھا نہیں لگ رہا۔ ویسے نا رسا کا مطلب یہان درست نہیں۔
اس کو چاہا شکیلؔ، سب نے ہی
میرا انداز نا روا ٹھہرا
بہتر ہے پہلے مصرع کو بدل دیں
چاہتے ہیں اسے شکیل سبھی
یا
چاہتے ہیں اسے سبھی، پہ شکیل
تو بہتر ہو گا

 

[محمد شکیل خورشید]

مطلع اور اگلے شعر میں شاہد نے اچھا مشورہ دیا ہے
پر ، مرا فہم نا رسا ٹھہرا
یہاں ابتدا میں پر، بمعنی مگر، اچھا نہیں لگ رہا۔ ویسے نا رسا کا مطلب یہان درست نہیں۔
اس کو چاہا شکیلؔ، سب نے ہی
میرا انداز نا روا ٹھہرا
بہتر ہے پہلے مصرع کو بدل دیں
چاہتے ہیں اسے شکیل سبھی
یا
چاہتے ہیں اسے سبھی، پہ شکیل
تو بہتر ہو گا

رہنمائی کا شکریہ

 

[شاہد شاہنواز]

تفصیلی اصلاح کا بہت بہت شکریہ
یہ زمانہ تو پارسا ٹھہرا، ۔۔۔۔۔ اس طرح بہت بہتر لگ رہا ہے
آخری مصرع کو اگر یوں کرلوں تو
"اس کو چاہا شکیل سب ہی نے"
کیا یہ بہتر رہے گا؟

چاہتے ہیں اسے شکیل سبھی ۔۔۔
یہ سب سے بہتر ہے ، میری نظر میں ۔۔۔
۔

 

[شاہد شاہنواز]

ایک چھوٹی سی بات پوچھنی ہے کہ پہلے مصرعے میں وجہ تو بتادی ہے تو دوسرے میں کیوں کا استعمال ہونا چاہیے؟

آپ شاید یہ کہنا چاہتی تھیں کہ "یوں مرا درد لادوا ٹھہرا " کر لیا جائے ۔۔۔

 

[نور وجدان]

آپ شاید یہ کہنا چاہتی تھیں کہ "یوں مرا درد لادوا ٹھہرا " کر لیا جائے ۔۔۔

جی بالکل ...نالہ تو بے کیف تھا، سنا نہ گیا ... تو وجہ تو بیان کردی، پھر سوال بھی ہے