آج کا شعر - 4

[کاشفی]

ہو گیا سلسلہٴ مہر و محبت برہم
نازنیں بھول گئے ناز و ادا میرے بعد
(خواجہ حیدر علی آتش)

 

[راجہ صاحب]

کوئی اور تو نہیں ہے پسِ خنجر آزمائی
ہمِیں قتل ہو رہے ہیں، ہمِیں قتل کر رہے ہیں

نامعلوم

 

[کاشفی]

بہنے دو انہیں یار کے آگے آتش
دل کا احوال بھی آنکھوں کو بیان کرنے دو
(خواجہ حیدر علی آتش)

 

[راجہ صاحب]

دیوار شب اور عکس رخ یار سامنے
پھر دل کے آئینے سے لہو پھوٹنے لگا
پھر وضع احتیاط سے دھندھلا گئی نظر
پھر ضبط آرزو سے بدن ٹوٹنے لگا


فیض احمد فیض

 

[کاشفی]

دل کی آگ کہاں لے جاتے، جلتی بُجھتی چھوڑ چلے
بنجاروں سے ڈرنے والو! لو ہم بستی چھوڑ چلے

آگے آگے چیخ رہا ہے صحرا کا اک زرد سفر
دریا جانے، ساحل جانے، ہم تو کشتی چھوڑ چلے

مٹی کے انبار کے نیچے ڈوب گیا مُستقبل بھی
دیواروں نے دیکھا ہوگا، بچے تختی چھوڑ چلے

دُنیا رکھے چاہے پھینکے، یہ ہے پڑی زنبیلِ سُخن
ہم نے جِتنی پُونجی جوڑی، رتّی رتّی چھوڑ چلے

ساری عمر گنوادی قیصر، دو گز مٹی ہاتھ لگی
کتنی مہنگی چیز تھی دُنیا، کتنی سَستی چھوڑ چلے
(قیصر الجعفری)

 

[راجہ صاحب]

مجھہ کو معلوم نہ تھی ہجر کی یہ رمز، کہ تو
جب میرے پاس نہ ہوگا۔۔۔۔۔ تو بہر سو ہوگا
احمد ندیم قاسمی

 

[کاشفی]

شکر پردے ہی میں اُس بُت کو حیا نے رکھا
ورنہ ایمان گیا ہی تھا، خدا نے رکھا
(ذوق)

 

[کاشفی]

ذوق نے ہو زلف کو چھیڑا تو لے مجھ سے قسم
تونے خود چھیڑا اُسے اور برہم اتنا ہوگیا
(ذوق)

 

[کاشفی]

آگ ہے دل میں، درد جگر میں، آنکھ میں آنسو، لب پہ فغاں
عشق نے اُس کے ذوق ہمارا دیکھ لو ، ہےیہ حال کیا
(ذوق)

 

[کاشفی]

چاندنی نے شب تجھ بن، روپ یہ دکھایا تھا
مجھ کو ماہتابی پر، دھوپ میں بٹھایا تھا
(ذوق)

 

[کاشفی]

بعدِ فراق کوئی دن، ایسا نہ وصل کا ہوا
وہ کہیں تم کو کیا ہوا، ہم کہیں تم کو کیا ہوا
(ذوق)

 

[راجہ صاحب]

لرز گئی تیری لَو میرے ڈگمگانے سے
چراغِ گوشہء کوئے حبیب ! کیا کہنا
(مجید امجد)

 

[کاشفی]

ہوئے انسان ہم دردِ محبت کے لیئے پیدا
فرشتے ہوتے گر ہوتے عبادت کے لیئے پیدا
(ذوق)

 

[راجہ صاحب]

نا سپاسی کی بھی حد ہے جو یہ کہتے ہو فراز
زندگی ہم نے گزاری ہے گزارے کی مثال

احمد فراز

 

[راجہ صاحب]

اے ذوق دیکھ دخترِ رز کو نہ منہ لگا
چھٹتی نہیں ہے منہ سے یہ کافر لگی ہوئی

 

[کاشفی]

یارب یہ اس زمانہ کے لوگوں کو کیا ہوا
جس کا برا ہو، اُن کو یہ کہنا، بھلا ہوا
(ذوق)

 

[راجہ صاحب]

پھر اس کی یاد میں دل بے قرار ہے ناصر
بچھڑ کے جس سے ہوئی شہر شہر رسوائی
ناصرکاظمی

 

[کاشفی]

لے گیا دل کون میرا، ذوق کس کا نام لوں
سامنے آجائے تو شاید بتا دوں دیکھ کر
(ذوق)

 

[راجہ صاحب]

گزرے ہیں عشق نام کے دنیا میں اک بزرگ
ہم بھی فقیر ایک اسی سلسلے کے ہیں
(میر)

 

[کاشفی]

پھر تو آئے خیر سے ہم جاکے اُس مغرور تک
پر اُچھلتا ہی رہا اپنا کلیجہ دُور تک
(ذوق)