آج کا شعر - 5

[مدیحہ گیلانی]

تو اک چراغ جہان دگر ہے کیا جانے
ہم اس زمین پہ کس طرح شب گذارتے ہیں
عرفان صدیقی

 

[مدیحہ گیلانی]

ہر حال میں ان کی موجِ کرم تھی چارہ گرِ ادبار و الم
حد سے گزری جب تلخی ء غم ، لطفِ شہِ بطحا اور ہوا

اندازِ پذیرائی سے ہوا رنگ ان کی محبت کا گہرا
رحمت کے دریچے اور کھلے ، مدحت کا تقاضا اور ہوا
حفیظ تائب

 

[صائمہ شاہ]

دل دینے کی ایسی حرکت اُن نے نہیں کی
جب تک جیے گا میر پشیمان رہے گا

میر تقی میر

 

[صائمہ شاہ]

دل سے ہر وقت کوئی کہتا ہے
میں نہیں تجھ سے جدا غور سے سُن

ناصر کاظمی

 

[محمد عادل عزیز]

میرے کاسے میں تو اک سوت کی انٹی بھی نہ تھی
نام لکھوا دیا یوسف کے خریداروں میں

 

[کاشفی]

میر کے دین و مذہب کا کیا پوچھتے ہو تم، اس نے تو
قشقہ کھینچا ، دیر میں بیٹھا، کب کا ترک اسلام کیا
(میر تقی میر)

 

[فلک شیر]

آنس تم بھی سامنے رکھ کرآئینہ​

زورسے اک آواز لگاؤ ،لوٹ آؤ!
آنس معین
​

 

[محمداحمد]

چلو اب فیصلہ چھوڑیں اُسی پر
ہمارے درمیاں جو تیسرا ہے

عبیداللہ علیم

 

[کاشفی]

جگر کسی کا جلے دل جلے دماغ جلے
وہ کہہ گئے ہیں کہ آئیں گے ہم چراغ جلے
(غلام مصطفیٰ خان یک رنگ)

 

[محمداحمد]

یہ عہدِ کم نگہی، اِس میں قدرِ جوہر کیا
غزالِ دشتِ سگاں ہوں، مرا مقدر کیا

خالد علیگ

 

[محمداحمد]

فقیرِ راہ گزر تھے کسی کو کیا دیتے
مگر یہی کہ وہ ملتا تو ہم دعا دیتے
گھروں میں آگ لگا کر بھی کیا ملا خالد
دلوں میں آگ لگی تھی اُسے بجھا دیتے

خالد علیگ

 

[محمداحمد]

موتی تو نہیں تھے کوئی پلکوں سے جو چُنتا
ہم آنکھ سے ٹپکے ہوئے آنسو کی طرح تھے

خالد علیگ

 

[محمداحمد]

اِک صفحہ پڑھ لیا تھا جنوں کی کتاب کا
اب تک خرد کو ہوش نہیں ہے جواب کا

خالد علیگ

 

[محمداحمد]

شہرِ آسیب میں آنکھیں ہی نہیں ہیں کافی
اُلٹا لٹکو گے تو پھر سیدھا نظر آئے گا

شاعر : نامعلوم

 

[حسان خان]

کبھی موسم بھی آ ہی جائے گا پرہیزگاری کا
شرابِ تیز لا ساقی کہ ہنگامِ جوانی ہے
(مولانا ظفر علی خان)

 

[حسان خان]

کہنے کو اہلِ علم کی کوئی کمی نہیں
لیکن خود اپنی فکر، خود اپنی نظر کہاں
(جگر مرادآبادی)

در ملکِ دلم شاہِ جنوں لائے ہیں تشریف
اے عقل و خرد اب چلو باہر کو سدھارو
(شاہ نیاز بریلوی)

 

[مدیحہ گیلانی]

دِلوں کی جگمگاتی بستیاں تاراج کرتے ہیں
بہی جو لوگ لگتے ہیں نہایت عام سے، پہلے
امجد اسلام امجد

 

[کاشفی]

نہ جانے کون سی ساعت چمن سے بچھڑے تھے
کہ آنکھ بھر کے نہ پھر سوئے گلستاں دیکھا
(قائم چاند پوری)

 

[کاشفی]

مجھے شادابیء صحنِ چمن سے خوف آتا ہے
یہی انداز تھے جب لٹ گئی تھی زندگی اپنی
(ظہیر کاشمیری)

 

[شیزان]

ممکن نہیں ہے مجھ سے یہ طرزِمنافقت
اے دنیا تیرے مزاج کا بندہ نہیں ہوں میں​