آج کا شعر - 5

[کاشفی]

بشر کا ناز، نبوت کا نورِ عین حسین
جنابِ فاطمہ زہرا کے دل کا چین حسین
کبھی نماز سے پوچھا جو رنج و غم کا علاج
کہا نماز نے بے ساختہ حسین! حسین!
(محسن نقوی شہید)

 

[کاشفی]

کعبہ علی کا، مسجد و منبر علی کے ہیں
ابدال و غوث و قطب و قلندر علی کے ہیں
محشر میں اہلِ حشر پہ آخر کھلا یہ بھید
سوداگرانِ خلد، گداگر علی کے ہیں
(محسن نقوی شہید)

 

[سید فصیح احمد]

کھلا ہے جھوٹ کا بازار، آؤ سچ بولیں
نہ ہو بلا سے خریدار، آؤ سچ بولیں

سکوت چھایا ہے انسانیت کی قدروں پر
یہی ہے موقعِ اظہار، آؤ سچ بولیں

تمام شہر میں اب ایک بھی نہیں منصور
کہیں گے کیا رسن و دار، آؤ سچ بولیں

قتیل شفائی

 

[showbee]

برسوں کے بعد دیکھا اِک شخص دلربا سا
اب ذہن میں نہیں ہے پر نام تھا بھلا سا
الفاظ تھے کہ جگنو آواز کے سفر میں
بن جائے جنگلوں میں جس طرح راستہ سا
خوابوں میں خواب اس کے یادوں میں یاد اُس کی
نیندوں میں گھل گیا ہو جیسے کہ رتجگا سا
پہلے بھی لوگ آئے کتنے ہی زندگی میں
وہ ہر طرح سے لیکن اوروں سے تھا جدا سا
اگلی محبتوں نے وہ نامرادیاں دیں
تازہ رفاقتوں سے دل تھا ڈرا ڈرا سا

 

[showbee]

کبھی یاد کرو تواِس طرح
میرا درد پھر غزل بنے
کبھی دل دُکھاو تو اِس طرح
میرے دھڑکنیں بھی لرز اُٹھیں
کبھی بھُول جاؤ تو اِس طرح
نہ سِسک سکوں نہ بِلک سکوں
کبھی چھوڑ جاؤ تو اِس طرح
نہ اُجڑ سکوں نہ سںور سکوں
کبھی یاد آو تو اِس طرح
نہ جی سکوں نہ مر سکوں

 

[حسان خان]

منزل کی دھن میں آبلہ پا چل کھڑے ہوئے
شورِ جرس سے دل نہ رہا اختیار میں
(یاس یگانہ چنگیزی)

جامِ مے ہونٹوں تک اپنے آتے آتے گر گیا
رہ گئے خاموش سوئے چرخِ گرداں دیکھ کر
(یاس یگانہ چنگیزی)

 

[اوشو]

دل کے غم نے دردِ جہاں سے مل کے بڑا بے چین کیا
پہلے پلکیں پُرنم تھیں، اب عارض بھی نمناک ہوئے

ظہیر کاشمیری

 

[کاشفی]

گو دل کو تم سے خاص شکایت ہے، کیا کروں
پھر بھی مجھے تمہیں سے محبت ہے، کیا کروں
(بہزاد لکھنوی)

 

[کاشفی]

اس کا خیال ہے کہ زمانہ کہے گا کیا
اب تجھ سے دوستی نہ نباہوں تو کیا کروں
(بہزاد لکھنوی)

 

[showbee]

کاتبِ تقدیر سے کیا شکوہ اے دلِ نادان
جب ہر شے نے مِٹ جانا ہے تو پھر خواہشیں کیسی

 

[شیزان]

ہمارے کھِلنے اور جھڑنے کے دن اِک ساتھ آئے تھے
ہمیں دیمک نے چاٹا ہے شجر کاری کے موسم میں


عباس تابش

 

[کاشفی]

تم ہنسو تو دن نکلے، چُپ رہو تو راتیں ہیں
کس کا غم، کہاں کا غم، سب فضول باتیں ہیں

اے خلوص میں تجھ کو کس طرح بچاؤں گا
دشمنوں کی چالیں ہیں، ساتھیوں کی گھاتیں ہیں

تم پہ ہی نہیں موقوف، آج کل تو دنیا میں
زیست کے بھی مذہب ہیں، موت کی بھی ذاتیں ہیں
(مصطفی زیدی)

 

[کاشفی]

اہلِ کراچی کے لیئے منظر بھوپالی کی طرف سے
یہ اذیت بھی ذلت بھی ہے، ہم پہ یہ غم قیامت بھی ہے
جس زمیں کے لیئے مر مٹے، اس زمیں پر ہی غدار ہیں
۔۔۔۔۔۔

 

[کاشفی]

یہاں گناہ ہوا کے چھپائے جاتے ہیں
چراغ خود نہیں بجھتے بجھائے جاتے ہیں
(منظر بھوپالی)

 

[کاشفی]

یہ کیسا قرض ہے نفرت کا کم نہیں ہوتا
کہ بڑھتا جاتا ہے جتنا جھکائے جاتے ہیں
(منظر بھوپالی)

 

[کاشفی]

پھر بہوں جلانے کا حق تمہیں پہنچتا ہے
پہلے اپنے آنگن میں بٹیاں جلا دینا
(منظر بھوپالی)

 

[نیرنگ خیال]

وہ وقت بھی عذابِ الٰہی سے کم نہیں
جب آدمی میں ہوتا ہے بیدار مولوی

حمایت علی شاعرؔ

 

[کاشفی]

کدھر کو جائیں گے اہلِ سفر نہیں معلوم
وہ بدحواسی ہے اپنا ہی گھر نہیں معلوم

ہمارا صبر تجھے خاک میں ملا دے گا
ہمارے صبر کا تجھ کو اثر نہیں معلوم

ہم اپنے گھر میں بھی بےخوف رہ نہیں سکتے
کہ ہم کو نیتِ دیوار و در نہیں معلوم

ہمیشہ ٹوٹ کہ ماں باپ کی کرو خدمت
ہے کتنے روز یہ بوڑھے شجر نہیں معلوم
(منظر بھوپالی)

 

[کاشفی]

ایسا نہیں جہاں میں محبت نہیں رہی
لیکن کسی کو پیار کی فرصت نہیں رہی

جب سے حرام رزق کی عادت پڑی ہمیں
گھر میں ہمارے پہلی سی برکت نہیں رہی
(منظر بھوپالی)

 

[کاشفی]

ہماری جیب سے جب بھی قلم نکلتا ہے
سیاہ شب کے خداؤں کا دم نکلتا ہے

تمہارے وعدوں کا قد بھی تمہارے جیسا ہے
کبھی جو ناپ کے دیکھو تو کم نکلتا ہے

یہ اتفاق ہے منظرکہ کوئی سازش ہے
ہمیشہ کیوں میرے گھر سے ہی بم نکلتا ہے
(منظر بھوپالی)