آپ کے پسندیدہ اشعار!

[طارق شاہ]

کس قدر آگ برستی ہے یہاں
خلق شبنم کو ترستی ہے یہاں

صرف اندیشۂ افعی ہی نہیں
پُھول کی شاخ بھی ڈستی ہے یہاں

رُخ کدھر موڑ گیا ہے دریا
اب نہ وہ لوگ نہ بستی ہے یہاں

زندہ درگور ہُوئے اہلِ نظر
کس قدر مُردہ پرستی ہے یہاں

زیست وہ جنسِ گراں ہے کہ فراز
موت کے مول بھی سَستی ہے یہاں

احمد فراز

 

[طارق شاہ]

سراپا عشق ہُوں میں، اب بکھر جاؤں تو بہتر ہے
جدھر جاتے ہیں یہ بادل، اُدھر جاؤں تو بہتر ہے

ٹھہر جاؤں یہ دل کہتا ہے تیرے شہر میں کچھ دن
مگر حالات کہتے ہیں کہ گھر جاؤں تو بہتر ہے


احمد فراز

 

[طارق شاہ]

دِلوں میں فرق آئیں گے تعلّق ٹُوٹ جائیں گے
جو دیکھا جو سُنا، اُس سے مُکر جاؤں تو بہتر ہے

احمد فراز

 

[طارق شاہ]

بچیں گے رہ گزر یار تلک کیونکر ہم
پہلے جب تک نہ دو عالم سے گزرجائیں گے

شیخ ابراہیم ذوق

 

[طارق شاہ]

ہم نہیں وہ جوکریں خون کا دعویٰ تجھ سے
بلکہ پُوچھے گا خدا بھی تو مُکر جائیں گے

شیخ ابراہیم ذوق

 

[طارق شاہ]

بیٹھا ہوگا کہیں جُھوٹوں میں وہ جُھوٹا بن کر
کوئی سچّا بھی اگر جُھوٹ کے اِس دَور میں ہے

احمد ندیم قاسمی

 

[طارق شاہ]

شب ہجر کی تلخیاں کچھ نہ پُوچھو
نہیں داستاں یہ سُنانے کے قابل

یہ ٹُھکرا کے دل پھر کہا مُسکرا کر
نہ تھا دل یہ، دل سے لگانے کے قابل

جو دیکھا مجھے، پھیر لِیں اپنی آنکھیں
نہ جانا مجھے، منہ لگانے کے قابل

حفیظ جالندھری

 

[طارق شاہ]

ہرایک فرد ہو تہذیب و فن کا اوجِ کمال
کوئی ملوُل نہ، ہو کوئی خستہ حال نہ ہو

خدا کرے، کہ مِرے اِک بھی ہم وطن کے لیے
حیات جرم نہ ہو، زندگی وبال نہ ہو

احمد ندیم قاسمی

 

[طارق شاہ]

وہ تبسّم تھا، کہ برقِ حُسن کا اعجاز تھا !
کائِناتِ جان و دِل، زیر و زبرہونے لگی

حفیظ جالندھری

 

[طارق شاہ]

خود اپنا فیصلہ بھی، عشق میں کافی نہیں ہوتا !
اُسے بھی کیسے کر گزُریں ، جو دل میں ٹھان لیتے ہیں

فراق گورکھپوری

 

[طارق شاہ]

لمحاتِ مسّرت ہیں تصوّر سے گریزاں !
یاد آئے ہیں جب بھی، غم و آلام ہی آئے

ادا جعفری

 

[طارق شاہ]

سونپی گئی ہر دولتِ بیدار اِسی کو
یہ دل جو ہمیں آج بھی ناداں سا لگے ہے

ادا جعفری

 

[سید فصیح احمد]

وہ جو کہتے ہیں تجھے آگ لگے !
مژدۂ وصل سُناتے ہیں مُجھے

مومن خاں مومن

اِن سطروں کی تعریف مُمکِن ہی نہیں !!

جزاک اللہ محترم

 

[طارق شاہ]

کب عشق کِیا، کِس سے کِیا، جُھوٹ ہے یارو
بس بُھول بھی جاؤ، جو کبھی ہم سے سُنا ہو

اطہرنفیس

 

[طارق شاہ]

اب میری غزل کا بھی تقاضہ ہے یہ تجھ سے
انداز و ادا کا، کوئی اسلوب نیا ہو

اطہرنفیس

 

[طارق شاہ]

ہم نغمہ سَرا کچھ غزلوں کے، ہم صُورت گر کُچھ چہروں کے
بے جذبۂ شوق سُنائیں کیا ، کوئی خواب نہ ہو، تو بتائیں کیا

اطہرنفیس

 

[طارق شاہ]

تو نے ہر چند زباں پر تو بٹھائے پہرے
بات جب تھی کہ مِری سوچ کو بدلا ہوتا

ن م راشد

 

[طارق شاہ]

آئینہ خانے میں اِک عمر رہے محوِ خیال
اپنے اندر سے نِکل کر، کبھی دیکھا ہوتا

ن م راشد

 

[طارق شاہ]

میری کشتی کو بَھلا موج ڈبو سکتی تھی
میں اگر خُود نہ شریکِ کفِ دریا ہوتا

ن م راشد

 

[طارق شاہ]

تجھ پہ کُھل جاتی، مِری رُوح کی تنہائی بھی !
میری آنکھوں میں کبھی جھانک کے دیکھا ہوتا

ن م راشد