آپ کے پسندیدہ اشعار!

[سید فصیح احمد]

پیدا ہوئی ہے، کہتے ہیں، ہر درد کی دوا
یوں ہو تو چارۂ غمِ الفت ہی کیوں نہ ہو

غالب

 

[سید فصیح احمد]

کوئی روندے تو اٹھاتے ہیں نگاہیں اپنی
ورنہ مٹی کی طرح راہ سے کم اٹھتے ہیں

عباس تابش

 

[عینی مروت]

طلب کی اُس نے جب مُجھ سے محبت کی وضاحت تو
بتایا،دشت کے ہونٹوں پہ بارش کی دُعا جیسے!

 

[سید فصیح احمد]

یہ رُکے رُکے سے آنسو، یہ دبی دبی سی آہیں
یونہی کب تلک خدایا، غم زندگی نباہیں

مجروح سلطان پوری

 

[سید فصیح احمد]

دِکھا کے جنبشِ لب ہی، تمام کر ہم کو
نہ دے جو بوسہ، تو منہ سے کہیں جواب تو دے

غالب

 

[عینی مروت]

اشکِ کم گو! تجھے لفظوں کی قبا گر نہ مِلے
میری پلکوں کی زباں سے ہی ادا ہو جانا

 

[سید فصیح احمد]

ستم کو ہم کرم سمجھے ، جفا کو ہم وفا سمجھے
اور اُس پر بھی نہ سمجھے وہ تو اُس بُت سے خدا سمجھے

ذوقؔ

 

[سید فصیح احمد]

جسم مسمار کروں گا تو لگے گا مرے ہاتھ
اسی دیوار کے نیچے ہے خزانہ دل کا

عباس تابش

 

[طارق شاہ]

اب تو ہر زخم کی مُنہ بند کلی
لبِ اِظہار ہُوئی جاتی ہے

احمد ندیم قاسمی

 

[طارق شاہ]

آنکھوں کو بھی لے ڈوبا یہ دل کا پاگل پن
آتے جاتے جو مِلتا ہے تم سا لگتا ہے

قیصرالجعفری

 

[طارق شاہ]

ہنسی آئی تو ہے بے کیف سی لیکن، خُدا جانے
مُجھے مسرُور پا کر، میرے غمخواروں پہ کیا گُزری

شکیل بدایونی

 

[طارق شاہ]

عجیب حبس کے عالم میں چل رہی تھی ہَوا
تِرے جواب سے پہلے، مِرے سوال کے بعد

سلیم کوثر

 

[طارق شاہ]

ہمیں، جو چُپ کے دھُندلکوں سے جھانکتی تھی بہت
وہ آنکھیں، دیکھنے والی ہیں عرضِ حال کے بعد

سلیم کوثر

 

[سید فصیح احمد]

کوچہ میں آ پڑے تھے ترے خاک ہو کے ہم
یاں تو صبا نے اور بھی مٹی خراب کی

ذوقؔ

 

[سید فصیح احمد]

دل میرا بنا جب تو محبت تری آئی
آنکھیں ہوئیں پیدا تو مجھے تو نظر آیا

داغؔ

 

[الشفاء]

دِکھا کے جنبشِ لب ہی، تمام کر ہم کو
نہ دے جو بوسہ، تو منہ سے کہیں جواب تو دے

غالب

دکھا کے جنبش لب ہی تمام کر ہم کو۔۔۔ واہ۔ واہ۔۔ بہت خوب۔

 

[قیصرانی]

کوئی روندے تو اٹھاتے ہیں نگاہیں اپنی
ورنہ مٹی کی طرح راہ سے کم اٹھتے ہیں

عباس تابش

روندے کہ رو دے؟

 

[عبدالقیوم چوہدری]

روندے کہ رو دے؟

روندے

 

[قیصرانی]

روندے

شکریہ

 

[طارق شاہ]

مِری ناکامیوں پر تم ذرا تشویش مت کرنا !
جسے کچھ بھی نہیں آتا، محبّت اُس کو آتی ہے

شفیق خلش